CM KCR Review on TSPSC Paper leakage Issue: టీఎస్పీఎస్సీ ప్రశ్నాపత్రం లీకేజీపై రాష్ట్రవ్యాప్తంగా నిరసనలు వెల్లువెత్తుడంతో భవిష్యత్‌ కార్యాచరణపై ప్రభుత్వం దృష్టిసారించింది. ఈ క్రమంలో ప్రగతిభవన్‌లో ముఖ్యమంత్రి కేసీఆర్ ఉన్నతస్థాయి సమీక్ష నిర్వహిస్తున్నారు. ఆ సమావేశానికి మంత్రులు కేటీఆర్‌, హరీశ్‌రావుతోపాటు ప్రభుత్వ ప్రధాన కార్యదర్శి శాంతికుమారి, టీఎస్పీఎస్సీ ఛైర్మన్‌ జనార్దన్‌రెడ్డి, కమిషన్‌ సభ్యులు, పలువురు అధికారులు హాజరయ్యారు.
పేపర్ లీకేజీ, పరీక్షల నిర్వహణ, తదుపరి కార్యాచరణపై ఈ సమావేశంలో చర్చిస్తున్నట్లు తెలుస్తోంది. టీఎస్పీఎస్సీ కాన్ఫిడెన్షియల్‌ రూం నుంచి నిందితులు పరీక్షా పేపర్లను కాఫీ చేసుకొని బయటకు తీసుకురావడంతో గ్రుప్‌-1 సహా మొత్తం నాలుగు పరీక్షలు రద్దు చేస్తున్నట్లు ఇప్పటికే టీఎస్పీఎస్సీ ప్రకటించింది. ఈ సందర్భంగా సీఎం కేసీఆర్‌తో ఉన్నతాధికారుల భేటీ ప్రాధాన్యం సంతరించుకుంది. ఈ సమావేశంలో కీలక నిర్ణయాలు తీసుకునే అవకాశం ఉంది. ముఖ్యంగా రద్దు అయిన పరీక్షలను మళ్లీ ఎప్పుడు నిర్వహిస్తారనే అనే అంశంపై చర్చ జరగనున్నట్లు తెలుస్తోంది. ఈ నేపథ్యంలో తదుపరి కార్యాచరణపై రాష్ట్ర ప్రభుత్వం దృష్టిసారించినట్లు తెలుస్తోంది.
పలు కీలక నిర్ణయాలు తీసుకొనే అవకాశం : రాష్ట్రవ్యాప్తంగా ఇప్పటేకే ఈ వ్యవహారంపై ప్రతిపక్షాలు, విద్యార్థి సంఘాలు నుంచి పెద్ద ఎత్తున విమర్శలు వస్తున్నాయి. పరీక్షలను రద్దు చేసినంత మాత్రాన సరిపోదని.. ప్రభుత్వం బాధ్యులపై కఠిన చర్యలు తీసుకోవాలంటూ డిమాండ్‌ చేస్తున్నాయి. అంతేకాకుండా నష్టపోయిన అభ్యర్థులకు న్యాయం చేయాలని కోరుతున్నారు. ఈ నేపథ్యంలో తదుపరి నిర్వహించే పరీక్షల విషయంలో ఎలా వ్యవహరించాలనే అంశంతో పాటు అభ్యర్థులకు భరోసా ఇచ్చేలా, పరీక్షల నిర్వహణ పారదర్శకంగా నిర్వహించే ఎలాంటి చర్యలు తీసుకోవాలనే అంశంపై ఈ ఉన్నతస్థాయి సమావేశంలో పలు కీలక నిర్ణయాలు తీసుకొనే అవకాశం ఉన్నట్టు సమాచారం.
గవర్నర్‌కు ఫిర్యాదు చేసిన బీజేపీ నేతలు : మరోవైపు ఇదే వ్యవహారంపై గవర్నర్‌ తమిళిసై సౌందరరాజన్‌ను బీజేపీ రాష్ట్ర నేతల బృందం కలిసింది. డీకే అరుణ, ఈటల రాజేందర్, బూర నర్సయ్య గౌడ్, మర్రిశశిధర్‌రెడ్డి, రాంచందర్, విఠల్ గవర్నర్‌ను కలిసిన బృందంలో ఉన్నారు. టీఎస్పీఎస్సీ పేపర్ లీకేజీ వ్యవహారంపై గవర్నర్‌కు ఫిర్యాదు చేశారు. ఈ వ్యవహారంపై గవర్నర్‌ ఇప్పటికే నివేదిక కోరారు. సిట్‌ దర్యాప్తు పారదర్శకంగా జరిగేలా చూడాలని తమిళిసైని కోరినట్లు సమాచారం. పేపర్ లికేజీ వల్ల ఇప్పటికే నాలుగు పోటీ పరీక్షల్ని రద్దు చేశారు.
ఇవీ చదవండి:
