సీఎం నిర్ణయంపై ప్రతిపక్షాలు, కార్మికుల హర్షం...

విధుల్లో చేరేందుకు అవకాశం కల్పిస్తూ... సీఎం కేసీఆర్​ తీసుకున్న నిర్ణయం పట్ల ఆర్టీసీ కార్మికులు సంతోషం వ్యక్తం చేశారు. వివిధ చోట్ల మిఠాయిలు పంచుకుని సంబురాలు చేసుకున్నారు. సీఎంకు కృతజ్ఞతలు తెలుపుతూ... ఒకరికొకరు శుభాకాంక్షలు తెలుపుకున్నారు. ఎలాంటి షరతులు విధించకుండా విధుల్లో చేర్చుకోవడంపై ప్రతిపక్షాలు హర్షం వ్యక్తం చేశాయి.

సమ్మె విరమించి ఉద్యోగాల్లో చేరేందుకు సిద్ధంగా ఉన్న కార్మికులకు సీఎం కేసీఆర్... తీపి కబురు అందించారు. నేటి ఉదయం నుంచి ఉద్యోగాల్లో చేరేందుకు కార్మికులకు అవకాశం కల్పించారు. ఆర్టీసీ సమ్మె పట్ల సీఎం నిర్ణయాన్ని స్వాగతించిన తెలంగాణ ఉద్యోగుల ఐకాస, టీఎన్జీవో సంఘం... సీఎం కేసీఆర్‌, మంత్రివర్గ సభ్యులకు ధన్యవాదాలు తెలిపాయి. సీఎం ప్రతి డిపో నుంచి ఐదుగురితో కమిటీ వేయడాన్ని స్వాగతిస్తున్నామన్న అశ్వత్థామరెడ్డి... ఆర్టీసీ ఐకాసతో కలిసి వచ్చిన అందరికి ధన్యవాదాలు తెలిపారు. కార్మికులను విధుల్లోకి తీసుకోవడం... ఆర్టీసీకి రూ.100కోట్ల నిధులు విడుదల చేస్తూ ఆర్థికశాఖ ఉత్తర్వులు జారీ చేయడాన్ని ఐకాస కో కన్వీనర్‌ థామస్‌రెడ్డి స్వాగతించారు.

మంత్రి మండలి సమావేశం తర్వాత సీఎం కేసీఆర్​ మాట్లాడిన విధానం పూర్తిగా ఆక్షేపణీయమని భాజపా రాష్ట్ర అధ్యక్షుడు లక్ష్మణ్‌ ఆరోపించారు. ముఖ్యమంత్రి స్థాయిలో ఉండి తీవ్రంగా తిట్టడం సరికాదని అభ్యంతరం వ్యక్తం చేశారు. ప్రజలను తప్పుదారి పట్టించేలా కేంద్రంపై నింద మోపి సీఎం తప్పించుకునే ప్రయత్నం చేస్తున్నారని ధ్వజమెత్తారు. ఆర్టీసీ కార్మికుల సమ్మె సుఖాంతం అవ్వడం పట్ల సీపీఐ జాతీయ కార్యదర్శి నారాయణ సంతోషం వ్యక్తం చేశారు. సీఎం కేసీఆర్ తెగేదాకా లాగకుండా చివరికి శుభం పలికారన్నారు.

కార్మికులను ఎలాంటి షరతులు లేకుండా యథావిధిగా ఉద్యోగాల్లో చేరమని... చనిపోయిన కుటుంబాలకు ఉద్యోగం ఇస్తామని సీఎం కేసీఆర్ హామీ ఇచ్చినందుకు పలువు నాయకులు ప్రత్యేక కృతజ్ఞతలు తెలిపారు.

ఇదీ చూడండి : 'తెలంగాణలో ఎందుకు పుట్టానురా అనిపిస్తోంది