Minister talasani on minister mallareddy issue: మంత్రి మల్లారెడ్డి కాన్వాయ్‌పై జరిగిన దాడిని పశుసంవర్థక శాఖ మంత్రి తలసాని శ్రీనివాస్ యాదవ్ తీవ్రంగా ఖండించారు. ప్రజాస్వామ్యంలో ఈ తరహా దాడులు సరికాదన్నారు. ఆదివారం మేడ్చల్ నియోజకవర్గంలో జరిగిన రెడ్ల సింహగర్జన సభకు అనుమతులు ఇప్పించి సహకరించిన మల్లారెడ్డిపైనే దాడి చేయడమేంటని ప్రశ్నించారు. వేదికపై మంత్రి అన్ని విషయాలు చెప్పారని తెలిపారు.
సభలో ఆ ఒక్క విషయమే చెప్పాలా? రెడ్డి కార్పొరేషన్‌ గురించే మాట్లాడాలని అనడం సబబుకాదని మండిపడ్డారు. ఓ బాధ్యత గల మంత్రిగా రాష్ట్ర ప్రభుత్వం అన్ని వర్గాలకు సమ న్యాయం చేస్తుందని చెప్పుకొచ్చారని వివరించారు. ఎనిమిదేళ్లుగా ప్రభుత్వం చేసిన అంశాలను వివరించారని తెలిపారు. ఈ వ్యవహారం వెనుక ఎవరున్నా చట్టం తన పని తాను చేసుకుంటూ వెళుతుందని హెచ్చరించారు. ఈ ఘటనలో ఎవరినీ ఉపేక్షించమని మంత్రి తలసాని పేర్కొన్నారు.
ప్రజాస్వామ్యంలో ఈ తరహా దాడులు సరికాదు. సభకు అనుమతి ఇప్పించిన మంత్రిపైనే దాడి చేయడమేంటి? ఒక మంత్రిగా ప్రభుత్వం చేసిన పనులు చెబుతారు. రెడ్డి కార్పొరేషన్‌ గురించే మాట్లాడాలని అనడం సబబుకాదు. ఈ వ్యవహారం వెనుక ఎవరున్నా చట్టం ప్రకారం చర్యలు తీసుకుంటుంది. - మంత్రి తలసాని శ్రీనివాస్ యాదవ్
సంబంధిత కథనాలు
