రాయల్ ఛాలెంజర్స్ బెంగళూరు ఆల్‌రౌండ్‌ జోరుతో(RCB Vs RR) అదరగొట్టింది. మ్యాక్స్‌వెల్‌ (50 నాటౌట్‌), వికెట్‌ కీపర్‌ బ్యాట్స్‌మన్‌ శ్రీకర్‌ భరత్‌ (44) మెరవడం వల్ల బుధవారం జరిగిన మ్యాచ్‌లో(IPL 2021) 7 వికెట్ల తేడాతో రాజస్థాన్ రాయల్స్‌ను చిత్తు చేసింది. బెంగళూరు బౌలర్లు కట్టుదిట్టంగా బౌలింగ్‌ చేయడం వల్ల మొదట రాజస్థాన్ 9 వికెట్లకు 149 పరుగులే చేయగలిగింది. లూయిస్‌ (58) ధనాధన్‌ ఇన్నింగ్స్‌తో టాప్‌ స్కోరర్‌గా నిలిచాడు. ఓ దశలో మంచి స్కోరు చేసేలా కనిపించిన రాజస్థాన్‌కు చాహల్‌ (2/18), షాబాజ్‌ అహ్మద్‌ (2/10), హర్షల్‌ పటేల్‌ (3/34) కళ్లెం వేశారు. భరత్‌, మ్యాక్స్‌వెల్‌ల జోరుతో లక్ష్యాన్ని బెంగళూరు 17.1 ఓవర్లలో 3 వికెట్లు మాత్రమే కోల్పోయి ఛేదించింది.
ఆ ఇద్దరి జోరు..
పెద్దదేమీ కాని లక్ష్య ఛేదనలో బెంగళూరుకు మంచి ఆరంభమే లభించింది. కోహ్లీ (25), పడిక్కల్‌ (22) చక్కగా బ్యాటింగ్‌ చేయడం వల్ల అయిదు ఓవర్లు ముగిసేసరికి ఆ జట్టు 48/0తో నిలిచింది. అయితే ఇన్నింగ్స్‌ సాఫీగా సాగిపోతున్న దశలో బెంగళూరు.. కొద్ది తేడాతో స్థిరపడ్డ ఓపెనర్లిద్దరినీ కోల్పోయింది. ఆరో ఓవర్లో పడిక్కల్‌ను ముస్తాఫిజుర్‌ బౌల్డ్‌ చేయగా, ఆ తర్వాతి ఓవర్లో కోహ్లీ.. పరాగ్‌ సూపర్‌ త్రోకు రనౌటయ్యాడు. రాజస్థాన్ ఒత్తిడిని కొనసాగించే ప్రయత్నం చేసింది.
కానీ భరత్‌, మ్యాక్స్‌వెల్‌ సంయమనంతో బ్యాటింగ్‌ చేస్తూ ఇన్నింగ్స్‌ను నడిపించారు. 13వ ఓవర్లో బెంగళూరు స్కోరు 100 దాటింది. తర్వాత తెవాతియా బౌలింగ్‌లో భరత్‌ ఓ చూడముచ్చటైన రివర్స్‌ స్వీప్‌తో బౌండరీ రాబట్టాడు. 15 ఓవర్లకు స్కోరు 123/2. తర్వాతి ఓవర్లోనే అతడు ఔట్‌ కావడం వల్ల కాస్త ఆసక్తి రేగింది. కానీ రాజస్థాన్‌కు మ్యాక్స్‌వెల్‌ ఎలాంటి అవకాశమూ ఇవ్వలేదు. మోరిస్‌ వేసిన ఇన్నింగ్స్‌ 17వ ఓవర్లో ఓ సిక్స్‌, మూడు ఫోర్లు బాదేసి బెంగళూరు విజయాన్ని ఖాయం చేశాడు.
లూయిస్‌ ధనాధన్‌?
