Congress On MLA Quota MLC Elections in Telangana : రాష్ట్రంలో శాసనసభ సభ్యుల కోటా అభ్యర్ధుల ఎంపిక విషయంలో కాంగ్రెస్ నాయకత్వం ఆచీతూచీ అడుగులు వేస్తోంది. శనివారం రాత్రి పార్టీ అధిష్ఠానంతో చర్చించి, పీసీసీ ఓ నిర్ణయానికి వచ్చినా, ఎంపీ ఎన్నికల్లో పోటీచేసే వారిని దృష్టిలో ఉంచుకుని ఎమ్మెల్సీ అభ్యర్థులను ఎంపిక చేయాలని భావిస్తున్నారు. ఈ నేపథ్యంలోనే ఎమ్మెల్సీ అభ్యర్థుల ఎంపికకు మరింత కసరత్తు చేస్తున్నారు.
పాడి కౌశిక్రెడ్డి, కడియం శ్రీహరిలు ఎమ్మెల్యేలుగా ఎన్నికై రాజీనామా చేయడంతో ఏర్పడిన ఖాళీల భర్తీకి ఎమ్మెల్సీ ఎన్నికలు జరుగనున్నాయి. ఖాళీ అయిన వాటిలో ఒకటి రెడ్డి, మరొకటి ఎస్సీ సామాజిక వర్గానికి చెందినవైనందున, లాభనష్టాలను అంచనా వేసుకుని అభ్యర్థులను ఎంపిక కసరత్తు చేస్తున్నారు. దగ్గరలో పార్లమెంటు ఎన్నికలు ఉండడంతో, ఆ ఎన్నికల్లోనూ లబ్ధి చేకూరేట్లు నిర్ణయం ఉండాలని భావిస్తున్నారు.
ఒకటా? రెండా? - ఎమ్మెల్యే కోటా ఎమ్మెల్సీ ఎన్నికపై గందరగోళం
బీసీ సామాజిక వర్గానికి చెందిన పీసీసీ సంస్థాగత కార్యనిర్వహక అధ్యక్షుడు మహేశ్‌కుమార్‌గౌడ్, ఎస్సీ సామాజిక వర్గానికి చెందిన పీసీసీ ప్రధాన కార్యదర్శి అద్దంకి దయాకర్‌లతో పాటు, సూర్యాపేట టికెట్ ఆశించిన పటేల్‌ రమేష్‌ రెడ్డి, 2018లోనే ఎమ్మెల్సీ హామీ పొందిన ప్రోటోకాల్‌ ఛైర్మన్‌ హర్కర్‌ వేణుగోపాల్‌లు, శాసనమండలి పదవుల ఆశిస్తున్నారు. వీరిలో ఇద్దరిని పక్కనబెట్టి, ఇప్పటికే ఇద్దరికి ఆమోద ముద్ర వేసినట్లు తెలుస్తోంది.
శనివారం అధిష్ఠానం వద్ద జరిగిన చర్చల్లో కేసీ వేణుగోపాల్‌తోపాటు సీఎం రేవంత్‌ రెడ్డి, రాష్ట్ర వ్యవహారాల ఇంఛార్జి దీపాదాస్‌ మున్షీ, కాంగ్రెస్ పార్టీ రాజకీయ వ్యూహకర్త సునీల్‌ కనుగోలు సమక్షంలో తుదినిర్ణయం జరిగినట్లు సమాచారం. సీఎం దావోస్‌ వెళ్లగా, ఇప్పటికే తీసుకున్న నిర్ణయం మేరకు ఇద్దరిని అధిష్ఠానం అధికారికంగా ప్రకటించాల్సి ఉంది. కానీ ఇప్పటివరకు అధికారికంగా ఎలాంటి ప్రకటన వెలువడకపోవటం పార్టీలో చర్చనీయంగా మారింది.
MLC Candidates in Congress : ఎమ్మెల్సీ ఆశావహుల జాబితాలో నలుగురితోపాటు మరో ఇద్దరి నేతల పేర్లు తెరపైకి వచ్చాయి. మహబూబాబాద్‌ ఎమ్మెల్యే టికెట్ ఆశించిన కేంద్ర మాజీ మంత్రి బలరాంనాయక్‌, హుజూరాబాద్‌ టికెట్ ఆశించిన ఎనఎస్యూఐ రాష్ట్ర అధ్యక్షుడు బల్మూరి వెంకట్‌, ఎమ్మెల్సీ పదవి ఆశిస్తున్నట్లు తెలుస్తోంది. సూర్యాపేట టికెట్ పటేల్‌ రమేశ్‌రెడ్డికి ఇవ్వలేకపోయినందున, అయనకు నల్గొండ ఎంపీ టికెట్ ఇస్తామని కాంగ్రెస్ పెద్దలు హామీ ఇచ్చారు. తాజాగా అక్కడి నుంచి పార్టీ సీనియర్‌ నేత జానారెడ్డిని బరిలో దించాలని కాంగ్రెస్ అధిష్ఠానం యోచిస్తున్నట్లు తెలుస్తోంది.
పటేల్‌ రమేశ్‌రెడ్డికి ఎమ్మెల్సీ ఇవ్వడంతో జానారెడ్డి పోటీకి అడ్డులేకుండా చేయాలని భావిస్తోంది. మహబూబాబాద్‌ ఎంపీ అభ్యర్థిగా విజయాబాయిని బరిలోకి దించే అవకాశం ఉండటంతో, టికెట్ ఆశిస్తున్న బలరాంనాయక్‌కు ఎమ్మెల్సీ ఇచ్చే అంశాన్ని పరిశీలిస్తోంది. ఇలా కొత్త పేర్లు తెరపైకి వస్తున్న నేపథ్యంలో లోక్‌సభ ఎన్నికల్లో ప్రయోజనం చేకూరేలా, ఈ 2 ఎమ్మెల్సీల ఎంపిక ఉండేలా కాంగ్రెస్ నాయకత్వం కసరత్తులు చేస్తోంది.
కాంగ్రెస్ పార్టీకే దక్కనున్న రెండు ఎమ్మెల్సీ స్థానాలు - బీఆర్ఎస్కు షాక్ తప్పదా?
వరుసగా మూడ్రోజులు సెలవులు వచ్చినందున, ఇవాళ్టి నుంచి 18వ తేదీ వరకు మూడ్రోజుల వ్యవధిలో ఎమ్మెల్యే కోటా కింద బరిలో దిగాల్సిన అభ్యర్ధులు నామినేషన్లు వేయాల్సి ఉంటుంది. అభ్యర్ధులపై సందిగ్ధత వీటితో పోటీచేసే వారు నామినేషన్లకు ఏర్పాట్లు చేసుకోవాల్సి ఉన్నందున ఇవాళా రేపో ప్రకటించక తప్పదని పార్టీ నేతల్లో చర్చ జరుగుతోంది.
