Congress Protest Against BRS Comments : రాష్ట్రంలో ఉచిత విద్యుత్‌పై బీఆర్ఎస్-కాంగ్రెస్ మధ్య మాటల యుద్ధంతో రాజకీయ వేడి రగులుకుంది. విద్యుత్‌పై పీసీసీ అధ్యక్షుడు రేవంత్‌రెడ్డి వాఖ్యలను... బీఆర్ఎస్ నేతలు వక్రీకరించారంటూ జిల్లాల్లో కాంగ్రెస్ శ్రేణులు ఆందోళనకు దిగాయి. రాష్ట్రంలో ఎక్కడా 24 గంటలు... వ్యవసాయానికి ఉచిత్‌ విద్యుత్ సరఫరా లేదంటూ పార్టీ శ్రేణులు ఎదురుదాడికి దిగాయి.
Free Current Controversy in Telangana : పీసీసీ పిలుపు మేరకు ఆదిలాబాద్‌ పట్టణంలోని విద్యుత్తు ఎస్ఈ కార్యాలయం ఎదుట కాంగ్రెస్ శ్రేణులు నిరసనకు దిగాయి. సీఎం కేసీఆర్‌ ప్లెక్సీని... దహనం చేసేందుకు యత్నించారు. కాంగ్రెస్ నేతలను పోలీసులు అడ్డుకోగా.... ఇరువర్గాల మధ్యతోపులాట చోటు చేసుకుంది. హనుమకొండ జిల్లా ఆత్మకూరులో కాంగ్రెస్ శ్రేణులు ఆందోళనకు దిగారు. నాణ్యమైన విద్యుత్ 8 గంటలు ఇస్తే సరిపోతుందని రేవంత్‌ అన్నారే తప్ప... 24 గంటల ఉచిత విద్యుత్కి వ్యతిరేకం కాదని పేర్కొన్నారు. ఓటమి భయంతోనే బీఆర్ఎస్ ధర్నాలకు దిగుతోందని విమర్శించారు.
ఉచిత కరెంటును తీసుకువచ్చిందే కాంగ్రెస్ : నిజామాబాద్‌ జిల్లా సాలూరలో.... హస్తం పార్టీ శ్రేణులు ఆందోళన నిర్వహించాయి. 24 గంటల కరెంట్‌ అంటూ బీఆర్ఎస్ సర్కారు ప్రజలు మోసం చేస్తోందని విమర్శించారు. రైతులకి ప్రభుత్వం చేస్తున్న మోసాలను ప్రజలు తెలుసుకున్నందువల్లే బీఆర్ఎస్ నేతలు రోడ్లపైకి వచ్చి ధర్నాలు చేస్తున్నారని ఆరోపించారు. ఉచిత కరెంటును తీసుకువచ్చిందే కాంగ్రెస్ ప్రభుత్వమని... ప్రజల్లో తమ పార్టీకి పెరిగిన ఆదరణను బీఆర్ఎస్ భరించలేక ఇలాంటి దుష్ప్రచారం చేస్తున్నారని కాంగ్రెస్ నాయకులు ఆగ్రహం వ్యక్తం చేశారు. రైతులకు ఇచ్చిన హామీలను మరిచిన బీఆర్ఎస్ సర్కార్‌... ప్రజలను పక్కదోవ పట్టించేందుకు యత్నిస్తోందన్నారు.
పోటాపోటీ నిరసనలు... భారీగా పోలీసుల మోహరింపు : సిద్దిపేట జిల్లా గజ్వేల్‌లో బీఆర్ఎస్, కాంగ్రెస్ పోటాపోటీ నిరసనలకు దిగాయి. ఒకవైపు ఉచిత విద్యుత్‌పై రేవంత్‌ వ్యాఖ్యలకు నిరసనగా బీఆర్ఎస్ ఆందోళన చేపట్టగా.. మరోవైపు సత్యాగ్రహ దీక్షలో భాగంగా కాంగ్రెస్ శ్రేణులు నిరసనకు దిగారు. ఈ క్రమంలో రెండు పార్టీలు ఒకేచోట కార్యక్రమం చేపట్టడంతో ఉద్రిక్త వాతావరణం నెలకొంది. రెండు పార్టీల కార్యకర్తలు పోటాపోటీ నినాదాలు చేసుకున్నారు. ఎలాంటి గొడవలు చోటుచేసుకోకుండా గజ్వేల్‌లో పోలీసులు భారీగా మోహరించారు.
మరోవైపు కాంగ్రెస్ అగ్రనేత రాహుల్‌గాంధీపై మోదీ సర్కారు రాజకీయంగా కక్షకట్టిందని ఆ పార్టీ నేతలు ఆందోళన నిర్వహిస్తున్నారు. కేంద్ర ప్రభుత్వ తీరును నిరసిస్తూ దేశంలోని ప్రధాన నగరాల్లో హస్తం పార్టీ శ్రేణుల ధర్నా చేపట్టారు. అందులో భాగంగా పీసీసీ అధ్యర్యంలో గాంధీ భవన్‌లో సత్యాగ్రహ మౌనదీక్ష నిర్వహిస్తున్నారు. ఆ కార్యక్రమానికి కోమటిరెడ్డి వెంకట్రెడ్డి, మహేశ్ కుమార్ గౌడ్, పొన్నాల లక్ష్మయ్య, మల్లు రవి, పొన్నం ప్రభాకర్, సిరిసిల్ల రాజయ్య, కోదండరెడ్డి సహా పలువురు సీనియర్‌ నేతలు హాజరయ్యారు. ఈ సందర్భంగా మాట్లాడిన కాంగ్రెస్ నాయకులు బీఆర్ఎస్, బీజేపీలపై తీవ్ర ఆరోపణలు గుప్పించారు.
ఇవీ చదవండి :
