Double Bedroom Houses Distribution in Hyderabad : జాతరగా ఇళ్ల పంపిణీ.. కల నెరవేరిన వేళ లబ్ధిదారుల ఆనందం 'డబుల్'

Double Bedroom Houses Distribution in Hyderabad : పేదలు గౌరవంగా జీవించేందుకు ప్రభుత్వం.. రెండు పడక గదుల ఇండ్ల నిర్మాణం చేపట్టింది. గ్రేటర్ హైదరాబాద్ పరిధిలో లక్ష ఇళ్లను నిర్మించి ఇవ్వాలని నిర్ణయించింది. అందులో ఇప్పటికే 69,532 పూర్తయినట్లు రాష్ట్ర సర్కార్ ప్రకటించింది. మిగతా డబుల్ బెడ్ రూమ్ ఇళ్లను వీలైనంత త్వరలో పూర్తి చేసి లబ్ధిదారులకు విడతల వారీగా ప్రకటిస్తామని తెలిపింది. ఈరోజు జీహెచ్ఎంసీ పరిధిలోని 24 నియోజకవర్గాల్లో 11,700 డబుల్ బెడ్ రూం ఇళ్లను మంత్రులు వివిధ ప్రాంతాల్లో ప్రారంభించారు. మరో పది రోజుల్లో చిన్న చిన్న మరమ్మతులు ఉంటే వాటిని తక్షణమే సరిదిద్దేందుకు ఆయా ప్రాంతాల్లో ప్రత్యేక అధికారులను కేటాయించామన్నారు. అధికారులే స్వయంగా తాళాలను లబ్ధిదారులకు అందజేస్తారన్నారు. ఇళ్లు రాని వారు ఎలాంటి ఆందోళన చెందవద్దని.. అర్హత ఉన్న అందరికీ విడదల వారీగా ఇండ్లను కేటాయిస్తామని మంత్రులు హామీ ఇచ్చారు.

Double Bedroom Houses Distribution in Hyderabad : గ్రేటర్ హైదరాబాద్​లో డబుల్ బెడ్ రూమ్​ ఇళ్లను (2BHK Distribution in GHMC).. వివిధ ప్రాంతాల్లో మంత్రులు ప్రారంభించారు. ఒక్కొక్క నియోజకవర్గంలో లబ్ధిదారులను ఎంపిక చేసి.. కొంతమంది లబ్ధిదారులకు మంత్రుల సమక్షంలో ఇండ్ల పట్టాలను అందజేశారు. ఆర్థిక శాఖ మంత్రి హరీశ్​రావు, విద్యాశాఖ మంత్రి సబితా ఇంద్రారెడ్డి, సమాచార శాఖ మంత్రి పి.మహేందర్ రెడ్డి, పశు సంవర్ధక శాఖ మంత్రి తలసాని శ్రీనివాస్ ​యాదవ్, కార్మిక శాఖ మంత్రి మల్లారెడ్డి, మేయర్ గద్వాల విజయలక్ష్మి, డిప్యూటీ స్పీకర్ పద్మారావులు.. వివిధ ప్రాంతాల్లో ఎంపిక చేసిన 11,700 రెండు పడక గదుల ఇండ్లను ప్రారంభించారు.

ఇళ్లను లాటరీ ద్వారా కేటాయింపు చేశామని ఎన్​ఐసీ సాంకేతికత సహాయంతో.. ఇండ్ల కేటాయింపులు చేసినట్లు జీహెచ్​ఎంసీ అధికారులు తెలిపారు. కుత్బుల్లాపూర్ నియోజకవర్గంలోని బహదూర్​పల్లిలో జరిగిన.. డబుల్ బెడ్ రూమ్ ఇళ్ల (Double Bedroom Houses in Hyderabad) పంపిణీ కార్యక్రమంలో గాజులరామారం, బహదూర్​పల్లి, డి-పోచంపల్లి ప్రాంతాలకు చెందిన మొత్తం 1,700 గృహాలను మంత్రి తలసాని శ్రీనివాస్ ​యాదవ్ ప్రారంభించారు. ఇందులో గాజుల రామారంలో నిర్మించిన 144 ఇండ్లు.. బహదూర్​పల్లిలో నిర్మించిన 356 గృహాలను.. కుత్బుల్లాపూర్ నియోజకవర్గంలో 500 మందికి పంపిణీ చేస్తారు.

డి-పోచంపల్లిలో నిర్మించిన 1,200 గృహాలు..

