కల్తీ నివారణకు కాసుల కొరత

మార్కెట్​లో కల్తీ ఆహారోత్పత్తుల అమ్మకాలు విచ్చలవిడిగా సాగుతున్నాయి. వాటి నియంత్రణకు నిధుల కొరతే అసలు సమస్యగా మారింది. ప్రభుత్వ ఆధ్వర్యంలో నాణ్యమైన ఉత్పత్తుల తయారీకి కేంద్రం ఉదారంగా నిధులిచ్చినా.. రాష్ట్ర ప్రభుత్వం తరఫున సాయమందక పనులు ఆగిపోయాయి.

మార్కెట్‌లో విచ్చలవిడిగా సాగుతున్న కల్తీ ఆహారోత్పత్తుల అమ్మకాల నియంత్రణను నిధుల కొరత తీవ్రంగా వేధిస్తోంది. ఎలాంటి కల్తీలకు ఆస్కారం లేని నాణ్యమైన ఆహారోత్పత్తుల తయారీ కోసం సర్కారు మూడేళ్ల కిందట ప్రత్యేకంగా రాష్ట్ర ఉద్యాన సంస్థను ఏర్పాటు చేసింది. ఇప్పటికే మార్కెట్‌లో ఉన్న ప్రభుత్వ ఉత్పత్తులు "విజయ" పాలు, వంట నూనెలు మాదిరిగా నాణ్యమైన సుగంధ ద్రవ్యాల ఉత్పత్తులు తయారీ చేయాలనేది ఈ సంస్థ ఏర్పాటు ప్రధాన ఉద్దేశం.

కల్తీ నివారణకు తెలంగాణ బ్రాండ్​ ఉత్పత్తులు
మొత్తం 8 రకాల ఆహారోత్పత్తులు తొలి ఏడాదే ఉత్పత్తి చేయాలని ఉద్యాన సంస్థ నిర్ణయించింది. రోజుకు 13 టన్నుల చొప్పున ఏడాదికి 3,250 టన్నులు ఉత్పత్తిచేసి చిల్లర మార్కెట్‌లో వినియోగదారులకు విక్రయించాలనేది లక్ష్యంగా నిర్దేశించింది. నిత్యావసరాలైన పసుపు, కారం పొడి, ధనియాల పొడి వంటి ఉత్పత్తులు తయారు చేసి తెలంగాణ బ్రాండ్​ పేరుతో ప్యాకింగ్​ చేయాలి. ఇవి మార్కెట్‌లోకి వస్తే ప్రైవేటు సంస్థలు విక్రయించే ఉత్పత్తుల నాణ్యత, ధరలో పోటీతత్వం ఏర్పడి కల్తీలకు అడ్డుకట్ట వేయవచ్చని ప్రభుత్వం తెలిపింది.
మైసూర్‌లోని కేంద్ర ఆహార సాంకేతిక పరిజ్ఞాన పరిశోధన సంస్థ (సీఎఫ్‌టీఆర్‌ఐ) ఈ ప్లాంట్ ఏర్పాటుకు అధునాతన సాంకేతికతతో "సమగ్ర ప్రాజెక్టు నివేదిక - డీపీఆర్‌"ను తయారు చేసి రాష్ట్ర ప్రభుత్వానికి ఇచ్చింది. ఏడాదిన్నర క్రితం వ్యవసాయ శాఖ మంత్రి నేతృత్వంలో ఉన్నతాధికారుల బృందం సీఎఫ్‌టీఆర్‌ఐలో అధ్యయనం చేసి వచ్చింది.

అభివృద్ధికి 18 నెలల గడవు.. ఆరుమాసాలైనా కదలని పనులు
మేడ్చల్ జిల్లా దూలపల్లిలో 16.56 ఎకరాల విస్తీర్ణం స్థలాన్ని ఈ సంస్థకు కేటాయించింది. రాష్ట్ర ప్రభుత్వ ప్రణాళిక బాగుందని కేంద్రం సైతం ఆహార శుద్ధి పరిశ్రమ అభివృద్ధి కార్యక్రమంలో భాగగా ప్రత్యేకంగా 4.28 కోట్ల రూపాయలను గ్రాంట్‌గా గత జులై మాసంలో మంజూరు చేసింది. కానీ, రాష్ట్ర ప్రభుత్వం 18 నెలల్లోగా నిధులు ఇచ్చి ఖర్చు చేస్తేనే ఈ నిధులు ఇస్తామని షరతు విధించింది. ఇప్పటికే ఆరు మాసాలైనా రాష్ట్రం నిధులు కేటాయించక పోవడం వల్ల కేంద్ర నిధులూ వెనక్కిపోయే ప్రమాదం ఏర్పడింది.

మాటలే కానీ.. చేతలు లేవు
ఒకవైపు రాష్ట్రంలో ఆహార శుద్ధి పరిశ్రమలు పెద్ద ఎత్తున ఏర్పాటు కావాలని, నిత్యావసర వస్తువులన్నీ స్థానికంగా కల్తీ లేకుండా తయారు చేయాలని ప్రత్యేక ఆహార శుద్ధి విధానం తెస్తున్నట్లు ప్రభుత్వం చెబుతోంది. కానీ, మూడేళ్లుగా ఉద్యాన సంస్థకు రూ.26.38 కోట్లు సమకూర్చకపోవడం వల్ల ఆహారశుద్ధి ప్లాంటు భవన నిర్మాణానికి పునాదులైనా తవ్వలేదు.
టీఎస్ ఐపాస్‌ కింద ఈ ప్లాంటుకు పారిశ్రామిక రాయితీలు సైతం ఇవ్వడానికి పరిశ్రమల శాఖ అనుమతించింది. పనుల ప్రారంభానికి సంబంధించి టెండర్లు పిలవాలని శ్రీకొండా లక్ష్మణ్​ ఉద్యాన విశ్వవిద్యాలయానికి అప్పగించామని రాష్ట్ర ఉద్యాన శాఖ ఎండీ వెంకటరామిరెడ్డి తెలిపారు. నిధులు ఇవ్వమని రాష్ట్ర ప్రభుత్వాన్ని మరోసారి అడిగామని, నిధులు రాగానే పూర్తి చేస్తామని వెల్లడించారు.

ఇదీ చూడండి : 'పుర'పోరుకు ఎస్​ఈసీ మార్గదర్శకాలు