ఆస్ట్రేలియన్ ఓపెన్ కోసం సిద్ధమవుతోన్న ఆస్ట్రియా కుర్రాడు డొమినిక్ థీమ్ రొలాండ్ గారోస్(ఫెంచ్ ఓపెన్) టైటిల్ను సొంతం చేసుకోవడమే తన తదుపరి పెద్ద లక్ష్యమని అన్నాడు. ఈ టోర్నీలో గెలిచితీరుతానని ధీమా వ్యక్తం చేశాడు.
2018, 19 టోర్నీల్లో ఫైనల్కు చేరి రఫెల్ నాదల్ చేతిలో ఓడాడీ ఆస్ట్రియా ఆటగాడు.
"2020.. క్రీడా ప్రపంచంలో ఓ సంచలనాత్మకం. నా కెరీర్లో గ్రాండ్స్లామ్ గెలిచిన క్షణాలు ఎంతో ఉత్తమమైనవి. నేను దాన్ని మళ్ళీ సాధించాలనుకుంటున్నాను. నా తదుపరి పెద్ద లక్ష్యం 'ఫ్రెంచ్ ఓపెన్' టైటిల్ను అందుకోవడమే. చిన్నప్పటి నుంచి ఇదే నా ఫేవరేట్ టోర్నీ."
-డొమినిక్ థీమ్, ఆస్ట్రియా
ఆస్ట్రేలియన్ ఓపెన్ కోసం అక్కడికి చేరుకున్న ఆటగాళ్లు, సహా సహాయక సిబ్బందిలో కొంతమందికి కరోనా సోకింది. దీంతో దాదాపు 72మంది ఆటగాళ్లను కఠిన క్వారంటైన్లో ఉంచారు. అయితే కరోనా సోకిన వారికి సన్నిహితంగా ఉండి కూడా నెగెటివ్ వచ్చిన వారికి మాత్రం కనీసం ప్రాక్టీసు చేయడానికి కూడా వీల్లేదని ఆదేశించారు టోర్నీ నిర్వాహకులు. ముప్పు తక్కువగా ఉన్న మిగతా ఆటగాళ్లకు నిబంధనల్లో కొన్ని సవరణలు చేసి శిక్షణ చేయడానికి కొన్ని గంటల సమయాన్ని కేటాయించారు.
దీని గురించి మాట్లాడిన థీమ్.. "ఇదీ ఎంతో దురదృష్టకరమనే చెప్పాలి. ఆటగాళ్లపై భారీగా ప్రభావం చూపుతుంది. ఇంకా కనీసం తొమ్మిది రోజుల పాటు వారు నిర్బంధంలో ఉండాలి. ఏదేమైనప్పటికీ కరోనా పరిస్థితిల్లోనూ ఈ టోర్నీ జరుగుతుందని భావిస్తున్నాను." అని అన్నాడు. ఫిబ్రవరి 8వ తేదీ నుంచి ఆస్ట్రేలియన్ ఓపెన్ జరగనుంది.
2011లో కెరీర్ ప్రారంభించిన థీమ్.. గతేడాది యూఎస్ ఓపెన్లో గెలిచి తొలి టైటిల్ను దక్కించుకున్నాడు.
ఇదీ చూడండి: తొలి గ్రాండ్స్లామ్ టైటిల్ కోసం థీమ్కు తొమ్మిదేళ్లు
