ఫోన్​ కావాలా?... అయితే రెండు బీర్లు తీసుకురా...

రాత్రివేళ ప్రజల భద్రత దృష్ట్యా పోలీసులు పెట్రోలింగ్ నిర్వహిస్తారు. కానీ ఓ కానిస్టేబుల్​ తీరు అందర్నీ విస్మయానికి గురిచేస్తోంది. ఓ యువకుడి ఫోన్​ తీసుకున్న కానిస్టేబుల్ దానిని తిరిగి ఇచ్చేందుకు రెండు బీర్లు ఇవ్వాల్సిందిగా డిమాండ్ చేశాడు.

మంచిర్యాల జిల్లాలో కానిస్టేబుల్ శ్రీధర్ రాత్రివేళ పెట్రోలింగ్ నిర్వహిస్తున్నాడు. అదే సమయంలో ఓ మైదానంలో నలుగురు యువకులు కనిపించారు. వారి వద్దకు వస్తున్న కానిస్టేబుల్​ని చూసి భయంతో తమ సెల్​ఫోన్​ అక్కడే వదిలేసి పారిపోయారు. కాసేపటి తర్వాత తమ ఫోన్​కు కాల్​ చేసి ఇవ్వాలని అడిగారు. 'రెండు బీర్లు తీసుకొచ్చి మొబైల్​ తీసుకెళ్లండి' అని శ్రీధర్ సమాధానం చెప్పాడు. ఈ తతంగాన్ని ​రికార్డు చేసిన యువకులు సామాజిక మాధ్యమాల్లో ఆడియోను పోస్ట్ చేశారు.

ఈ విషయం కాస్తా పోలీసు ఉన్నతాధికారుల దృష్టికి వెళ్లింది. రామగుండం పోలీస్ కమిషనర్ సత్యనారాయణ దీనిపై స్పందించి కానిస్టేబుల్​ను సస్పెండ్ చేశారు. పోలీసు సిబ్బంది విధి నిర్వహణలో నిర్లక్ష్యంగా వ్యవహరించినా... అసభ్యంగా మాట్లాడినా తగిన చర్యలు తప్పవని హెచ్చరించారు.