ప్రస్తుత ఐపీఎల్ సీజన్లో చెన్నై సూపర్కింగ్స్ కెప్టెన్ మహేంద్రసింగ్ ధోనీ తీరు సరిగా లేదని టీమ్ఇండియా సెలక్షన్ కమిటీ మాజీ ఛైర్మన్ కృష్ణమాచారి శ్రీకాంత్ అభిప్రాయపడ్డాడు. ఈ టోర్నీలో సీఎస్కే తుదిజట్టు ఎంపిక అత్యంత చెత్తగా ఉందని తెలిపాడు. పేలవ ప్రదర్శనతో ఆకట్టుకోలేకపోతున్న పియూష్ చావ్లా, కేదార్ జాదవ్లను ప్రతి మ్యాచ్లో ఎంపిక చేయడంపై శ్రీకాంత్ ఆగ్రహం వ్యక్తం చేశాడు. మైదానంలో చురుగ్గా తిరగడానికి వాళ్లిద్దరికీ ఓ స్కూటర్ అవసరమని ఎద్దేవా చేశాడు.
"ధోనీ నిర్ణయంతో నేను ఏకీభవించను. తుదిజట్టు ఎంపిక అర్ధ రహితంగా ఉంది. ప్రస్తుత టోర్నీలో తమ జట్టుకు కలిసి రావడం లేదని ధోనీ చెప్తున్నాడు. కానీ, ఆటగాళ్ల ఎంపికలోనే పెద్ద తప్పు ఉంది. ధోనీ ఒప్పందం ఏమిటి? జగదీశన్లో మెరుపు లేదని అన్నాడు. కానీ, 'స్కూటర్' జాదవ్లో ఆ మెరుపు ఉందా? ఇది అత్యంత హాస్యాస్పదంగా ఉంది. దానికి నేను అంగీకరించను. దీనిపై చర్చ జరిగేలోపు టోర్నీ కూడా ముగిసిపోతుంది. ధోనీకి ఇప్పుడు ఒత్తిడి తగ్గిందని.. ఇకపై యువకులకు అవకాశం ఇస్తానని చెప్తున్నాడు. ఇలాంటి మాటలు నాకు అర్థం కావడం లేదు. కరన్ శర్మ కనీసం రెండు వికెట్లు అయినా పడగొట్టాడు. కానీ, మ్యాచ్ ఓడిపోయిన తర్వాత బౌలింగ్ వేయడానికి పియూష్ చావ్లా వస్తాడు. ధోనీ గొప్పవాడు కావొచ్చు. అలా అనడంలో సందేహమూ లేదు. కానీ, ఇలాంటి చర్యలతో నేను ఏకీభవించను."
