Buddha Purnima Celebrations in Hyderabad : 2500 ఏళ్ల క్రితమే శాంతియుత సహ జీవన సూత్రాలు, కార్యాచరణను విశ్వ మానవాళికి అందించిన బుద్ధుడు సంచరించిన నేల మీద జీవిస్తుండటం ప్రతి భారతీయుడు గర్వపడాల్సిన విషయమని ముఖ్యమంత్రి కేసీఆర్ అన్నారు. గౌతమ బుద్ధుని జయంతి, బుద్ధ పూర్ణిమ పురస్కరించుకుని ప్రజలకు శుభాకాంక్షలు తెలిపారు. బుద్ధుని బోధనలు, కార్యాచరణను స్మరించుకున్నారు. సమస్త జీవరాసుల పట్ల ప్రేమ, కరుణ, అహింస, శాంతి, సహనంతో ఉండాలని సూచించారు. ప్రకృతితో కలిసి ఆనందంగా జీవించాలనే మహాబోధి గౌతమ బుద్ధుని జ్జానమార్గం.. నేటి సమాజానికి ఎంతో అవసరమని అన్నారు.
మానవ సమాజం కొనసాగినంత వరకు బుద్ధుని ప్రసంగాలు ఉంటాయి: గౌతముని బోధనలను ఆచరిస్తే మానవ జీవితానికి పరిపూర్ణత సిద్ధిస్తుందని ముఖ్యమంత్రి పేర్కొన్నారు. వర్ణ, లింగ, జాతి తదితర వివక్ష, ద్వేషాలకు వ్యతిరేకంగా, మహోన్నతమైన దార్శనికత, తాత్విక జ్జానంతో బుద్ధ భగవానుడు నాడు బోధించి ఆచరించిన సామాజిక, ఆర్థిక, సాంస్కృతిక సూత్రాలు అజరామరమైనవని కేసీఆర్ అన్నారు. మానవ సమాజం కొనసాగినన్నాల్లూ బుద్దుని బోధనలకు ప్రాసంగికత ఉంటుందని తెలిపారు. తెలంగాణలో బౌద్ధం పరిఢ విల్లడం ప్రజలందరికీ గర్వకారణమని చెప్పారు.
బుద్ధవనం ప్రపంచ పర్యాటకులను ఆకర్షిస్తోంది: తెలంగాణ సామాజిక జీవన సంస్కృతిలోని మూలాలు బౌద్ధంలో ఇమిడి ఉన్నాయని గుర్తు చేశారు. తెలంగాణలో బౌద్ధం గొప్పగా విస్తరించిందనడానికి, కృష్ణా గోదావరి పరీవాహక ప్రాంతాల్లో వేల ఏళ్ల కింద వెలసిన బౌద్ధరామాలు నేటికీ సజీవ సాక్ష్యాలుగా నిలిచాయని సీఎం తెలిపారు. రాష్ట్ర ప్రభుత్వం ప్రతిష్టాత్మకంగా తీసుకుని నాగార్జున సాగర్ దగ్గర అంతర్జాతీయ ప్రమాణాలతో అభివృద్ధి చేసిన ‘బుద్ధవనం’ ప్రస్తుతం ప్రపంచ పర్యాటకులను అధికంగా ఆకర్షిస్తోందని చెప్పారు.
గౌతమ బుద్ధుని ఆశయాలకు కార్యరూపమిస్తున్నాం: తెలంగాణ వ్యాప్తంగా వెలసిల్లిన నాటి బౌద్ధరామాలను పునరుజ్జీవింపజేస్తూ, బుద్ధుని బోధనలను ప్రపంచానికి అందించాలన్న ధృఢ సంకల్పంతో అనుసరిస్తున్న కార్యాచరణ కొనసాగుతుందని సీఎం తెలిపారు. అన్ని రంగాల్లో రాష్ట్ర ప్రజలు సుఖ సంతోషాలతో జీవించేలా పరిపాలన జరుగుతోందని అన్నారు. కుల, మతాలు, వర్ణ, వర్గాలకు అతీతంగా.. సకల జనుల సంక్షేమం, అభివృద్ధి దిశగా పథకాలు కార్యాచరణ అమలు చేస్తూ గౌతమ బుద్ధుని ఆశయాలకు కార్యరూపమిస్తూ రాష్ట్ర ప్రభుత్వం ఘనంగా నివాళులు అర్పిస్తోందని ముఖ్యమంత్రి తెలిపారు.
ఇవీ చదవండి:
