'కొనుగోలు కేంద్రాల్లోనే కందులు విక్రయించాలి'

రైతులు దళారుల చేతిలో మోసపోకుండా కొనుగోలు కేంద్రాల్లోనే కందులు విక్రయించాలని ఖమ్మం జిల్లా రైతు సమన్వయ సమితి కన్వీనర్​ నల్లమల వెంకటేశ్వర్లు సూచించారు. నేలకొండపల్లి మార్కెట్​ యార్డ్​లో కందుల కొనుగోలు కేంద్రాన్ని ప్రారంభించారు.

ఖమ్మం జిల్లా పాలేరు నియోజకవర్గంలోని నేలకొండపల్లి మండలంలోని మార్కెట్ యార్డ్​లో కందుల కొనుగోలు కేంద్రాన్ని రైతు సమన్వయ సమితి కన్వీనర్​ నల్లమల వెంకటేశ్వర్లు ప్రారంభించారు. నేలకొండపల్లి, కూసుమంచి, ముదిగొండ మండలాల రైతులంతా కొనుగోలు కేంద్రంలోనే కందులు విక్రయించాలని సూచించారు.

ప్రభుత్వం రైతులకు ఉచిత విద్యుత్, రైతు బీమా, రైతుబంధు వంటి అనేక సంక్షేమ పథకాలు ప్రవేశ పెట్టిందని కొనియాడారు. తెలంగాణ సర్కార్​ పంట కొనుగోలు చేసిన వారం రోజుల్లోనే రైతు అకౌంట్​లో నగదు జమ చేస్తోందని తెలిపారు.

రైతులంతా తేమ 12 శాతం వరకు ఉండేలా చూసుకొని మార్కెట్​కు కందులు తీసుకురావాలని మార్కెట్ ఫెడ్ డీఎం సుధాకర్ అన్నారు. కొనుగోలు కేంద్రానికి వచ్చేటప్పుడు ఆధార్ కార్డు, బ్యాంకు అకౌంటు, పట్టాదారు పాసుపుస్తకం జిరాక్సులు తీసుకురావాలని సూచించారు.

• ఇదీ చూడండి : సహకార ఎన్నికలకు నామినేషన్ల ఉపసంహరణ పూర్తి..