ఉమ్మడి కరీంనగర్​లో వర్షాలు.. రైతులకు తీవ్ర నష్టం

ఉమ్మడి కరీంనగర్ జిల్లాలో అకాల వర్షంతో అన్నదాతలకు తీవ్ర నష్టం వాటిల్లింది. ఒక్కసారిగా  ఈదురు గాలులతో కూడిన రాళ్ల వర్షం పడటం వల్ల వరి, నువ్వు, బొప్పాయి పంటలు దెబ్బతినగా.. పిందె దశలో ఉన్న మామిడి రాలిపోయింది.

ఉమ్మడి కరీంనగర్ జిల్లాలోని పలు మండలాల్లో ఈదురు గాలులు, ఉరుములతో కూడిన వర్షం పడింది. కొడిమ్యాల, మల్యాల, గొల్లపల్లి, బుగ్గారం, ధర్మపురి మండలాల్లో సుమారు రెండు వేల ఎకరాల్లో పంట నష్టం వాటిల్లినట్లు తెలుస్తోంది. ప్రధానంగా వరి పంటతో పాటు కూరగాయలు, మామిడికాయలు గాలికి రాలిపోయాయి. ఈదురుగాలులతో పలుచోట్ల విద్యుత్ తీగలు తెగిపోవటంతో కరెంటు సరఫరాకు అంతరాయం ఏర్పడింది.

విషాదాన్ని మిగిల్చిన వర్షం
జగిత్యాల జిల్లా ధర్మపురి మండలంలో గాలి దుమారంతో కురిసిన వడగళ్ల వర్షం విషాదాన్ని మిగిల్చింది. రాయపట్నం వద్ద గోదావరి నదిలోకి చేపల వేటకు వెళ్లిన రేచపల్లి నర్సయ్య గాలి దుమారంతో పడిన వర్షానికి తెప్ప బోర్ల పడి మరణించాడు. గోపులాపూర్‌లో పొలంలోకి వెళ్లిన గైని శ్రీనివాస్‌ అనే రైతుకు వడగళ్లు తాకడంతో స్పృహ కోల్పోయి పొలంలో పడిపోయాడు. గ్రామస్థులు గమనించి చికిత్స కోసం ఆస్పత్రికి తరలించారు.

ఇవీ చూడండి:ఇండియా అవుతోంది.. ఈటీవీ భారత్‌