మిల్కా సింగ్ అంత్యక్రియలు పూర్తి

ప్రముఖ అథ్లెట్​ మిల్కా సింగ్ అంత్యక్రియలు చండీగఢ్​లోని మట్కా చౌక్​ శ్మశాన వాటికలో జరిగాయి. ఈ కార్యక్రమంలో కేంద్ర మంత్రి కిరెన్​ రిజిజుతో పాటు హరియాణా క్రీడా మంత్రి సందీప్ సింగ్, చండీగఢ్ అడ్మినిస్ట్రేటర్​ వీపీ సింగ్ బద్నోర్ పాల్గొన్నారు.

భారత దిగ్గజ స్ప్రింటర్​ మిల్కా సింగ్ అంత్యక్రియలు చండీగఢ్​లోని మట్కా చౌక్ శ్మశాన వాటికలో జరిగాయి. ఆయన అంతిమయాత్రలో కేంద్ర క్రీడా మంత్రి కిరెన్ రిజిజు, పంజాబ్​ గవర్నర్​, చండీగఢ్​ అడ్మినిస్ట్రేటర్​ వీపీ సింగ్ బద్నోర్, హరియాణా క్రీడా మంత్రి సందీప్ సింగ్ పాల్గొన్నారు.

మిల్కా సింగ్ అంత్యక్రియల్లో కేంద్ర మంత్రి కిరెన్​ రిజిజు

మిల్కా సింగ్ అంత్యక్రియలు

మిల్కా సింగ్ అంత్యక్రియలు

గత రెండు నెలలుగా కొవిడ్​తో బాధపడుతున్న మిల్కా సింగ్ ఇటీవల మహమ్మారి నుంచి కోలుకున్నారు. నిన్న రాత్రి ఒక్కసారిగా తీవ్ర జ్వరంతో పాటు ఆక్సిజన్​ స్థాయిలు పడిపోయాయి. దీంతో గత రాత్రి 11.30 సమయంలో ఆయన తుది శ్వాస విడిచారు. కరోనా బాధపడుతూ ఆయన భార్య నిర్మలా కౌర్​ గత ఆదివారం కన్నుమూశారు.

స్పోర్ట్స్​ యూనివర్సిటీకి మిల్కా సింగ్ పేరు..

పాటియాలాలోని క్రీడా విశ్వవిద్యాలయానికి దివంగత స్ప్రింటర్​ మిల్కా సింగ్ పెట్టనున్నట్లు పంజాబ్​ ముఖ్యమంత్రి అమరీందర్​ సింగ్ వెల్లడించారు. అంతకుముందు సీఎం.. రాష్ట్ర క్రీడా మంత్రి రానా గుర్మిత్​ సింగ్ సోధీతో కలిసి మిల్కా సింగ్​కు పార్థివ దేహానికి నివాళులు అర్పించారు. ఆయన కుటుంబానికి ప్రగాఢ సంతాపాన్ని ప్రకటించారు.

ఘనతలు..

• 1929 నవంబరు 20న పంజాబ్​లోని గోవిందపురా(ప్రస్తుతం పాకిస్థాన్​లో ఉంది)లో జన్మించారు మిల్కా సింగ్. టీనేజీలో పాకిస్థాన్ నుంచి వలసవచ్చిన మిల్కా.. శరణార్థుల శిబిరంలో తలదాచుకున్నారు. అనంతరం భారత సైనిక దళంలో చేరి.. ఫీల్డ్ అండ్ ట్రాక్ ఈవెంట్​లో తానేంటో నిరూపించుకున్నారు.
• 1958 ఆసియా క్రీడల్లో పాల్గొని 200 మీటర్ల విభాగంలో స్వర్ణం నెగ్గారు. ప్రపంచవ్యాప్తంగా గుర్తింపు తెచ్చుకున్నారు. అంతకుముందే 400 మీటర్ల విభాగంలో జాతీయ రికార్డు నమోదు చేసిన ఆయన.. 1956 విశ్వక్రీడలకు అర్హత సాధించారు. అయితే ఈ పోటీల్లో అంతగా ఆకట్టుకోలేకపోయారు. అనంతరం 1958లో జరిగిన ఆసియా, కామన్వెల్త్ క్రీడల్లో స్వర్ణాలు నెగ్గి ప్రపంచ వేదికపై భారత్​ జెండాను ఎగురవేశారు.​
• 1960 రోమ్ ఒలింపిక్స్​లో నాలుగో స్థానంలో నిలిచి త్రుటిలో పతకం చేజార్చుకున్నారు. 1962 జకార్తా ఆసియా క్రీడల్లో మళ్లీ సత్తాచాటారు. 400మీటర్లు, 4X400 మీటర్ల రిలేలో పసిడి పతకాలు కైవసం చేసుకున్నారు. క్రీడల్లో మిల్కా సింగ్ కృషికిగాను 1959లో భారత ప్రభుత్వం.. పద్మశ్రీ పురస్కారంతో గౌరవించింది.
• 400 మీటర్ల రేసులో మిల్కా సింగ్ ప్రపంచ రికార్డు నెలకొల్పారు. అప్పటివరకున్న 45.9 సెకన్ల రికార్డు బ్రేక్ చేస్తూ, కొత్త టైమింగ్​ను(45.8 )నెలకొల్పారు. జాతీయ స్థాయిలో ఈ రికార్డును 2006 వరకు ఎవరూ బ్రేక్ చేయలేకపోవడం విశేషం.​
• మిల్కాసింగ్ జీవితం ఆధారంగా బాలీవుడ్​లో 'భాగ్ మిల్కా భాగ్' చిత్రాన్ని రూపొందించారు. 2013లో విడుదలైందీ సినిమా. ఇందులో ఫర్హాన్ అక్తర్.. మిల్కా పాత్ర పోషించారు. ఇందులోని పాత్రకుగాను ఫిల్మ్​ఫేర్ ఉత్తమ నటుడిగా నిలిచాడు ఫర్హాన్. పలు అవార్డులనూ అందుకుందీ చిత్రం.

ఇదీ చదవండి: కరోనాతో మిల్కాసింగ్ భార్య నిర్మలా కౌర్​ మృతి