- అసలు ఆర్థరైటిస్ అంటే ఏమిటి? ఈ సమస్య ఎక్కువ అవ్వడానికి గల కారణాలు ఏమిటి?
కీళ్లు అరిగిపోవటాన్ని ఆర్థరైటిస్ అంటారు. సహజంగా ఇది వయసుతో పాటు వచ్చే సమస్య. బండి టైర్, వాడే చెప్పులు ఎలా అరిగిపోతాయే అలాగే జాయింట్లు కూడా అరిగిపోతాయి. మనుషుల్లో చూసుకుంటే శరీరం మొత్తం బరువు మోకాళ్ల మీదనే పడుతుంది. అందుచేత మోకాళ్లు ఎక్కువగా ఆరిగిపోతుంటాయి. దీనినే 'ఆస్టియో ఆర్థరైటిస్ ఆఫ్ నీ జాయింట్' అంటాం. వయసు రిత్యా వస్తుంది. అస్టియో ఆర్థరైటిస్తో పాటు, రుమటాయిడ్, సెప్టిక్, గౌట్ ఆర్థరైటిస్ వంటి రకాలు ఉన్నాయి. చిన్న వయసులో జాయింట్స్ దగ్గర తగిలే దెబ్బల వల్ల కూడా ఆర్థరైటిస్ వస్తుంది.
- ఇది వయసుతోపాటు వచ్చే సమస్యే అంటున్నారు. అయితే ఇటీవలి కాలంలో యుక్త వయసు వారిలోనూ ఈ సమస్య కనిపిస్తుంది. దీనికి కారణం ఏంటి?
చాలా మంది చిన్నవాళ్లలో ఇది వస్తుంది. ఇది మానవ తప్పిదం వల్ల వచ్చే సమస్య. ఊబకాయం, సరైన శారీరక శ్రమ లేకపోటవం, లేక అతిగా జుంబా, స్టెప్పర్, ఎయిరోబిక్స్, జాగింగ్ లాంటివి చేయడం, సరైన జాగ్రత్తలు తీసుకోకుండా కొన్ని రకాల ఆటలు ఆడటం, భారీ వాహనాలను నడపటం, ఒకేచోట కదలకుండా కూర్చోవటం, విటమిన్ డీ లోపం వల్ల కూడా ఆర్థరైటిస్ వస్తుంది.
- మీరన్నట్టు ఊబకాయం లాంటి సమస్యని మినహా ఇస్తే... క్రీడలు, ఎక్సర్సైజ్లు వంటివి శరీరాన్ని ఆరోగ్యంగా ఉంచుకోవటానికి చేస్తుంటాం. అయితే వాటివల్ల కూడా ఈ వ్యాధి వచ్చే అవకాశం ఉందంటున్నారు. మరి ఈ సమస్యని ఎలా అధిగమించవచ్చు?
నేను త్రెడ్ మిల్, స్పోర్ట్స్, ఎక్సర్సైజ్కి వ్యతిరేకం కాదు. కానీ ఒక స్థాయి దాటి ఏదైనా చేయటం మంచిది కాదు. త్రేడ్మిల్ 5 స్పీడ్ మీద చేయవచ్చు. వారంలో ఐదు రోజులు బ్రిస్క్వాక్ సరిపోతుంది. ఎయిరో బిక్స్ లాంటివి మనకు అవసరం లేదు. అవి వెస్ట్రన్ సంస్కృతి... అక్కడి వారికి అవసరం. ఫిట్గా ఉంటాం కదా అని తరచూ మెట్లు ఎక్కుతుంటారు... అయితే ఊబకాయం ఉన్నవారు మెట్లు వాడకపోవటం మంచిది. ఇండియన్ టాయిలెట్స్ వాడకపోవటం, పద్మాసనంలో కూర్చోకపోవటం మంచిది. ఆర్థరైటిస్ ఏదో ఒక వయసులో వస్తుంది. అయితే ఇలాంటి జాగ్రత్తల వల్ల ఆర్థరైటిస్ని కొంతకాలం పోస్ట్పోన్ చేయవచ్చు.
- ఒకే చోట స్థిరంగా కూర్చుంటే ఆర్థరైటిస్ వచ్చే అవకాశం ఉందంటున్నారు. అయితే ప్రస్తుతం ఉద్యోగస్తుల్లో దాదాపు 80శాతం డెస్క్ జాబులే. మరి అలాంటి వారిలో ఆర్థరైటిస్ రాకుండా ఎలాంటి జాగ్రత్తలు తీసుకోవచ్చు?
