ప్రస్తుతం దేశంలో కరోనా కొత్త వేరియెంట్ ఒమిక్రాన్ చాపకింద నీరులా వ్యాపిస్తోంది. పలు రాష్ట్రాల్లో పదుల సంఖ్యలో కొత్త కేసులు వెలుగుచూస్తున్నాయి. ఈ క్రమంలోనే బీసీసీఐ అప్రమత్తమైంది. ఐపీఎల్ కొత్త సీజన్ ప్రారంభమయ్యే సమయానికి పరిస్థితులు ఇలానే కొనసాగితే ఏం చేయాలనేది ఆలోచిస్తుంది. ఇందులో భాగంగా ప్లాన్-బి కూడా సిద్ధం చేస్తున్నట్లు తెలుస్తోంది. వచ్చే నెలలో జట్ల యాజమాన్యాలతో జరిగే సమావేశంలో దీనిపై చర్చించనున్నట్లు సమాచారం.
ఇంతకీ ఏంటీ ప్లాన్-బీ?
గత రెండు ఐపీఎల్ సీజన్లు యూఏఈలోనే జరిగాయి(2021లో తొలి అర్ధభాగం మినహా). అది కూడా ఓ సీజన్ ప్రేక్షకుల్లేకుండా మరోసారి కొంతమంది సమక్షంలో మ్యాచ్లు నిర్వహించారు. దీంతో తర్వాతి సీజన్ ఎలా అయినా సరే స్వదేశంలో జరపాలని భారత క్రికెట్ బోర్డు భావిస్తోంది.
షెడ్యూల్ ప్రకారం 2022 ఏప్రిల్ 2న చెన్నైలో తొలి మ్యాచ్ జరగాలి. కరోనా ప్రభావం ఏ మాత్రం ఎక్కువైనా సరే బీసీసీఐ ప్రత్యామ్నయం ఆలోచించాల్సిందే. అయితే గతంలో చేసినట్లు యూఏఈలో మాత్రం టోర్నీని నిర్వహించకపోవచ్చు.
ఒకవేళ ఏమైనా పరిస్థితి చేయిదాటితే ముంబయి, పుణె, అహ్మదాబాద్, బరోడా, రాజ్కోట్ నగరాల్లోని స్టేడియాల్లో మాత్రమే టోర్నీ జరపాలనే ప్రతిపాదన కూడా ఉంది. మరి చివరగా ఏం తేలుస్తారో చూడాలి.
అలానే బెంగళూరు వేదికగా ఐపీఎల్-2022 మెగా వేలం ప్రక్రియ నిర్వహించేందుకు బీసీసీఐ ప్రణాళిక సిద్ధం చేస్తున్నట్లు బోర్డు అధికారి ఒకరు తెలిపారు. ఫిబ్రవరి 7,8 తేదీల్లో ఈ ప్రక్రియ జరుగుతుందని చెప్పారు.
ఇవీ చదవండి:
