అహ్మదాబాద్ వేదికగా రాయల్ ఛాలెంజర్స్ బెంగళూరు, కోల్కతా నైట్రైడర్స్ మధ్య సోమవారం మ్యాచ్ జరగనుంది. గత మ్యాచ్లో పంజాబ్పై ఓటమితో డీలాపడ్డ కోహ్లీసేన.. ఇందులో గెలిచి, పాయింట్ల పట్టికలో ముందుకు వెళ్లాలని భావిస్తోంది. మరోవైపు ఓటములతో సతమవుతోన్న కోల్కతా.. ఇందులో ఎలాగైనా విజయం సాధించాలని ప్రణాళిక రచిస్తోంది. మరి ఎవరు గెలుస్తారో చూడాలి?
మెరుగ్గా ఆడాలి
టోర్నీలో ఇప్పటివరకు ఆడిన ఏడు మ్యాచ్ల్లో ఐదు విజయాలతో ఆర్సీబీ దూసుకెళ్తోంది. అయితే గత మూడు మ్యాచుల్లో మాత్రం రెండింటిలో ఓడిపోయింది. కెప్టెన్ కోహ్లీ, పడిక్కల్, మ్యాక్స్వెల్, డివిలియర్స్ నిలకడగానే రాణిస్తున్నప్పటికీ మరింత బాగా ఆడాల్సి ఉంది. బౌలర్లు సామ్స్, సిరాజ్, చాహల్, జెమీసన్, షాబాజ్ అహ్మద్ మెరుగ్గా బౌలింగ్ చేయాలి. ఏదేమైనప్పటికీ జట్టు సమష్టి ప్రదర్శన చేస్తే కోల్కతాపై గెలిచి పాయింట్ల పట్టికలో ఎగబాకే అవకాశముంది.
ఫామ్లోకి వస్తుందా?
ఈ సీజన్ ప్రారంభంనుంచి నిలకడలేమి ప్రదర్శన చేస్తోంది కోల్కతా నైట్రైడర్స్. ఓపెనర్లు రానా, గిల్ ఫర్వాలేదనిపిస్తున్నా భారీ స్కోర్లు నమోదు చేయడంలో విఫలమవుతున్నారు. రాహుల్ త్రిపాఠి కూడా రాణిస్తున్నప్పటికీ.. నిలకడలేమితో సతమతమవుతున్నాడు. కెప్టెన్ మోర్గాన్ ఇంతవరకు బ్యాట్కు పనిచెప్పలేదు. మిడిలార్డర్లో దినేశ్ కార్తీక్ సరిగ్గా రాణించలేకపోతున్నాడు. బౌలింగ్ విభాగంలో వరుణ్ చక్రవర్తి స్థిరంగా రాణిస్తున్నాడు. ఇక శివమ్ మావి, కమిన్స్, ప్రసిద్ధ్ కృష్ణ కూడా మరింత మెరుగైన ప్రదర్శన చేయాల్సి ఉంది. ఇప్పటివరకు ఏడు మ్యాచ్లాడిన కోల్కతా జట్టు కేవలం రెండు విజయాలతో పాయింట్ల పట్టికలో ఏడో స్థానంలో నిలిచింది.
