మెదక్‌ నియోజకవర్గంలోని ప్రజల సమస్యలు పరిష్కరించేందుకు నెలలో రెండు నెలల పాటు 'మీకోసం' అనే వినూత్న కార్యక్రమానికి శ్రీకారం చుట్టామని ఎమ్మెల్యే పద్మాదేవేందర్ రెడ్డి అన్నారు. మంగళవారం తన క్యాంపు కార్యాలయంలో ఆర్డీవో సాయిరాంతో కలిసి ప్రజల వద్ద నుంచి వినతులను స్వీకరించారు.
కొత్తగా చేపట్టిన 'మీకోసం' అనే కార్యక్రమానికి స్పందన బాగుందని ఎమ్మెల్యే పద్మాదేవేందర్ రెడ్డి అన్నారు. ప్రతీ సమస్యను పరిష్కరించడమే తన లక్ష్యమని తెలిపారు. రెవెన్యూ, భూ తగాదా, పింఛను, వికలాంగుల, కార్పొరేషన్ లోన్లు, ఇళ్లు, డ్రైనేజీ సమస్యల పరిష్కారం కోసం ఎక్కువ మంది వస్తున్నారని ఎమ్మెల్యే పేర్కొన్నారు. ఈ సమస్యలకు పరిష్కరించగలిగితే కార్యక్రమం విజయవంతం అయినట్లు భావిస్తామన్నారు. 15 రోజుల క్రితం వచ్చిన ఫిర్యాదులను 100 శాతం పరిష్కరించామని వివరించారు.
మార్చి 25 నుంచి నియోజకవర్గంలోని రామాయంపేట, నిజాంపేట మండలాల్లో ప్రజల వద్ద నుంచి ఫిర్యాదులను స్వీకరిస్తామని ఎమ్మెల్యే తెలిపారు. ఈ కార్యక్రమంలో మున్సిపల్ కమిషనర్ శ్రీహరి, వివిధ శాఖల అధికారులు, సిబ్బంది పాల్గొన్నారు.
