తిరుమల తిరుపతి దేవస్థానం బోర్డు 2020-21 బడ్జెట్ను ఆమోదించింది. బడ్జెట్ రూ.3,309 కోట్లుగా అంచనా వేసింది. బూందీపోటులో అగ్నిప్రమాదాల నివారణకు రూ.3.3 కోట్లు కేటాయించినట్లు తితిదే ఛైర్మన్ సుబ్బారెడ్డి వెల్లడించారు. బర్డ్ ఆసుపత్రిలో మెరుగైన సౌకర్యాల కోసం రూ.8.5 కోట్లు కేటాయించారు. బర్డ్ ఆస్పత్రిలో కొత్త ఉద్యోగాల భర్తీకి పాలకమండలి అనుమతించినట్లు సుబ్బారెడ్డి తెలిపారు.
చెన్నైలో పద్మావతి ఆలయ నిర్మాణానికి రూ.3.92 కోట్లు కేటాయించారు. తితిదేలో ప్రత్యేక సైబర్ సెక్యూరిటీ విభాగం ఏర్పాటుకు ఆమోదం తెలిపినట్లు సుబ్బారెడ్డి వెల్లడించారు. తితిదే ఆలయాల్లో భద్రతకు 1300 సీసీ కెమెరాల కొనుగోలుకు ఆమోదం తెలిపారు.
జమ్మూ, ముంబయి, వారణాసిలో శ్రీవారి ఆలయ నిర్మాణానికి ఏర్పాట్లు చేయనున్నట్లు సుబ్బారెడ్డి తెలిపారు. ద్విచక్రవాహనాలు మినహా మిగతా వాటికి అలిపిరి వద్ద టోల్‌ రుసుం పెంచారు. లైట్ మెట్రోపై నిపుణుల ప్రతిపాదనలు వచ్చాకే నిర్ణయం తీసుకోనున్నట్లు సుబ్బారెడ్డి తెలిపారు. ఎస్వీ జూపార్కు వద్ద ప్రతిభావంతుల శిక్షణా వసతి గృహానికి రూ.14 కోట్లు కేటాయించారు. శ్రీ శార్వరి నామ సంవత్సర ఉగాది పంచాంగాన్ని తితిదే ఛైర్మన్ వై.వి.సుబ్బారెడ్డి, ఈవో ఎ.కె.సింఘాల్ విడుదల చేశారు.
