టీ20 ప్రపంచకప్లో (T20 World Cup) టీమ్ఇండియా మెంటార్గా ఎంఎస్ ధోనీని నియమించాల్సిన అవసరం ఏముందని మాజీ క్రికెటర్ అజయ్ జడేజా ప్రశ్నించాడు. కెప్టెన్ విరాట్ కోహ్లీ, కోచ్ రవిశాస్త్రి నేతృత్వంలో టీమ్ఇండియా అద్భుత ప్రదర్శన చేస్తుంటే మెంటార్ అవసరమే లేదని అభిప్రాయపడ్డాడు.
"మెంటార్గా ధోనీని నియమించడం వెనుక ఉద్దేశం ఏంటో అర్థం కావడంలేదు. నేను ధోని గురించి.. ఆటపై అతడికి ఉన్న అవగాహన, జట్టుకు అతడు ఎలా ఉపయోగపడతాడు.. లాంటి విషయాల గురించి మాట్లాడటం లేదు. కెప్టెన్గా వైదొలగడానికి ముందే విరాట్ కోహ్లీకి అతడు మెంటార్గా ఉన్నాడు. ధోనీకి నాకన్న పెద్ద ఫ్యాన్ లేడు. వీడ్కోలుకు ముందే కెప్టెన్ను తయారు చేసిన తొలి సారథి మహీ. కానీ, ఈ నిర్ణయం నాకు ఆశ్చర్యకరంగా ఉంది"
- అజయ్ జడేజా, టీమ్ఇండియా మాజీ క్రికెటర్
టీ20 వరల్డ్కప్ కోసం 15 మందితో కూడిన జట్టును ప్రకటించారు సెలక్టర్లు. ఈ సందర్భంగా టోర్నీలో మెంటార్గా వ్యవహరించేందుకు మాజీ సారథి ధోనీ అంగీకరించినట్లు బీసీసీఐ కార్యదర్శి జై షా తెలిపారు.
రాత్రికి రాత్రే ఏం జరిగింది?
విరాట్ కోహ్లీ, రవిశాస్త్రి నేతృత్వంలో టీమ్ఇండియా బాగా ఆడుతోందని, కాబట్టి మెంటార్ అవసరం లేదని జడేజా అన్నాడు. "మీరు తయారు చేసి వదిలి వెళ్లిన ఆటగాడు జట్టును మరోస్థాయికి తీసుకెళ్తే, జట్టును నెం.1 స్థానానికి తీసుకెళ్లిన కోచ్ ఉన్న తర్వాత మెంటార్ అవసరం ఏముంది" అని అడిగాడు.
కోహ్లీపై ఒత్తిడి తగ్గించేందుకు!
"భారత క్రికెట్ భిన్నంగా పనిచేస్తుంది. ధోనీ స్పిన్నర్లను ఎక్కువగా ఆడిస్తే.. ఇంగ్లాండ్లో కోహ్లీ నలుగురు పేసర్లను తీసుకున్నాడు. ఒకరు ఒకలా ఆలోచిస్తే, ఇంకొకరు మరోలా ఆలోచిస్తారు. ఈ రెండు ఆలోచనల కలయిక కోసమే ఈ నిర్ణయం తీసుకున్నారేమో. తన తొలి ఐసీసీ ట్రోఫీ కోసం ప్రయత్నిస్తున్న కోహ్లీపై ఒత్తిడి తగ్గించేందుకు బీసీసీఐ ధోనిని నియమించి ఉండొచ్చు. కోహ్లీ తన అత్యుత్తమ ఫామ్లో లేనందు వల్ల ఈ నిర్ణయంతో అతడికి బ్యాటింగ్పై ఫోకస్ చేయడానికి వీలు కలుగుతుంది." అని జడేజా అన్నాడు.
ఇదీ చూడండి: T20 Worldcup: 'ప్రపంచకప్లో అఫ్గాన్ ఆడటం కుదరదు'
