స్వాతంత్య్రం కోసం ప్రాణాలర్పించిన వారి త్యాగాలకు గుర్తుగా 'ఆజాదీ కా అమృత్ మహోత్సవ్' వేడుకలు దేశవ్యాప్తంగా నిర్వహిస్తున్నట్లు మంచిర్యాల జిల్లా పాలనాధికారి భారతి హోలికేరి వెల్లడించారు. ఉత్సవాల్లో భాగంగా జిల్లా కేంద్రంలో నిర్వహించిన 2కె రన్‌ను ఆమె ప్రారంభించారు. స్వాతంత్య్రం వచ్చి 2022 ఆగష్టు 15 నాటికి 75 ఏళ్లు పూర్తవుతున్నందున వేడుకలు నిర్వహిస్తున్నట్లు కలెక్టర్ తెలిపారు.
ఆజాదీ కా అమృత్ మహోత్సవ్ వేడుకల్లో భాగంగా పలు కార్యక్రమాలు చేపడుతున్నట్లు కలెక్టర్ వివరించారు. ఏప్రిల్ 3న కవి సమ్మేళనం ఏర్పాటు నిర్వహిస్తామని తెలిపారు. దేశభక్తిని పెంపొందించేలా వివిధ స్థాయిల్లో ఫ్రీడం రన్, కవి సమ్మేళనాలు, వ్యాస రచన, ఉపన్యాసం, చిత్రలేఖనం, సాహిత్య, సాంస్కృతిక కార్యక్రమాలను నిర్వహించేందుకు ప్రణాళికలు రూపొందిస్తున్నట్లు జిల్లా పాలనాధికారి భారతి హోలికేరి వెల్లడించారు. వేడుకలకు రాష్ట్ర ప్రభుత్వం రూ.25 కోట్ల రూపాయలు కేటాయించిందని.. యువత స్వాతంత్ర్య సమరయోధుల పోరాటాలను చదవాలని మంచిర్యాల డీసీపీ ఉదయ్ కుమార్ రెడ్డి సూచించారు . ఈ కార్యక్రమంలో డీసీపీ ఉదయ్ కుమార్ రెడ్డి, ఏసీపీ అఖిల్ మహాజన్ పాల్గొన్నారు.
