ఒడిశాలోని మల్కాన్గిరి జిల్లా దామన్పల్లికి చెందిన సునీత శీల్ బతుకు దెరువు కోసం మూడు నెలల క్రితం భర్త శ్రీరామ్ శీల్, సమీప బంధువు సుశాంత్ బైరాగ్తో కలిసి హైదరాబాద్కు వచ్చారు. కుటుంబ పోషణ కోసం భర్త సెంట్రింగ్ పనుల్లో చేరాడు. ఈ నెలాఖరులోగా సెంట్రింగ్ పనులు పూర్తి చేసుకుని కాన్పు కోసం ఇంటికి వెళ్లాలనే నిర్ణయంతో ఉన్న సునీత కుటుంబ సభ్యులకు కరోనా కష్టాల్ని తెచ్చిపెట్టింది. లాక్డౌన్ పొడిగించడం, హైదరాబాద్లో ఉపాధి లేకపోవడం.. కుటుంబ పోషణ భారమైంది. ఈ పరిస్థితుల్లో ఇక హైదరాబాద్లో ఉండి లాభం లేదనుకున్న కుటుంబీకులు.. సొంత ఊరు ఒడిశా రాష్ట్రంలోని దామన్పల్లికి వెళ్లాలని నిశ్చయించుకున్నారు.
కాలినడకన..
ఎలాంటి రవాణా సదుపాయం లేకపోవడం వల్ల కాలినడకన సుమారు 500 కిలోమీటర్ల దూరంలోని ఊరికి వెళ్లేందుకు సిద్ధమయ్యారు. సోమవారం ఉదయం హైదరాబాద్ నుంచి కాలినడకన బయలుదేరారు. చాలా దూరం కాలినడకన ప్రయాణించిన తర్వాత గర్భిణీగా ఉన్న సునీత కష్టాలు చూసిన ఓ లారీ డ్రైవర్.. వారికి సూర్యాపేట వరకు లారీలో తీసుకొచ్చాడు. మళ్లీ అక్కడి నుంచి నుంచి కాలినడకన ప్రయాణం కొనసాగించారు.
చలించిపోయిన అధికారులు..
సూర్యాపేట నుంచి ఖమ్మం, భద్రాచలం మీదుగా ఒడిశా రాష్ట్రంలోని మల్కాన్గిరి జిల్లాకు వెళ్లేందుకు కాలినడకన ప్రయాణం సాగిస్తున్న వీరు ఖమ్మం జిల్లా కూసుమంచి సమీపానికి చేరుకున్నారు. రోడ్డుపై కాలినడకన నిండు గర్భిణీ నడవడం గమనించిన రెవెన్యూ, పోలీస్ అధికారులు.. వారి వివరాలు సేకరించారు. ఒడిశాకు కాలినడకన బయలుదేరామన్న గర్భిణీ మాటలు విని చలించిపోయారు. అభాగ్యులను చేరదీసే ఖమ్మంలోని అన్నం సేవా ఫౌండేషన్కు సమాచారం అందించారు. వెంటనే అంబులెన్స్ ద్వారా కూసుమంచి చేరుకున్న అన్నం శ్రీనివాసరావు బృందం... గర్భిణీతో పాటు ఆమె కుటుంబీకులను ఖమ్మం తీసుకొచ్చారు. గర్భిణీని ఆస్పత్రిలో చేర్పించారు.
నిలకడగా గర్భిణీ ఆరోగ్యం..
నిండు గర్భిణీ దాదాపు 100 కిలోమీటర్లు కాలినడకన నడిచించిందని తెలుసుకున్న వారంతా... వారి దయనీయతను చూసి కన్నీరుమున్నీరయ్యారు. గర్భిణీని పరిక్షించిన వైద్యులు... చికిత్స అందిస్తున్నారు. ప్రస్తుతం మహిళ ఆరోగ్యం బాగానే ఉందని వైద్యులు చెబుతున్నారు. లాక్డౌన్తో తీరని ఇబ్బందుల్లో ఉన్న వలస కూలీల కష్టాలకు ఈ కుటుంబం పడ్డ ప్రయాణ కష్టాలే నిదర్శనంగా నిలుస్తున్నాయి. నిండు గర్భిణీ దాదాపు 100 కిలోమీటర్లు కాలినడకన ప్రయాణించిన తీరు అందరినీ కన్నీరు పెట్టించింది.
ఇవీ చూడండి: పరదాలు కుట్టే పరిశ్రమలో భారీ అగ్నిప్రమాదం
