Nutrition Kits distribution in Telangana : గర్భిణీల్లో రక్తహీనత, పౌష్టికాహార లోపాలను నియంత్రించేందుకు సర్కారు మరో సరికొత్త కార్యక్రమానికి శ్రీకారం చుట్టింది. రాష్ట్రవ్యాప్తంగా ఉన్న గర్భిణీ స్త్రీలకు కేసీఆర్ న్యూట్రిషన్ కిట్లను పంపిణీ చేయాలని నిర్ణయించింది. ఈ మేరకు కామారెడ్డి కలెక్టరేట్ నుంచి స్పీకర్ పోచారం శ్రీనివాస్ రెడ్డి, మంత్రి వేముల ప్రశాంత్ రెడ్డితో కలిసి వైద్యారోగ్య శాఖ మంత్రి హరీశ్రావు వర్చువల్గా ఈ కార్యక్రమాన్ని ప్రారంభించారు.
రాష్ట్రంలో మాతా-శిశు మరణాలు బాగా తగ్గాయని మంత్రి హరీశ్రావు వెల్లడించారు. సీఎం కేసీఆర్ బృహత్తర ప్రణాళికతో పని చేస్తున్నారని పేర్కొన్నారు. ఈ క్రమంలోనే కేంద్రానివి పార్టిషన్ పాలిటిక్స్.. తమవి న్యూట్రిషన్ పాలిటిక్స్ అని స్పష్టం చేశారు. పేద మహిళల కష్టాలు తెలిసిన నాయకుడు సీఎం కేసీఆర్ అని కొనియాడిన మంత్రి.. తల్లి మనసుతో ఆలోచించి పౌష్టికాహార కిట్ ఇస్తున్నామని తెలిపారు. గర్భిణీలకు రక్తహీనత ఉండకూడదనే ఈ కిట్ పంపిణీ చేస్తున్నామన్న ఆయన.. పౌష్టికాహార కిట్‌లోని ఆహారాన్ని తల్లులు తప్పక తీసుకోవాలని సూచించారు. ప్రతి గర్భిణీకి రెండు సార్లు కిట్ అందిస్తామని.. తల్లీబిడ్డల క్షేమం కోరే ఈ పౌష్టికాహార కిట్ అందిస్తున్నామని మంత్రి వివరించారు.
"తల్లి మనసుతో ఆలోచించి పౌష్టికాహార కిట్ ఇస్తున్నాం. గర్భిణులకు రక్తహీనత ఉండకూడదనే ఈ కిట్లు పంపిణీ చేస్తున్నాం. ప్రతి గర్భిణికి రెండుసార్లు పౌష్టికాహార కిట్ అందిస్తాం. కిట్‌లోని ఆహారాన్ని తల్లులు తప్పక తీసుకోవాలి. పేద మహిళల గురించి ఆలోచించి ఈ కిట్ రూపొందించాం. కేంద్రానివి పార్టిషన్ పాలిటిక్స్.. మావి న్యూట్రిషన్ పాలిటిక్స్." - మంత్రి హరీశ్రావు
రాష్ట్రవ్యాప్తంగా అత్యధికంగా రక్తహీనత నమోదవుతున్న ఆదిలాబాద్‌, భ‌ద్రాద్రి కొత్తగూడెం, జ‌య‌శంక‌ర్ భూపాల‌ప‌ల్లి, జోగులాంబ గ‌ద్వాల, కామారెడ్డి, కుమురుం భీం ఆసిఫాబాద్‌, ములుగు, నాగ‌ర్ క‌ర్నూల్‌, వికారాబాద్ల‌లో ఈ రోజు నుంచి న్యూట్రిషన్ కిట్లు పంపిణీ చేస్తున్నారు. ఇప్పటికే ఆయా జిల్లాలకు న్యూట్రిషన్ కిట్లను పంపిన సర్కారు.. నేడు స్థానిక మంత్రుల ఆధ్వర్యంలో గర్భిణీలకు కిట్లను అందిస్తోంది. సుమారు రూ.50 కోట్లతో చేపట్టిన ఈ కార్యక్రమం ద్వారా సుమారు 1.25 లక్షల మంది గర్భిణీలకు లబ్ధి చేకూరనుంది.
ఇవీ చూడండి..
నేటి నుంచి కేసీఆర్ పౌష్టికాహార కిట్ల పంపిణీ
మళ్లీ భయం పుట్టిస్తున్న కరోనా కేసులు.. అప్రమత్తమైన కేంద్రం.. రాష్ట్రాలకు కీలక సూచన
