నిరవధిక వాయిదా పడిన ఐపీఎల్ను యుఏఈలో సెప్టెంబరులో నిర్వహించేందుకు బీసీసీఐ ప్రణాళికలు రచిస్తోందని జోరుగా ప్రచారం సాగుతోంది. ఈ నేపథ్యంలో దీనిపై స్పందించిన ఇంగ్లాండ్ మాజీ సారథి కెవిన్ పీటర్సన్.. ఈ సీజన్లోని మిగిలిన మ్యాచ్ల్ని యూకేలో జరపాలని అన్నాడు.
ప్రపంచటెస్టు ఛాంపియన్షిప్(జూన్ 18-22) సహా ఇంగ్లాండ్తో టెస్టు సిరీస్(ఆగస్టు 4-సెప్టెంబరు 14) ఆడేందుకు టీమ్ఇండియా, ఇంగ్లాండ్ పర్యటనకు వెళ్లనుంది. అది పూర్తవ్వగానే అక్టోబరు-నవంబరులో భారత్ వేదికగా టీ20 ప్రపంచకప్ జరగనుంది. ఈ రెండింటి మధ్యలోనే ఐపీఎల్ రెండో దశ నిర్వహించాలని యోచిస్తోంది బీసీసీఐ. కాబట్టి మెగాలీగ్ను తమ వద్ద నిర్వహించడం వల్ల ఇంగ్లాండ్, భారత్ ఆటగాళ్లు టెస్టు సిరీస్ పూర్తవ్వగానే ఎటూ ప్రయాణించకుండా అక్కడే ఆడొచ్చనే ఆలోచనతో అన్నాడు పీటర్సన్.
"సెప్టెంబరులో ఇంగ్లాండ్-భారత్ టెస్టు సిరీస్ పూర్తవ్వగానే ఇరు జట్ల ఉత్తమ ఆటగాళ్లు అక్కడే అందుబాటులో ఉంటారు. కాబట్టి యూకేలోనే ఐపీఎల్ నిర్వహించడం మంచిదని నా అభిప్రాయం."
-పీటర్సన్, ఇంగ్లాండ్ మాజీ సారథి.
అంతకుముందు మిగిలిన ఐపీఎల్ మ్యాచ్‌లు నిర్వహించేందుకు ఇంగ్లాండ్‌లోని నాలుగు కౌంటీ క్రికెట్‌ క్లబ్‌లు ఆసక్తి చూపాయి. లార్డ్స్‌, ఓవల్‌, ఎడ్బాస్టన్‌, ఓల్డ్‌ ట్రాఫోర్డ్‌ మైదానాల్లో ఆయా మ్యాచ్‌లు నిర్వహించాలని మిడిల్‌సక్స్‌, సర్రే, వార్క్‌షైర్‌, లాంకషైర్‌ క్లబ్‌లు.. తమ ఆసక్తిని ఇంగ్లాండ్ బోర్డుకు తెలియజేశాయి. ఈ విషయాన్ని బీసీసీఐతో చర్చించాలని కోరాయి.
ఇదీ చూడండి: ఐపీఎల్ ఆతిథ్యానికి ఇంగ్లీష్ కౌంటీలు ఆసక్తి
