ఈ ఏడాది టోక్యో ఒలింపిక్స్కు భారత మహిళల 4x100మీ. రిలే జట్టు అర్హత సాధిస్తుందని ఆ బృందంలో ఒకరైన స్టార్ స్ప్రింటర్ హిమదాస్ ఆశాభావం వ్యక్తం చేసింది. వచ్చే నెలలో పొలెండ్లో జరిగే ప్రపంచ అథ్లెటిక్స్ రిలేలో రాణించి టోక్యో బెర్త్ సాధిస్తామని చెప్పింది. వచ్చే నెల 1న ఆరంభమయ్యే ఆ పోటీల్లో తొలి ఎనిమిది స్థానాల్లో నిలిచే జట్లు ఒలింపిక్స్కు అర్హత సాధిస్తాయి. భారత మహిళల 4x100మీ. రిలే జట్టులో హిమతో పాటు ద్యుతిచంద్, అర్చన, ధనలక్ష్మీ, హిమశ్రీ, ధనేశ్వరి ఉన్నారు.
"ద్యుతి కూడా జట్టులో ఉంది. ప్రపంచ రిలే ఛాంపియన్షిప్ లో మెరుగైన ప్రదర్శనతో ఒలింపిక్స్కు అర్హత సాధిస్తామనే నమ్మకంతో ఉన్నా. మేం అది సాధించాలి. నేను మంచి లయతో ఉన్నా. మిగతా అథ్లెట్లు కూడా మంచిగా సన్నద్ధమవుతున్నారు. ఫెడరేషన్ కప్లో వ్యక్తిగతంగా మేం రాణించాం" అని ఆమె చెప్పింది. శిక్షణ కోసం టర్కీ వెళ్లనున్న తను.. అక్కడ 100మీ, 200మీ. పరుగుపైనే పూర్తి దృష్టి పెడతానని చెప్పింది.
ఇదీ చదవండి: ఛేదనలో తేలిపోయిన రాజస్థాన్.. చెన్నైదే గెలుపు
400మీ. పరుగులో ప్రపంచ జూనియర్ ఛాంపియన్గా నిలవడమే కాకుండా 2018 ఆసియా క్రీడల్లో రజతం గెలిచిన ఆమె ఆ తర్వాత వెన్నెముక గాయం కారణంగా ఆ విభాగంలో పోటీపడట్లేదు. "టర్కీలో శిక్షణలో భాగంగా 100మీ, 200మీ. పరుగులోనే సాధన చేస్తా. ఒలింపిక్స్ అర్హత టోర్నీల్లో పాల్గొంటా. 400 మీటర్ల పరుగులో పోటీపడే అంశం నా చేతుల్లో లేదు" అని ఆమె పేర్కొంది.
ఇదీ చదవండి: దిల్లీ X ముంబయి: మూడో గెలుపు ఎవరిదో?