• సికింద్రాబాద్ కంటోన్మెంట్ నియోజకవర్గానికి- 200
• సనత్​నగర్ నియోజకవర్గానికి- 500
• కూకట్​పల్లి నియోజకవర్గానికి- 500
• మొత్తం 1700 మంది లబ్ధిదారులకు ఇళ్లను మరో పది రోజల్లో పంపిణీ చేయనున్నారు.

మంఖాల్-1 లోకేషన్​లో నిర్మించిన 2,230 ఇండ్లను.. మంత్రి సబితా ఇంద్రారెడ్డి ప్రారంభించారు. అందులో మంఖాల్-1లో నిర్మించిన 500 ఇళ్లను మహేశ్వరం నియోజకవర్గానికి చెందిన లబ్ధిదారులకు పంపిణీ చేస్తారు.

మాంఖాల్-2 లో నిర్మించిన 1,730 గృహాలను వివిధ నియోజకవర్గాలకు కేటాయించారు.

1. మలక్​పేట నియోజకవర్గానికి- 500
2. చార్మినార్ నియోజకవర్గానికి- 500
3. యాకత్​పురా నియోజకవర్గానికి- 500
4. చాంద్రాయణగుట్ట నియోజకవర్గానికి- 230
5. మొత్తం 1730 మంది లబ్ధిదారులకు మరో పదిరోజుల్లో పంపిణీ చేయనున్నారు.

Double Bed Room Houses Distribution in GHMC : చాంద్రాయణగుట్ట నియోజకవర్గానికి చెందిన.. బండ్లగూడ సర్వే నెం.82, 83/పి లొకేషన్లలోని ఇండ్లను మంత్రి మహమూద్ అలీ ప్రారంభించారు. బహదూర్​పురా నియోజకవర్గం పరిధిలోని ఫారూక్​నగర్ లోకేషన్​లో నిర్మించిన.. 770 గృహాలు ఎంపిక చేసిన లబ్ధిదారులకు పంపిణీ చేయనున్నారు. 270 ఇళ్లను చాంద్రాయణగుట్ట నియోజకవర్గంకు చెందిన వారికి పంపిణీ చేస్తారు. 500 గృహాలను బహదూర్​పురా నియోజకవర్గానికి చెందిన లబ్ధిదారులకు మరో పదిరోజుల్లో పంపిణీ చేస్తారు. రాజేంద్రనగర్ నియోజకవర్గంలోని నార్సింగి, బైరాగి గూడ-2 లోకేషన్లలో నిర్మించిన.. 500 ఇళ్లను మంత్రి పి.మహేందర్ రెడ్డి ప్రారంభించారు.

పటాన్​చెరు నియోజకవర్గంలోని కొల్లూర్-1 లోకేషన్​లో 3,500 గృహాలను మంత్రి హరీశ్​రావు ప్రారంభించారు.

• ఖైరతాబాద్ నియోజకవర్గం- 200
• జూబ్లీహిల్స్- 500,
• శేరిలింగంపల్లి- 500,
• పటాన్​చెరు- 500,
• గోషామహల్- 500,
• నాంపల్లి- 500,
• కార్వాన్- 500,
• ఖైరతాబాద్- 300
• మొత్తం 3,500 గృహాలను లబ్ధిదారులకు పంపిణీ చేస్తారు.

మేడ్చల్ నియోజకవర్గంలోని అహ్మద్​గూడ లోకేషన్​లో.. 1500 గృహాలను మంత్రి మల్లారెడ్డి ప్రారంభించారు. అందులో మల్కాజ్​గిరి-500, ముషీరాబాద్-500, సికింద్రాబాద్​కు-500 మంది లబ్ధిదారులకు అందజేస్తారు. ఉప్పల్ నియోజకవర్గంలోని శ్రీనగర్ కాలనీ లోకేషన్​లో 500 ఇండ్లను.. జీహెచ్ఎంసీ మేయర్ గద్వాల్ విజయలక్ష్మి ప్రారంభించారు. వీటిని ఉప్పల్ నియోజకవర్గానికి చెందిన లబ్ధిదారులకు అందజేయనున్నారు. మేడ్చల్ నియోజకవర్గంలోని ప్రతాప్ సింగారం లోకేషన్​లో 1,000 గృహాలను డిప్యూటీ స్పీకర్ టి.పద్మారావు ప్రారంభించారు. ఎల్బీనగర్ నియోజకవర్గంకు- 500, అంబర్​పేట్ నియోజకవర్గంకు- 500 మంది లబ్ధిదారులకు పంపిణీ చేయనున్నారు.