ఖమ్మం పార్లమెంట్ పరిధిలో పోలింగ్ ప్రశాంతంగా ముగిసింది. ఓటర్లు ఉత్సాహంగా ఓటు హక్కు వినియోగించుకున్నారు. కొన్ని ప్రాంతాల్లో గ్రామస్థులు ఓటింగ్ బహిష్కరించారు. మరికొన్ని చోట్ల ఈవీఎంల మొరాయింపుతో పోలింగ్కు ఆటంకం ఏర్పడింది. దివ్యాంగ ఓటర్లకు ఇబ్బందులు లేకుండా అధికారులు ప్రత్యేక ఏర్పాట్లు చేశారు. మావోయిస్టు ప్రాబల్యం ఉన్న కొత్తగూడెం, అశ్వారావుపేటలో పోలింగ్ నాలుగు గంటలకే ముగిసింది. ఎలాంటి అవాంఛనీయ ఘటనలు జరగకుండా పోలీసులు పటిష్ఠ బందోబస్తు ఏర్పాటు చేశారు.
ఓటేసిన ప్రముఖులు
తెరాస అభ్యర్థి నామ నాగేశ్వరరావు ఖమ్మంలోని కవిత మెమోరియల్ డిగ్రీ కళాశాలలో ఓటు హక్కు వినియోగించుకున్నారు. ప్రజాస్వామ్యంలో ఓటు చాలా కీలకమని నామ ఉద్ఘాటించారు. ప్రభుత్వ డిగ్రీ కళాశాలలో కాంగ్రెస్ అభ్యర్థి రేణుకాచౌదరి ఓటు వేశారు. మహిళలంతా తన వెంటే ఉంటారన్న ఆశాభావాన్ని వ్యక్తం చేశారు. పోలింగ్ ఏర్పాట్లపై సంతృప్తి వ్యక్తం చేశారు. సీఎల్పీ నేత మల్లు భట్టి విక్రమార్క ఎస్ఎఫ్ఎస్ పాఠశాలలోని పోలింగ్ కేంద్రంలో తన సతీమణితో కలిసి ఓటింగ్లో పాల్గొన్నారు.
ఈవీఎంల మొరాయింపు
జిల్లా వ్యాప్తంగా కొన్ని చోట్ల ఈవీఎంలు మొరాయించడం వల్ల పోలింగ్కు ఇబ్బందులు ఏర్పడ్డాయి. వైరాలో ఓటింగ్ యంత్రాలు పనిచేయకపోవడం వల్ల చాలా సేపటి వరకు ప్రక్రియ నిలిచిపోయింది. ఏన్కూరులోనూ మెషీన్లలో సాంకేతిక లోపం కారణంగా ప్రజలు ఓటు వేయడానికి వేచి చూడాల్సి వచ్చింది. కొన్ని చోట్ల ఓటర్లు నిరాశగా వెనుదిరిగారు. సత్తుపల్లిలోని కొన్ని కేంద్రాల్లో ఈవీఎంలు సరిగా పని చేయలేదు. అధికారులు వాటి స్థానంలో కొత్తవాటిని అమర్చారు.
పలు చోట్ల ఓటింగ్ బహిష్కరణ
పలు ప్రాంతాల్లో గ్రామస్థులు ఓటింగ్ బహిష్కరించారు. పోడు భూముల సమస్యలు పరిష్కరించాలని కోరుతూ భద్రాద్రి కొత్తగూడెంలోని జూలూరు పాడు, ఏన్కూరు, మూల పోచారం, రంగాపురం, రామ్నగర్ తండాలలో ప్రజలు ఓటింగ్ బహిష్కరించారు. రెవెన్యూ అధికారులు, పోలీసులు వచ్చి నచ్చచెప్పినా.. వినలేదు. అనంతరం స్థానిక ప్రజా ప్రతినిధులు ఎన్నికల తర్వాత సమస్య పరిష్కరిస్తామని హామీ ఇవ్వడం వల్ల ఓటింగ్లో పాల్గొన్నారు.
పాలేరులోని కూసుమంచి మండలం దేవుని తండాలో హైటెన్షన్ విద్యుత్ తీగలు తొలిగించాలని డిమాండ్ చేస్తూ అక్కడి వారు ఓటింగ్ బహిష్కరిస్తున్నట్లుగా.. ఫ్లెక్సీ ఏర్పాటు చేశారు.
డబ్బిస్తే ఓటేస్తాం...
జిల్లాలోని లక్ష్మీదేవి పల్లి మండలం ఎదురుగడ్డ ప్రాంతంలో కొంతమంది తమకు డబ్బు ఇవ్వలేదని ఓటు వేయలేదు. గ్రామంలో కొందరికి మాత్రమే డబ్బు పంచి.. తమను పట్టించుకోలేదని ఆరోపించారు. డబ్బు ఇస్తేనే ఓటేస్తామని పోలింగ్ కేంద్రం వద్దకు వచ్చి నిరసన తెలిపారు.
చిన్న చిన్న సంఘటనలు మినహా ఖమ్మం జిల్లా వ్యాప్తంగా ఓటింగ్ ప్రశాంతంగా ముగిసింది. పార్టీ అభ్యర్థుల భవితవ్యాన్ని ఓటరు దేవుళ్లు ఈవీఎంలలో నిక్షిప్తం చేశారు. ఎవరిది గెలుపో తెలియాలంటే మే 23 వరకూ వేచి చూడాల్సిందే.
ఇదీ చదవండి : ప్రశాంతంగా 'సార్వత్రిక' పోలింగ్...
