తిరుమల తిరుపతి దేవస్థానం నూతల ధర్మకర్తల మండలి కొలువుదీరింది. 36 మంది సభ్యులతో ఏర్పాటైన ధర్మకర్తల మండలి తొలి సమావేశం తిరుమల అన్నమయ్య భవనంలో జరిగింది. ధర్మకర్తల మండలి ఛైర్మన్ వైవీ సుబ్బారెడ్డి అధ్యక్షతన జరిగిన సమావేశంలో పలు కీలక నిర్ణయాలు తీసుకున్నారు. గత నిర్ణయాలను రద్దు చేసి సరికొత్తగా తీర్మానాలు చేశారు. అమరావతి ఆలయ పరిధిని పరిమితి చేయడమే కాక.. పాటు అవిలాల చెరువు అభివృద్ధి పనులను భారీగా కుదించారు. సమావేశంలో తీసుకొన్న నిర్ణయాలను ఛైర్మన్ వైవీ సుబ్బారెడ్డి మీడియాకు వివరించారు. ఆరు నెల‌లుగా పెండింగ్‌లో ఉన్న పలు అంశాలపై చ‌ర్చించి పాల‌న‌కు ఇబ్బందులు లేకుండా చ‌ర్యలు తీసుకొన్నామన్నారు.
సమావేశంలో తీసుకొన్న నిర్ణయాలు
- తిరుమ‌ల‌లో తాగునీటి స‌మ‌స్యను శాశ్వతంగా ప‌రిష్కరించేందుకు బాలాజీ రిజ‌ర్వాయ‌ర్ నిర్మాణానికి నిధుల కేటాయింపు
- అమరావతిలో శ్రీవారి ఆలయ నిర్మాణ వ్యయం రూ . 36 కోట్లకు త‌గ్గింపు
- ఒక ప్రాకారంతో ఆలయ నిర్మాణం చేప‌ట్టాల‌ని నిర్ణయం
- తిరుప‌తిలోని అవిలాలకు సంబంధించి తిరుపతి వాసుల‌కు ఉప‌యోగ‌క‌రంగా ఉండేలా చెరువు, పార్కు మాత్రమే నిర్మించాల‌ని నిర్ణయం
- తిరుమ‌ల‌లో ప‌ర్యావ‌ర‌ణాన్ని కాపాడేందుకు ఎల‌క్ట్రిక్ బ‌స్సులు, ఎల‌క్ట్రిక్ కార్లు ప్రవేశ‌పెట్టాల‌ని నిర్ణయం
- తితిదేలో ప‌నిచేస్తున్న కాంట్రాక్టు, ఔట్‌సోర్సింగ్ ఉద్యోగుల‌పై స‌మ‌స్యల‌పై చ‌ర్చించేందుకు స‌బ్ క‌మిటీ ఏర్పాటు
- రాష్ట్ర ప్రభుత్వాన్ని సంప్రదించిన అనంతరం గ‌రుడ వార‌ధి నిర్మాణానికి నిధుల కేటాయింపుపై నిర్ణయం
ఉప సంఘాల ఏర్పాటు
ఆరు నెలల సుదీర్ఘ విరామం అనంతరం కొత్తగా ఏర్పాటైన ధర్మకర్తల మండలి తొలి సమావేశంలో.. 180 అంశాలతో కూడిన భారీ అజెండాను రూపొందించారు. సమయాభావంతో కేవలం గంటన్నర మాత్రమే చర్చ జరగ్గా.. మిగిలిన కీలక అంశాలను వచ్చే సమావేశంలో చర్చించాలని నిర్ణయించారు. అజెండాలోని మరికొన్ని అంశాలపై ఉప సంఘాలను నియమించారు. ధర్మకర్తల మండలి సభ్యులతో ఏర్పాటు చేసిన ఉప సంఘాలు సమావేశమై వాటిపై నిర్ణయాలు తీసుకొని ఛైర్మన్‌కు నివేదికలు సమర్పిస్తాయి. వీటి అధారంగా వచ్చే సమావేశంలో నిర్ణయం తీసుకోనున్నారు.
సభ్యుల ప్రమాణస్వీకారం
సమావేశానికి ముందు ధర్మకర్తల మండలి సభ్యులుగా ఎంపికైన 36 మందిలో 17 మంది స్వామివారి సన్నిధిలో పదవీ ప్రమాణం చేశారు. శనివారం తుడా ఛైర్మన్ చెవిరెడ్డి భాస్కరరెడ్డితో పాటు మరో ఇద్దరు సభ్యులు పదవీ బాధ్యతలు చేపట్టగా మిగిలిన వారిలో పదిహేడు మంది ప్రమాణ స్వీకారం చేశారు. ఇతరులు వివిధ కారణాలతో ప్రమాణ స్వీకారం చేయలేదు.
ఇవీ చూడండి : బతుకమ్మ బతుకమ్మ ఉయ్యాలో...
