టోక్యో ఒలింపిక్స్కు మరో మూడు రోజుల సమయం మాత్రమే ఉంది. ప్రతిష్టాత్మక ఈ ఈవెంట్కు సంబంధించి ఏర్పాట్లన్నీ దాదాపు పూర్తి చేశారు నిర్వాహకులు. ఈ నేపథ్యంలో 1952, 1956, 1960 విశ్వక్రీడలకు సంబంధించిన విశేషాలు, ఆసక్తికర విషయాలు మీకోసం..
హెల్సింకీ ఒలింపిక్స్-1952
- తొలిసారిగా ఇజ్రాయెల్ హెల్సింకీ ఒలింపిక్స్లో పాల్గొంది.
- 1912 తర్వాత సోవియట్ యూనియన్ తిరిగి ఈ విశ్వ క్రీడల్లోకి ప్రవేశించింది.
- తూర్పు బ్లాక్ దేశాలకు వ్యతిరేకంగా సోవియట్ యూనియన్ ఒలింపిక్ క్రీడా గ్రామాన్ని ఏర్పాటు చేసింది. దీంతో ప్రచ్ఛన యుద్ధం ప్రభావం క్రీడలపై పరోక్షంగా కనిపించింది.
- సోవియట్ యూనియన్ విచ్ఛిన్నమయ్యే వరకు యూఎస్ఎస్ఆర్ మహిళ జిమ్నాస్ట్లు 40 ఏళ్ల పాటు ఆధిపత్యాన్ని ప్రదర్శించారు.
- హెల్సింకీ క్రీడల్లో జర్మనీ, జపాన్ దేశాలు తిరిగి ప్రవేశించాయి. జర్మనీ రెండు ప్రాంతాలుగా విడిపోయి ఈ క్రీడల్లో పాల్గొనాలనుకుంది. ఇందుకోసం తూర్పు జర్మనీ దరఖాస్తు చేసుకోగా.. అది తిరస్కరణకు గురైంది. పశ్చిమ జర్మనీ ఆటగాళ్లతోనే ఆ దేశం ఒలింపిక్స్లో పాల్గొంది.
- చెక్ రిపబ్లిక్కు చెందిన అథ్లెట్ ఎమిల్ జటోపెక్ ఈ ఒలింపిక్స్లో మూడు స్వర్ణాలు కైవసం చేసుకుంది. 5000 మీ., 10000 మీ. పోటీల్లో టైటిల్ను నిలబెట్టుకుంది.
- వ్యక్తిగత ఈక్వెస్ట్రియన్ డ్రెస్సెజ్ పోటీలో డెన్మార్క్ క్రీడాకారిణి లిస్ హర్టెల్ రజత పతకం గెలుచుకుంది.
ఇదీ చదవండి: Olympics: ఒలింపిక్స్ కోసం ఇరుకు గదుల్లోనే బస!
మెల్బోర్న్ ఒలింపిక్స్-1956
- ఒలింపిక్స్కు ఆతిథ్యమిచ్చే అవకాశాన్ని ఒక్క ఓటు తేడాతో గెలుచుకుంది మెల్బోర్న్.
- దక్షిణార్ధ గోళంలో ఈ మెగా ఈవెంట్ జరగడం ఇదే మొదటి సారి. అది కూడా నవంబర్- డిసెంబర్లో నిర్వహించడం తొలిసారి.
- ఈ ఒలింపిక్స్లో భాగంగా జరగాల్సిన గుర్రపు పోటీలు ఆస్ట్రేలియాలో జరగలేదు. అక్కడ విధించిన కఠిన నిర్బంధ నియమాలే ఇందుకు కారణం. దీంతో ఒలింపిక్స్కు ఐదు నెలల ముందే మెల్బోర్న్కు 9,700 మైళ్ల దూరంలో ఉన్న స్టాక్హోం వేదికగా ఈ పోటీలు జరిగాయి.
- సినాయ్ ద్వీపకల్పంలో ఇజ్రాయెల్ దండయాత్ర నిర్వహించినందుకు నిరసనగా ఈజిప్టు, లెబనాన్, ఇరాక్.. మెల్బోర్న్ ఒలింపిక్స్ను బాయ్కాట్ చేశాయి.
- హంగేరీపై సోవియట్ దండయాత్రకు నిరసనగా స్పెయిన్, నెదర్లాండ్స్, స్విట్జర్లాండ్ వంటి పాశ్చాత్య దేశాలు ఈ మెగా క్రీడల నుంచి తప్పుకున్నాయి.
- రిపబ్లిక్ ఆఫ్ చైనా(తైవాన్) ఈ క్రీడల్లో పాల్గొన్న కారణంగా పీపుల్స్ రిపబ్లిక్ ఆఫ్ చైనా ఈ ఆటలను తిరస్కరించింది.
- తూర్పు, పశ్చిమ జర్మనీ దేశాలు ఒకే జట్టుగా పోటీలోకి దిగాయి.
- ఈ మెల్బోర్న్ ఒలింపిక్స్లో యూఎస్ బాస్కెట్బాల్ జట్టు ప్రత్యర్థి జట్లపై పూర్తి ఆధిపత్యాన్ని ప్రదర్శించింది.
- దేశాల అక్షర క్రమంలో కాకుండా అథ్లెట్లు అందరూ కలిసి ముగింపు కార్యక్రమంలో పాల్గొన్నారు. ఇది ప్రపంచ ఐక్యతకు చిహ్నంగా భావించారు నిర్వాహకులు.
రోమ్ ఒలింపిక్స్-1960
- 1906లో అర్ధంతరంగా ఆతిథ్య హక్కులను వదులుకున్న రోమ్కు.. తిరిగి 1960లో క్రీడలను నిర్వహించే అవకాశం లభించింది.
- ప్రారంభ, ముగింపు వేడుకలు నిర్వహించడానికి ఒలింపిక్ స్టేడియాన్ని నిర్మించారు. దీంతో పాటు ట్రాక్ అండ్ ఫీల్డ్, స్పోర్ట్స్ ప్యాలెస్ కట్టారు నిర్వాహకులు. అనేక పురాతన ప్రదేశాలను క్రీడా వేదికలుగా పునరుద్ధరించారు.
- ఒలింపిక్స్ చరిత్రలో తొలిసారిగా నల్లజాతి ఆఫ్రికా అథ్లెట్ అబేబే బికిలా.. మారథాన్ ఛాంపియన్గా నిలిచాడు. కనీసం కాళ్లకు చెప్పులు లేకుండా పరుగెత్తి రికార్డు సృష్టించాడు.
- అమెరికా ప్రొఫెషనల్ బాక్సర్ మహ్మద్ అలీ లైట్-హెవీవెయిట్ విభాగంలో గోల్డ్ మెడల్ కైవసం చేసుకున్నాడు.
- స్పైరోస్ సమరస్ స్వరపరిచిన గీతాన్ని ఒలింపిక్ గీతంగా స్వీకరించాలని ఐఓసీ నిర్ణయించింది. 1960 విశ్వక్రీడల్లో తొలి సారిగా ఈ సాంగ్ను వినిపించారు.
- ఈ ఒలింపిక్స్ 18 ఐరోపా దేశాలలో ప్రత్యక్ష ప్రసారం చేశారు. కొన్ని గంటల తేడాతో అమెరికా, కెనడా, జపాన్లోనూ వీక్షించారు అభిమానులు.
ఇదీ చదవండి: Olympics: మ్యాచ్లు ఓడినా.. పతకం గెలిచిన అమెరికా!
