హైదరాబాద్ పాతబస్తీలో రేపు జరగబోయే బోనాల జాతర ఉత్సవాల్లో భాగంగా లాల్దర్వాజలోని శ్రీ మహంకాళి అమ్మవారి దేవాలయ కమిటీ సభ్యులతో దక్షిణ మండలం ఇంఛార్జి డీసీపీ గజరావు భూపాల్ సమావేశం నిర్వహించారు. కొవిడ్ నిబంధనలు పాటిస్తూ... ఉత్సవాలు జరుపుకోవాలని సూచించారు. ముఖ్యంగా సోమవారం జరిగే రంగం, బలిగంప, పోతురాజుల గావు కార్యక్రమాల్లో వ్యక్తిగత దూరం పాటిస్తూ.. ఉత్సవాలు జరుపుకోవాలని కోరారు.
భక్తులు ఎవరూ దేవాలయాలకు రావొద్దని... ఆలయ కమిటీ వారే బోనాలు సమర్పించాలన్నారు. కొవిడ్ ఆంక్షలు ఉన్నందున భక్తులకు అనుమతి లేదని తెలిపారు. నాగులచింత నుంచి లాల్దర్వాజ, ఓల్డ్ ఛత్రినాక నుంచి లాల్దర్వాజ, గౌలిపురా- లాల్దర్వాజ రోడ్డును మూసేస్తున్నట్లు తెలిపారు. ప్రజలు సహకరించాలని ఛత్రినాక పోలీసులు తెలిపారు.
