ఐపీఎల్ను నిరుటిలాగే యూఏఈలో నిర్వహించాల్సిందని లీగ్ను వీడిన ఆడమ్ జంపా అన్నాడు. "ఈసారి బబుల్ కారణంగా హాని తప్పదన్న భయం కలిగింది. ఆరు నెలల కిందట దుబాయ్లో అలా అనిపించలేదు. ఈసారీ లీగ్ను అక్కడే నిర్వహించాల్సింది. నేను ఐపీఎల్ను వీడడానికి చాలా కారణాలున్నాయి. ఇక్కడ కరోనా తీవ్రత ఎక్కువగా ఉంది. నాకు తుది జట్టులో ఆడే అవకాశం కూడా రావడం లేదు. బబుల్లో విసిగిపోయాను. భారత్ నుంచి వచ్చే ప్రయాణికుల విమానాలపై నిషేధం విధిస్తున్నట్లు ప్రకటన రాగానే లీగ్ను వీడేందుకు ఇదే సరైన సమయం అనిపించింది" అని ఆడమ్ వివరించాడు.
ఐపీఎల్ కొనసాగించవచ్చు..
భారతదేశంలో కరోనా తీవ్రమవుతున్నందుకు బాధగా ఉందని ఇంగ్లాండ్, కోల్కతా నైట్ రైడర్స్ కెప్టెన్ ఇయాన్ మోర్గాన్ అన్నాడు. అయితే వివిధ రాష్ట్రాలు కర్ఫ్యూలు, లాక్డౌన్లు విధిస్తున్నా ఐపీఎల్ కొనసాగించవచ్చని అభిప్రాయపడ్డాడు.
"నిరుడు బ్రిటన్లో చాలా రోజులు లాక్డౌన్ ఉంది. ఇప్పట్లో క్రికెట్ సాధ్యం కాదనే అనుకున్నాం. లాక్డౌన్ తర్వాత టీవీలో మొదట చూసింది న్యూజిలాండ్, ఆస్ట్రేలియా మ్యాచే. అది రగ్బీ మ్యాచ్. ఆ తర్వాత నెమ్మదిగా బుండెస్లిగా మొదలైంది. ఆ తర్వాత ప్రీమియర్ లీగ్ ఆరంభమైంది. దేశమంతా ఉన్నా ఆటలు ఆడొచ్చని ఆ లీగ్లు చూపించాయి. అవే ఇప్పుడు నమూనాలు. వాటిని అనుసరించవచ్చు" అని మోర్గాన్ అన్నాడు.
కేన్ రిచర్డ్సన్ స్థానంలో స్కాట్ కుగెలిన్
కొవిడ్ భయంతో స్వదేశానికి తిరిగెళ్లిన ఆస్ట్రేలియా ఆటగాడు కేన్ రిచర్డ్సన్ స్థానంలో రాయల్ ఛాలెంజర్స్ బెంగళూరు.. న్యూజిలాండ్ పేసర్ స్కాట్ కుగెలిన్ను జట్టులోకి తీసుకుంది. కుగెలిన్ ఇప్పటికే ముంబయి జట్టు రిజర్వ్ ఆటగాడిగా బయోబబుల్లో ఉన్నాడు. 29 ఏళ్ల అతడు కివీస్ తరఫున రెండు వన్డేలు, 16 టీ20 మ్యాచ్లు ఆడాడు.
