హైదరాబాద్ పాతబస్తీ చాంద్రాయణగుట్ట నకిలీ బంగారం కేసును ఛేదించినట్లు హైదరాబాద్ పోలీస్ కమిషనర్‌ అంజనీకుమార్ పేర్కొన్నారు. మోసానికి పాల్పడిన నిందితులు శివయ్య, తిరుపతయ్య, ఇంద్రాజులను అరెస్ట్ చేసినట్లు తెలిపారు. వీరి వద్ద నుంచి రూ.15 లక్షల నగదు స్వాధీనం చేసుకున్నట్లు వివరించారు. ఈ మేరకు హైదరాబాద్ నగర పోలీస్ కమిషనర్‌ కార్యాలయంలో ఆయన వివరాలు వెల్లడించారు.
ఇదీ జరిగింది..
మైసూర్‌ తవ్వకాల్లో లంకె బిందెల్లో బంగారం దొరికింది.. కొంటారా అంటూ శివయ్య, తిరుపతయ్య, ఇంద్రాజులు చాంద్రాయణగుట్టకు చెందిన ఓ వ్యక్తికి ఫోన్‌ చేశారు. రూ.70 లక్షలకు బేరం కుదుర్చుకున్నారు. మొదట అసలు బంగారాన్ని చూపి.. ఆ తర్వాత అతనికి నకిలీ బంగారం ఇచ్చి మోసం చేశారు. వీళ్లపై గతంలోనూ పలు కేసులు ఉన్నట్లు సీపీ తెలిపారు.
చైన్ స్నాచింగ్ కేసు..
ఈ నెల 21న జూబ్లీహిల్స్‌లో మహిళ మెడలో నుంచి గొలుసు దొంగిలించిన కేసును ఛేదించినట్లు సీపీ చెప్పారు. సీసీ కెమెరాల ఆధారంగా నిందితుడు శివను పట్టుకున్నట్లు తెలిపారు. నిందితుడిపై గతంలో నార్సింగి పోలీస్ స్టేషన్‌ పరిధిలో ఆరు కేసులు ఉన్నాయని పేర్కొన్నారు.
కేసీఆర్పై వదంతులు..
తీన్మార్‌ మల్లన్న పేరుతో వాట్సాప్ గ్రూపు సృష్టించి ముఖ్యమంత్రి కేసీఆర్పై తప్పుడు ప్రచారం చేస్తోన్న మరో ఇద్దరు నిందితులను అరెస్టు చేశామని సీపీ అన్నారు.
ధర్నాలు వద్దు..
కరోనా దృష్ట్యా పోలీస్ సిబ్బంది భౌతిక దూరం పాటిస్తూ.. మాస్కులు ధరించి అప్రమత్తంగా ఉండాలని అంజనీకుమార్ సూచించారు. కొవిడ్ విపత్కర పరిస్థితుల్లో ధర్నాలు, ముట్టడి లాంటి కార్యక్రమాలు చేయొద్దని ప్రజలకు విజ్ఞప్తి చేశారు. హైదరాబాద్ పోలీసుల ఆధ్వర్యంలో కొవిడ్ హెల్ప్‌లైన్‌ ఏర్పాటు చేశామని.. ఏదైనా అవసరమైతే 9490616780 నంబర్‌ను సంప్రదించాలని సూచించారు.
