IPL 2022 RCB VS LSG: తమ జట్టు చేసిన ప్రదర్శన సంతృప్తిని ఇచ్చిందన్నాడు రాయల్ ఛాలెంజర్స్ బెంగళూరు కెప్టెన్ ఫాఫ్ డుప్లెసిస్. గత రెండు మ్యాచులతో పోలిస్తే ప్రస్తుతం మరింత మెరుగయ్యామన్నాడు. లఖ్నవూ సూపర్ జెయింట్స్తో మ్యాచ్ అనంతరం డుప్లెసిస్ ఈ వ్యాఖ్యలు చేశాడు. ఈ మ్యాచ్లో రాయల్ ఛాలెంజర్స్ బెంగళూరు 18 పరుగుల తేడాతో లఖ్నవూపై విజయం సాధించింది.
"ఈ మైదానం స్వభావం వల్ల చాలా పరుగెత్తాల్సి వచ్చింది. దీని వల్ల తొందరగా అలసిపోతాం. 96 పరుగులపై ఉన్నప్పుడు శతకం చేయాలనే ఆలోచన ఉంది. కానీ ఇన్నింగ్స్ను నిలబెట్టాల్సిన అవసరం ఉంది. ఈరోజు నా ఆటతో చాలా సంతోషంగా ఉన్నాను. ఇలాంటి పెద్ద మైదానాల్లో స్లోగా బౌలింగ్ చేస్తే బౌండరీలు కొట్టడం చాలా కష్టం. బౌండరీకి తరలించే శక్తి ఉండదు. నేను కూడా అలసిపోయాను కానీ తప్పదు. ఇన్నింగ్స్ ప్రారంభంలో పిచ్ బౌలర్లకు సహకారం అందించడం వల్ల మమ్మల్ని ఇబ్బంది పెట్టారు. ఇలాంటి పిచ్ బ్యాటర్లకు చాలా కఠినమైంది. చాలా జట్లు ప్లేఆఫ్ స్థానం కోసం పోటీపడుతున్నాయి. కానీ అది మన నియంత్రణలో ఉండదు మనం మన బలాలపైన దృష్టి పెట్టాలి. జట్టులో నిలకడగా ఆడే ఆటగాడు కావాలి. దినేశ్ కార్తీక్ కొంత మేర ఆ స్థానాన్ని భర్తీ చేస్తున్నాడు. గత రెండు మ్యాచుల్లో డెత్ బౌలింగ్ కొంత ఆందోళన కలిగించింది. కానీ ఇప్పుడు కొంత మెరుగయ్యాం. హర్షల్ అద్భుతమైన ఆటగాడు. ఈ సీజన్లో అతడు మరింత ప్రత్యేకంగా మారబోతున్నాడు"
-ఫాఫ్ డుప్లెసిస్, కెప్టెన్ రాయల్ ఛాలెంజర్స్ బెంగళూరు
"మేము తొలి ఓవర్లోనే రెండు వికెట్లు తీసి మ్యాచ్ను బాగానే ప్రారంభించాం. కానీ పవర్ప్లేలో 50 పరుగులు ఇచ్చాం. ఈ పిచ్పై 180 పెద్ద స్కోర్. నాకు తెలిసి 15 నుంచి 20 పరుగులు ఎక్కువ ఇచ్చాం. ఒక బ్యాటర్ దూకుడుగా ఆడితే మరొకరు సహకారం అందిచాలి. కానీ అది మేము చేయలేదు. మాది మంచి జట్టు ప్రస్తుతం ఆడుతున్న ఆటతో సంతోషంగా ఉన్నాం. రాజస్థాన్తో మ్యాచ్లోను బాగానే ఆరంభించాం. మొదట ఒత్తిడిలోకి నెట్టినా దాన్ని పూర్తిగా కొనసాగించలేకపోయాం. అందరూ మంచి ఫామ్లో ఉన్నారు. ముఖ్యంగా కుర్రాళ్లు మరింత రాణించాల్సిన అవసరం ఉంది"
-కేఎల్ రాహుల్, కెప్టెన్ లఖ్నవూ సూపర్ జెయింట్స్
ఐపీఎల్ 2022లో నూతనంగా ఎంట్రీ ఇచ్చిన గుజరాత్ టైటాన్స్ జట్టు.. ఆరు మ్యాచులాడి ఐదింట్లో గెలిచి అగ్రస్థానంలో కొనసాగుతోంది. రాయల్ ఛాలెంజర్స్ బెంగళూరు రెండో స్థానంలో ఉండగా.. రాజస్థాన్ రాయల్స్ మూడో స్థానంలో నిలించింది. కాగా అత్యధికంగా టైటిళ్లు గెలిచిన చెన్నైసూపర్కింగ్స్, ముంబయి ఇండియన్స్ జట్లు పాయింట్ల పట్టికలో అట్టడుగున నిలిచాయి.
ఇదీ చదవండి: బెంగళూరు భళా.. లఖ్నవూ సూపర్ జెయంట్స్పై ఘన విజయం