డెస్క్ జాబ్ వాళ్లకి ఆర్థరైటిస్ వస్తుందని కాదు కానీ... అలాంటి వారిలో ఊబకాయం పెరుగుతుంది. ఇలాంటి వారు 50 నిమిషాలకు ఒకసారి 5 నిమిషాలు బ్రేక్ తీసుకుని.. ఛైర్ లోంచి లేచి వాకింగ్ చేయటం, మెటికలు విరవటం, లెగ్ ఎక్సర్సైజ్లు చేయటం వంటివి మంచిది.
- ప్రాణాపాయ వ్యాధులకు ఇచ్చే అంత ప్రాముఖ్యత ఎముకల సంబంధిత వ్యాధులకు ఇవ్వటం లేదు. అయితే ప్రాథమిక దశలో ఈ ఆర్థరైటిస్ని గుర్తించటం ఎలా?
ఫ్యామిలీ హిస్టరీ ఇందులో కీలక పాత్ర పోషిస్తుంది. 33శాతం ఆస్టియో ఆర్థరైటిస్ వంశ పారంపర్యంగా వస్తోంది. రుమటాయిడ్ ఆర్థరైటిస్ కూడా అలా జెనిటికల్గా వస్తుంది. చిన్నప్పుడు ఇన్ఫెక్షన్లు వచ్చిన వారు, టీబీ సోకిన వారిలో సెప్టిక్ ఆర్థరైటిస్ వంటివి వస్తుంటాయి. ఒక్కసారి జాయింట్లోని మృదులాస్థి అరగటం మొదలు పెడితే దానిని ఆపలేము. అందుకే సమస్య మొదలవ్వకముందే జాగ్రత్తపడటం మంచిది. హెచ్ఐవీ వచ్చినప్పటి నుంచి టీబీ కేసులు పెరుగుతున్నాయి. దీంతో సెప్టిక్ ఆర్థరైటిస్ కేసులు కూడా పెరుగుతున్నాయి. ఆర్థరైటిస్ వయసు లాంటిది ఆపలేము.. కానీ స్లో చేయగలము. అయితే ఇప్పుడు ఆర్థరైటిస్ వచ్చినా... ఇప్పుడు ఎవరూ భయపడటం లేదు. ఇప్పుడు ఆర్థరైటిస్ వస్తే స్టేజస్ని బట్టి మందులు ఉన్నాయి. మృదులాస్థి వృద్ధికి కొల్లాజిన్ పెప్టెడ్స్ వంటి మందులు వచ్చాయి.
- ఆర్థరైటిస్ రాకుండా చూసుకునే విషయంలో ఆహారం ఎలాంటి పాత్ర పోషిస్తుంది?
పౌష్టికాహారం, సరైన ఎక్సర్సైజ్లు, ఊబకాయం రాకుండా చూసుకోవటం ద్వారా ఆర్థరైటిస్ని కొంత వరకు రాకుండా కాపాడుకోవచ్చు.
- ఆర్థరైటిస్ కారణంగా శరీరంలో ఎలాంటి సమస్యలు ఏర్పడతాయి?
ఆర్థరైటిస్తో రెండు కాళ్లు అరిగిపోయినప్పుడు దొడ్డి కాళ్లు వస్తాయి. దీంతో అలాంటి వారిలో నడుం నొప్పి వచ్చే అవకాశం ఉంటుంది. ఇక నొప్పులు భరించలేక పెయిన్ కిల్లర్ మందులు వాడటం వల్ల కిడ్నీ వంటివి దెబ్బతింటాయి.
- చివరగా ప్రపంచ ఆర్థరైటిస్ డై సందర్భంగా ప్రజలకు మీరేం చెప్పాలనుకుంటున్నారు?
నలభై ఏళ్లు పైబడిన వారు హెల్త్ చెకప్ ఎలా చేయించుకుంటున్నారో... అదే విధంగా మోకాళ్ల నొప్పులు వస్తే అశ్రద్ధ చేయకుండా వైద్యుడ్ని సంప్రదించాలి. సమతుల్య ఆహారం తీసుకోవాలి. శరీరానికి హాని కలిగించని ఎక్సర్సైజ్లు చేయాలి. మెట్లు ఎక్కువగా ఎక్కకపోవటం, ఊబకాయం లేకుండా చూసుకోవాలి. ఇక హిస్టేక్టమీ వల్ల కూడా శరీరంలో బరువు పెరిగి ఆ తర్వాత మోకాళ్లు అరిగే సమస్య ఎక్కువ అవుతోంది. అందుకే అనవసర హిస్టెక్టమీలు చేయించుకోవద్దు. డయాబెటిస్, హైపోథెరాయిడ్ వంటివాటిని కంట్రోల్ చేసుకుంటే ఆర్థరైటిస్ రాకుండా చూసుకోవచ్చు.
- ఇదీ చూడండి: ఈ పండ్లతో ఆరోగ్యం పదిలం!
