ఎన్నికల కోడ్​ పేరుతో గ్యారంటీల అమలు ఆలస్యం చేస్తారా? : హరీశ్​రావు

Harish Rao on Congress Six Guarantees : కాంగ్రెస్​ ఇచ్చిన గ్యారంటీలను వంద రోజులలోపే అమలు పరచేలా ప్రభుత్వం నిర్ణయం తీసుకోవాలని మాజీ మంత్రి హరీశ్​రావు సూచించారు. పార్లమెంట్​ ఎన్నికల దృష్ట్యా ఆలస్యం అవుతుందనే ఆందోళన ప్రజల్లో నెలకొందని తెలిపారు. మాజీ సీఎం కేసీఆర్ కార్లు కొనుగోలు చేశారని ముఖ్యమంత్రి అనడం హాస్యాస్పదంగా ఉందన్నారు.

Harish Rao on Congress Six Guarantees : అధికారంలోకి వచ్చిన వంద రోజుల్లోనే ఆరు గ్యారంటీలను పూర్తి చేస్తామని హామీ ఇచ్చిన కాంగ్రెస్ సర్కారు వాటిపై తక్షణమే విధానపరమైన నిర్ణయం తీసుకోవాలి మాజీ మంత్రి హరీశ్ రావు డిమాండ్ చేశారు. మార్చి 17తో వంద రోజులు పూర్తవుతాయని, ఫిబ్రవరి నెలాఖరులోపే పార్లమెంట్ ఎన్నికల షెడ్యూల్(Parliament Elections 2024) వచ్చే అవకాశం ఉందని అన్నారు. ఈ నేపథ్యంలో కోడ్ వస్తే గ్యారంటీల అమల్లో మరింత జాప్యం జరిగే అవకాశముందని అభిప్రాయం వ్యక్తం చేశారు.

Harish Rao Instructions to Telangana Government : ఎన్నికల కోడ్ పేరిట గ్యారంటీల దాటవేత జరుగుతుందా అనే అనుమానం ప్రజల్లో వ్యక్తమవుతోందని హరీశ్​రావు అన్నారు. గ్యారంటీలకు సంబంధించి ప్రభుత్వం విధానపరమైన నిర్ణయాలు తీసుకుని జీఓలు విడుదల చేస్తే కోడ్ వచ్చినా ఇబ్బంది ఉండదని సలహా ఇచ్చారు. శ్వేత పత్రాలు కూడా హామీల ఎగవేతల పత్రాలా అనే అనుమానం కలుగుతోందని అన్నారు.

ఫిబ్రవరి 20వ తేదీ లోపే ప్రభుత్వం నిర్ణయం తీసుకోవాలని హరీశ్ రావు డిమాండ్ చేశారు. ఆరోగ్య శ్రీ పది లక్షలకు ప్రభుత్వం పెంచిందని, ఎంత మందికి వర్తించిందో వివరాలు ఇవ్వలేదని వ్యాఖ్యానించారు. జాబ్ కేలండర్(Harish Rao on Job Calendar)​పై మార్గదర్శకాలు రూపొందించాలని ప్రభుత్వానికి హరీశ్ రావు సూచించారు.

"కొత్త వాహనాలు కొనుగోలు చేసి కేసీఆర్ విజయవాడలో దాచారనే విషయం హాస్యాస్పదంగా ఉంది. కొత్త వాహనాలకు బూల్లెట్ ప్రూఫింగ్ చేయించేందుకే అక్కడకు పంపించాం. 119 మంది ఎమ్మెల్యేలను సమానంగా చూస్తామని సీఎం రేవంత్​ రెడ్డి చెప్పారు. ప్రస్తుతం కాంగ్రెస్ నేతలు ప్రొటోకాల్​ను ఉల్లంఘిస్తున్నారు."- హరీశ్​ రావు, మాజీ మంత్రి

Harish Rao Clarity on KCR Buy Cars at Vijayawada : ప్రభుత్వం ఓట్​ ఆన్ అకౌంట్ బడ్జెట్ పెట్టే ఆలోచనలో ఉందని, పూర్తి స్థాయి బడ్జెట్ పెడితేనే హామీల అమలు సాధ్యపడుతుందని హరీశ్ రావు అన్నారు. యాసంగి పంట బోనస్​ విషయంలో కూడా పార్లమెంట్​ ఎన్నికల్లోపే నిర్ణయం తీసుకోవాలని పేర్కొన్నారు. డిసెంబర్ 9వ తేదీన రైతు భరోసా, రైతు రుణమాఫీ, ఆసరా పెన్షన్ల పెంపు, 200 యూనిట్లలోపు విద్యుత్ బకాయిల మాఫీ అమలు చేస్తామని హామీ ఇచ్చిన విషయాన్ని గుర్తు చేశారు. ప్రస్తుతం ఎందుకు అమలు చేయలేదని హరీశ్​రావు నిలదీశారు. ప్రభుత్వం తీరు చూస్తుంటే దాటవేత, ఎగవేత అన్నట్టుగా ఉందని మండిపడ్డారు.