IPL 2023 : ఇండియన్ ప్రీమియర్ లీగ్ 16వ సీజన్లో భాగంగా చెన్నై సూపర్ కింగ్స్, రాయల్ ఛాలెంజర్స్ బెంగళూరు జట్ల మధ్య జరిగిన మ్యాచ్లో చెన్నై అతి కష్టం మీద గెలుపొందింది. సోమవారం ఆ జట్టు 8 పరుగుల తేడాకు ఆర్సీబీ టీమ్ను ఓడించింది. మొదట 'మ్యాన్‌ ఆఫ్‌ ద మ్యాచ్' కాన్వే (83; 45 బంతుల్లో 6×4, 6×6), దూబె (52; 27 బంతుల్లో 2×4, 5×6), రహానె (37; 20 బంతుల్లో 3×4, 2×6) మెరుపులతో చెన్నై 6 వికెట్లకు 226 పరుగులు చేసింది. ఆ తర్వాత మ్యాక్స్వెల్ (76; 36 బంతుల్లో 3×4, 8×6), డుప్లెసిస్‌ (62; 33 బంతుల్లో 5×4, 4×6) విధ్వంసం సృష్టించడంతో ఆర్సీబీ ఛేదనలో దూసుకెళ్లినా.. చివరి ఓవర్లలో వరుస వికెట్లు కోల్పోవడం వల్ల ఆర్సీబీకి ఓటమి తప్పలేదు. తుషార్ దేశ్పాండే (3/45), పతిరన (2/42) బెంగళూరును దెబ్బ తీశారు.
ఆర్సీబీకి ఆదిలోనే ఎదురుదెబ్బ..
227 పరుగులతో లక్ష్యంతో బరిలోకి దిగిన బెంగళూరుకు ఆదిలోనే ఎదురుదెబ్బ తగిలింది. ఈ మ్యాచ్లో ఓపెనర్గా విరాట్ కోహ్లీ మాయ చేసి రికార్డులు బద్దలు కొడతాడనుకుంటే.. కేవలం 4 బంతులు ఆడి 6 పరుగులు మాత్రమే చేశాడు. ఆ తర్వాత క్రీజులోకి దిగిన మహిపాల్ 5 బంతులు ఆడి డకౌట్ అయ్యాడు. రెండు ఓవర్లకే 2 వికెట్లు కోల్పోయి పీకల్లోతు కష్టాల్లో పడింది బెంగళూరు జట్టు. ఆ తర్వాత అసలు ఆట మొదలైంది. ఫాఫ్ డుప్లేసిస్ (33 బంతుల్లో 62 పరుగులు), గ్లెన్ మ్యాక్స్వెల్ (36 బంతుల్లో 76 పరుగులు) కలసి స్కోర్ బోర్డుతో కబడ్డీ ఆడుకున్నారు. మెరుపు ప్రదర్శన చేసిన మ్యాక్స్వెల్ 141 పరుగుల వద్ద 13వ ఓవర్లో పెవిలియన్ చేరాడు. ఆ తర్వాత బ్యాటింగ్కు దిగిన షహబాద్ అహ్మద్(13) నిలకడగా ఆడాడు. దినేశ్ కార్తీక్ (28), చెన్నై బౌలర్లలో ఆకాశ్ (1), తుషార్ దేశ్పాండే (1), మహీశ్ తీక్షణ (1), జడేజా (1), మతీశ పతిరణ (1), మయీన్ అలీ (1) వికెట్లు పడగొట్టారు.
అంతకుముందు.. టాస్ ఓడిపోయి బ్యాటింగ్కు చేసిన చెన్నై.. నిర్ణీత 20 ఓవర్లలో 6 వికెట్ల నష్టానికి 226 పరుగులు చేసింది. చెన్నై బ్యాటర్ డేవాన్ కాన్వే (83) దంచికొట్టాడు. శివమ్ దుబే (52) హాఫ్ సెంచరీ చేశాడు. అజింక్య రహానే (37), అంబటి రాయుడు (14) పరుగులు చేశాడు. ఓపెనర్ రుతురాజ్ గైక్వాడ్(3) పేలవ ప్రదర్శన చేశాడు. మెయీన్ అలీ (19*), జడేజా (10*) పరుగులు చేశారు. బెంగళూరు బౌలర్లలో మహ్మద్ సిరాజ్ (1), పార్వెల్ (1), విజయ్ కుమార్ (1), హసరంగ (1), హర్షల్ పటేల్ (1), మ్యాక్స్వెల్ (1) వికెట్లు పడగొట్టారు.
శివమ్ దుబే సూపర్ సిక్స్..
చెన్నై బ్యాటర్ శివమ్ దుబే మరో ఘనత సాధించాడు. ఈ మ్యాచ్లో వేసిన హర్షల్ పటేల్ బౌలింగ్‌లో 13వ ఓవర్లో.. 111 మీటర్ల భారీ సిక్స్ను బాదాడు. దీంతో బంతి స్టేడియం పైకప్పు మీద పడింది. దీనికి సంబంధించిన వీడియో ప్రస్తుతం సామాజిక మాధ్యమాల్లో వైరల్‌గా మారింది.
