JNTU Team Visit Swapnalok building Fire Accident: గురువారం అగ్ని ప్రమాదానికి గురైన స్వప్నలోక్ భవనాన్ని జేఎన్టీయూ బృందం పరిశీలించింది. స్వప్నలోక్ బిల్డింగ్లోని నాలుగు, ఐదు, ఆరు అంతస్తులను జేఎన్టీయూ బృందం ప్రొఫెసర్ లక్ష్మి, హెచ్ఓడీ డీఎన్ కుమార్ ఆ ప్రాంతాన్ని పరిశీలించారు. భవనంలోని ఐదో అంతస్తులో అగ్ని ప్రమాదం జరిగినప్పటికీ.. నాలుగు, ఆరు అంతస్తుల్లో ఈ ప్రమాద తీవ్రత కారణంగా కొంత దెబ్బతిన్నట్లు బృంద ప్రతినిధులు నిర్ధారణకు వచ్చారు.
భవన నాణ్యతా ప్రమాణాలను, కాలమ్స్, బీమ్స్, స్లాబ్ పరీక్షలు నిర్వహించిన అనంతరం నివేదిక అందజేస్తామని తెలిపారు. ఆ నివేదిక ఇచ్చిన తర్వాత భవనాన్ని కూల్చేయాలా లేక మరమ్మతులు చేయాలా అనే విషయంపై స్పష్టత వస్తుందని బృంద ప్రతినిధులు పేర్కొన్నారు. ఈ పరీక్షలు నిర్వహించేందుకు రెండు, మూడు రోజులు పట్టే అవకాశం ఉందని వెల్లడించారు.
గతంలో దక్కన్ మాల్ కూల్చివేత: స్వప్నలోక్ కాంప్లెక్స్ అగ్ని ప్రమాద ఘటన జరగడానికి ముందు జనవరి 19న సికింద్రాబాద్లోని దక్కన్ మాల్లో ఘోర అగ్ని ప్రమాదం జరిగింది. ఈ ఘటనలో ముగ్గురు వ్యక్తులు మృతి చెందారు. అప్పట్లో ఈ భవన నిర్మాణాన్ని పరిశీలించిన జేఎన్టీయూ అధికారులు ఏ క్షణమైనా భవనం కూలిపోయే అవకాశం ఉందని చెప్పడంతో.. జీహెచ్ఎంసీ అధికారులు భవనాన్ని కూల్చివేశారు. ఐదంతస్తుల దక్కన్మాల్ భవనం కూల్చివేత ఐదురోజులు సాగింది.
అసలేం జరిగింది: సికింద్రాబాద్లోని స్వప్నలోక్ కాంప్లెక్స్లో భారీ అగ్ని ప్రమాదం జరిగింది. కాంప్లెక్స్లోని ఏడో అంతస్తులో మంటలు షార్ట్ సర్క్యూట్ కారణంగా వ్యాపించాయి. అయితే సడన్గా ఐదో అంతస్తులో పేలుడు సంభవించి అగ్ని కీలలు ఇంకా ఎక్కువయ్యాయి. దీంతో ఈ భవనంలో ఉన్న వారందరూ హుటాహుటిగా భయంతో పరుగులు తీశారు. ఐదో అంతస్తులో కాల్సెంటర్లో నలుగురు యువతిలు, ఇద్దరు యువకులు చిక్కుకుపోయారు. దట్టమైన పొగ లోపల కమ్మేయడంతో వారు ఊపిరి ఆడక చనిపోయారు.
మరికొంత మంది ఆ పొగకు స్ప్శహ తప్పి పడిపోయారు. వెంటనే అక్కడకు చేరుకున్న అగ్ని మాపక సిబ్బంది వారిని రక్షించి.. చికిత్స అందించారు. అయితే మంటలు విపరీతంగా వ్యాపించడం, దట్టమైన పొగలు కమ్మడంతో సహాయక సిబ్బంది లోపలికి వెళ్లలేక పోయారు. సికింద్రాబాద్లోని దక్కన్ మాల్ ఘటన మరువక ముందే ఇప్పుడు ఈ ప్రమాదం జరగడంతో.. అసలేం జరుగుతుందో అర్థంకాకా స్థానికులు భయాందోళనలో ఉన్నారు.
ఈ అగ్ని ప్రమాదంలో మరణించిన ఆరుగురుకి ఒక్కొక్కరి రూ. 5 లక్షల చొప్పున రాష్ట్రం ప్రభుత్వం పరిహారం ప్రకటించింది. మరోవైపు కేంద్ర ప్రభుత్వం కూడా మృతి చెందిన ఒక్కొక్కరికీ రూ. 2లక్షలు.. క్షతగాత్రులకు రూ. 50వేలును పరిహారంగా ప్రకటించింది.
ఇవీ చదవండి:
