సాగర్​లో దూకుడు పెంచిన కమలనాథులు... రంగంలోకి ముఖ్య నేతలు

అభ్యర్థిని చివరి నిమిషంలో ప్రకటించి ఆలస్యంగా ప్రచారం మొదలుపెట్టిన భారతీయ జనతా పార్టీ... నాగార్జునసాగర్ ఉపఎన్నికల్లో దూకుడు పెంచింది. ప్రచారం చివరి అంకంలో... సీనియర్ నేతలంతా మండలాలు చుట్టేలా ప్రణాళిక రూపొందించింది. ఇప్పటికే కిషన్​రెడ్డి, రాజాసింగ్, డీకే అరుణ ప్రచారం నిర్వహించగా... నేటి నుంచి బండి సంజయ్ రంగంలోకి దిగారు.

తెరాస, కాంగ్రెస్ పూర్తి స్థాయి కేడర్​ను రంగంలోకి దింపాయి. భాజపా నుంచి ఇంకా సందడే మొదలు కాలేదు. ఇదీ... నిన్నమొన్నటి వరకు నాగార్జునసాగర్ ఉపఎన్నికల్లో వినిపించిన మాట. ప్రచారం చివరి అంకానికి వస్తున్న తరుణంలో... కమలం పార్టీ విస్తృతంగా పర్యటనలు చేపడుతోంది. సీనియర్ నేతల్ని రప్పించి... ఓట్లు పడేలా వ్యూహాలు సిద్ధం చేసింది. నేటి నుంచి బండి సంజయ్... మూడు రోజుల పాటు నియోజకవర్గంలో ప్రచారం చేస్తారు. సోమ, మంగళ, గురువారాల్లో పార్టీ రాష్ట్ర అధ్యక్షుడు... అన్ని మండలాలు చుట్టి వచ్చేలా ప్రణాళిక తయారు చేశారు. అభ్యర్థి రవినాయక్​ను గెలిపించుకునేందుకు... శతథా యత్నిస్తున్నారు.

ముఖ్య నేతల ప్రచారం...

కమలం పార్టీ తరఫున కేంద్ర హోం శాఖ సహాయ మంత్రి కిషన్ రెడ్డి... శని, ఆదివారాల్లో విస్తృతంగా రోడ్ షోల్లో పాల్గొన్నారు. నియోజకవర్గంలోనే ఉండి... శ్రేణులకు దిశానిర్దేశం చేశారు. అటు పార్టీ జాతీయ ఉపాధ్యక్షురాలు డీకే అరుణ... రెండ్రోజుల పాటు ఓటర్లతో మమేకమై భాజపాను గెలిపించుకోవాల్సిన అవసరం ఉందన్నారు. సినీనటుడు బాబూమోహన్ సైతం ప్రచారంలో పాల్గొన్నారు. హాలియాలో కేంద్ర మంత్రి అర్జున్ రామ్ మేఘ్ వాల్ సమావేశం నిర్వహించి... రోడ్ షోకు హాజరయ్యారు. తెరాస తీరును నేతలు తీవ్రంగా ఎండగడుతూ... ఓటర్లను ఆకర్షించే ప్రయత్నం చేస్తున్నారు.

రంగంలోకి రాములమ్మ...

సోమవారం బండి సంజయ్​తో పాటు... విజయశాంతి కూడా ప్రచార రంగంలోకి దిగారు. తిరుమలగిరి సాగర్ మండలంలోని గ్రామాల్లో... విజయశాంతి ఓట్లు అభ్యర్థించారు. నియోజకవర్గంలో ఓట్ల శాతంలో రెండో స్థానంలో నిలుస్తున్న గిరిజనులు ఎన్నికలను ప్రభావితం చేయనున్న నేపథ్యంలో... గిరిజన సామాజికవర్గానికి చెందిన రవికుమార్​కు భాజపా టికెట్ ఇచ్చింది. ఎట్టి పరిస్థితుల్లోనూ తమ అభ్యర్థిని గెలుపు తీరాలకు చేర్చాలన్న భావనతో... ప్రచార పర్వంలోనూ జోరు పెంచింది. పోలింగ్ గడువు సమీపిస్తున్న సమయంలో చేసే ప్రచారం... తమకు కలసివస్తుందన్న భావన పార్టీ నేతల్లో కనిపిస్తోంది.

హామీల వర్షం...

తెరాస, కాంగ్రెస్​కు భిన్నంగా... ప్రత్యేకంగా ఉపఎన్నికల మేనిఫెస్టోను ప్రకటించింది భాజపా. తమ అభ్యర్థి గెలిస్తే... నియోజకవర్గానికి కేంద్రీయ విద్యాలయాన్ని తీసుకువస్తామని హామీ ఇచ్చింది. అంతర్జాతీయ పర్యాటక కేంద్రంగా అభివృద్ధి చేయడంతో పాటు... నాగార్జునసాగర్- హైదరాబాద్ మార్గంలో పారిశ్రామిక కారిడార్ అందుబాటులోకి తెస్తామన్నారు నేతలు. ఇలా రెండు ప్రధాన పార్టీలను ఎదుర్కొనేందుకు కమల దళం... వచ్చే మూణ్నాలుగు రోజులు కీలకమని భావిస్తుంది.

ఇదీ చూడండి: సాగర్​ ఉపఎన్నికలో పోస్టల్​ బ్యాలెట్​ ఓట్లపై అధికారుల దృష్టి