రాజస్థాన్ చేజేతులా భారీ స్కోరు చేసే అవకాశాన్ని కోల్పోయింది. ఓపెనర్‌ ఎవిన్‌ లూయిస్‌ మెరుపులతో పవర్‌ప్లే ముగిసే సరికి రాజస్థాన్ 56/0తో నిలిచింది. జైశ్వాల్‌ (31)తో కలిసి అతను తొలి వికెట్‌కు 77 పరుగులు జోడించాడు. 10 ఓవర్లు ముగిసేసరికి 91/1తో రాజస్థాన్ భారీ స్కోరుపై కన్నేసింది.
కానీ అనూహ్యంగా తడబడ్డ ఆ జట్టు ఆధిపత్యాన్ని కోల్పోయింది. బెంగళూరు బౌలర్లు విజృంభించడం వల్ల చివరి 10 ఓవర్లలో కేవలం 58 పరుగులు చేసి ఎనిమిది వికెట్లు కోల్పోయింది. 12వ ఓవర్లో లూయిస్‌ను గార్టన్‌ ఔట్‌ చేయడం వల్ల ఇన్నింగ్స్‌ స్వరూపమే మారిపోయింది. ఆ తర్వాత వచ్చిన బ్యాట్స్‌మెన్‌ వచ్చినట్లు వెనుదిరిగారు. చాహల్‌, షాబాజ్‌, హర్షల్‌ ఆ జట్టును గట్టి దెబ్బ తీశారు.
రాజస్థాన్ ఇన్నింగ్స్‌: లూయిస్‌ (సి) భరత్‌ (బి) గార్టన్‌ 58; జైశ్వాల్‌ (సి) సిరాజ్‌ (బి) క్రిస్టియన్‌ 31; శాంసన్‌ (సి) పడిక్కల్‌ (బి) షాబాజ్‌ 19; లొమ్రార్‌ (స్టంప్డ్‌) భరత్‌ (బి) చాహల్‌ 3; లివింగ్‌స్టోన్‌ (సి) డివిలియర్స్‌ (బి) చాహల్‌ 6; తెవాతియా (సి) పడిక్కల్‌ (బి) షాబాజ్‌ 2; పరాగ్‌ (సి) కోహ్లి (బి) హర్షల్‌ 9; మోరిస్‌ (సి) పడిక్కల్‌ (బి) హర్షల్‌ 14; సకారియా (సి) డివిలియర్స్‌ (బి) హర్షల్‌ 2; కార్తీక్‌ త్యాగి నాటౌట్‌ 1; ఎక్స్‌ట్రాలు 4 మొత్తం: (20 ఓవర్లలో 9 వికెట్లకు) 149;
వికెట్ల పతనం: 1-77, 2-100, 3-113, 4-113, 5-117, 6-127, 7-146, 8-146, 9-149;
బౌలింగ్‌: గార్టన్‌ 3-0-30-1; సిరాజ్‌ 3-0-18-0; మ్యాక్స్‌వెల్‌ 2-0-17-0; హర్షల్‌ పటేల్‌ 4-0-34-3; క్రిస్టియన్‌ 2-0-21-1; చాహల్‌ 4-0-18-2; షాబాజ్‌ అహ్మద్‌ 2-0-10-2.
బెంగళూరు ఇన్నింగ్స్‌: కోహ్లి రనౌట్‌ 25; పడిక్కల్‌ (బి) ముస్తాఫిజుర్‌ 22; శ్రీకర్‌ భరత్‌ (సి) రావత్‌ (బి) ముస్తాఫిజుర్‌ 44; మ్యాక్స్‌వెల్‌ నాటౌట్‌ 50; డివిలియర్స్‌ నాటౌట్‌ 4; ఎక్స్‌ట్రాలు 8 మొత్తం: (17.1 ఓవర్లలో 3 వికెట్లకు) 153;
వికెట్ల పతనం: 1-48, 2-58, 3-127; బౌలింగ్‌: మోరిస్‌ 4-0-50-0; కార్తీక్‌ త్యాగి 2-0-23-0; సకారియా 3-0-18-0; ముస్తాఫిజుర్‌ 3-0-20-2; తెవాతియా 3-0-23-0; లొమ్రార్‌ 2-0-13-0; పరాగ్‌ 0.1-0-4-0.
ఇదీ చూడండి.. IPL 2021 news: రాజస్థాన్పై బెంగళూరు ఘనవిజయం
