దుబాయ్ వేదికగా సీఎస్కేతో జరుగుతున్న ఐపీఎల్-2021 తొలి క్వాలిఫైయర్స్లో.. నిర్ణీత 20ఓవర్లలో దిల్లీ క్యాపిటల్స్ 5 వికెట్లు కోల్పోయి 172పరుగులు చేసింది. ఓపెనర్ షా(60), పంత్ (51*), హెట్మయర్(37) రాణించారు. చెన్నై బౌలర్లలో హేజిల్వుడ్ 2, జడేజా 1, మోయిన్ అలీ 1, బ్రావో 1 వికెట్ తిశారు.
పృథ్వీ షా దూకుడు...
కీలకమైన మ్యాచ్లో టాస్ ఓడి బ్యాటింగ్కు దిగిన దిల్లీకి శుభారంభం దక్కలేదు. ఓవైపు పృథ్వీ షా(60, 34బంతుల్లో) వేగంగా ఆడుతున్నా.. మరో ఓపెనర్ శిఖర్ ధావన్ పరుగులు చేయడంలో విఫలమయ్యాడు. 7 బంతుల్లో 7 పరగులు చేసి హేజిల్వుడ్ బౌలింగ్లో కీపర్ ధోనికి చిక్కాడు.
ఆ తర్వాత క్రీజులోకి వచ్చిన శ్రేయస్ అయ్యర్ కూడా ఆకట్టుకోలేకపోయాడు. క్రీజులో చాలా ఇబ్బంది పడ్డాడు. 8బంతుల్లో ఒక పరుగు మాత్రమే చేసి హేజిల్వుడ్ బౌలింగ్లో ఓ చెత్త షాట్కు ఔట్ అయ్యాడు.
ఆ తర్వాత బ్యాటింగ్కు దిగిన అక్షర్ పటేల్(10).. షాకు కొంతసేపు స్టాండ్ ఇచ్చాడు. ఓవైపు వికెట్లు పడుతున్నా.. షా మాత్రం తన దూకుడుతో ఆకట్టుకున్నాడు. ఫోర్లు, సిక్సులు బాదుతూ సీఎస్కే బౌలర్లను కాస్త ఇబ్బంది పెట్టాడు. అక్షర్ పటేల్ ఔట్ అయినా దూకుడు తగ్గించలేదు. ఈ క్రమంలోనే అర్థశతకం పూర్తి చేసుకున్నాడు. జోరు మీద ఉన్న షా.. సెంచరీవైపు అడుగులు వేశాడు. ప్రమాదకరంగా మారుతున్న సమయంలో రవీంద్ర జడేజా అతడిని ఔట్ చేశాడు.
పంత్- హెట్మయర్ కీలక ఇన్నింగ్స్..
షా ఔట్ అయ్యేసరికి దిల్లీ క్యాపిటల్స్ స్కోరు 80/4. అప్పటికి 10.2 ఓవర్లే ముగిశాయి. మంచి స్కోరే ఉన్నా.. ఎక్కువ వికెట్లు పడటం వల్ల దిల్లీ అభిమానుల్లో కొంత ఆందోళన నెలకోంది.
అప్పుడే క్రీజులోకి పంత్, హెట్మయర్ వచ్చారు. తొలుత ఇద్దరు తడబడ్డారు. కానీ క్రీజులో నిలదొక్కుకున్న అనంతరం ఇద్దరు ధాటికా ఆడటం మొదలుపెట్టారు. 16ఓవర్లకు స్కోరు 128/4కు చేరింది. ఆ తర్వాత ఇద్దరు ఆగలేదు. చెన్నై బౌలర్లపై దూకుడు ప్రదర్శించారు. మైదానం అన్నివైపులా ఇద్దరు ఫోర్లు బాదేసారు. ఈ క్రమంలోనే 19వ ఓవర్లో భారీ షాట్కు ప్రయత్నించి బ్రావో బౌలింగ్లో ఔటయ్యాడు హెట్మయర్. హెట్మయర్- పంత్ జోడి 83 పరుగుల విలువైన భాగస్వామ్యాన్ని నమోదు చేసింది.
తర్వాత క్రీజులోకి వచ్చిన టామ్ కరెన్(0*)తో కలిసి జట్టు స్కోరును 170 దాటించాడు పంత్.
