పోడు భూముల అంశం ఉమ్మడి రాష్ట్రం నుంచి ఇప్పటికీ పరిష్కారం కాకుండా ఉందని సీపీఐ రాష్ట్ర కార్యదర్శి చాడ వెంకట్ రెడ్డి అన్నారు. ప్రతీ సంవత్సరం అటవీశాఖ, రెవిన్యూ అధికారుల బెదిరింపుల మధ్య వారు కోర్టుల చుట్టూ తిరుగుతూ ఆందోళన చెందుతున్నారని తెలిపారు. పోడు భూముల రైతుల సమస్యలను ఆయా జిల్లాల్లో కూర్చొని పరిష్కారం చేస్తానని సీఎం హామీ ఇచ్చిరని అన్నారు. రెండోసారి అధికారంలోకి వచ్చిన తర్వాత 18 మాసాలు గడిచిపోయినా.. ఇప్పటికీ ఆ వాగ్దానం అమలు కాలేదని విమర్శించారు. కొన్ని చోట్ల ఫారెస్టు, రెవిన్యూ శాఖల మధ్య హద్దుల వివాదం పరిష్కారమైనట్లు తెలుస్తుందని.. అలాంటి చోట్ల లాభోక్తులకు భూమి పట్టాలివ్వడం సరికాదన్నారు. ఆ పోడు భూములపై ఆధారపడి జీవించే వారికి పట్టాలు ఇవ్వాలని చాడ డిమాండ్ చేశారు.
రాష్ట్రంలో కొత్తగా అమలు చేయబోతున్న నియంత్రిత వ్యవసాయం రైతు సమితిల ద్వారా అమలు చేయడం సరికాదన్నారు. రైతులకు ఏ నేలలో ఏ రకం పంట వేయాలో అవగాహన కల్పించాలన్నారు. రైతు సమితుల్లో తెరాస నాయకులు మాత్రమే ఉన్నారని అన్నారు. రైతు బంధులో రాజకీయ జోక్యమా అని సీపీఐ ప్రశ్నిస్తుందని ఆయన తెలిపారు.
ఇదీ చూడండి : ఓయూ ప్రహరీ గోడ వద్ద స్థలంలో నిర్మాణంపై కాంగ్రెస్‌ నిరసన
