దుబాయ్ వేదికగా గురువారం జరిగిన మ్యాచ్లో చెన్నై తమ సత్తాను చాటుకుంది. 173 లక్ష్యఛేదనతో బరిలో దిగిన చెన్నై సూపర్కింగ్స్.. కోల్కతా నైట్ రైడర్స్పై 6 వికెట్ల తేడాతో ఘనవిజయాన్ని నమోదు చేసుకుంది.
చెన్నై గెలుపులో ఓపెనింగ్ బ్యాట్స్మన్ రుతురాజ్ గైక్వాడ్ (72) కీలక పాత్ర పోషించాడు. ఆఖర్లో జడేజా (31) ఎప్పటిలాగే మెరుపు ఇన్నింగ్స్‌ ఆడాడు. మ్యాచ్ క్లైమాక్స్లో తమకు అనుకూలంగా నిలిచిన గేమ్ ఇదేనని అంటున్నాడు చెన్నై సారథి ధోని. తర్వాతి సీజన్లో అద్భుతంగా రాణించడానికి కావాల్సిన ఆటగాళ్లు తమ జట్టులో ఉన్నారని ధీమా వ్యక్తం చేశాడు. రుతురాజ్ గైక్వాడ్పై ప్రశంసలు కురిపించాడు
"మ్యాచ్ చివరి దశలో మాకు అనుకూలంగా నిలిచిన గేమ్ ఇదే అనుకుంటున్నాను. ఈ ఘనత జట్టు సభ్యులకే చెందుతుంది. ఈ సీజన్లో జడేజా అద్భుతంగా రాణిస్తున్నాడు. రుతురాజ్ తానేంటో నిరూపించుకున్నాడు. ఒత్తిడి ఉన్నా తట్టుకుని నిలబడ్డాడు. ప్రస్తుతం అత్యంత ప్రతిభ ఉన్న ఆటగాళ్లలో రుతురాజ్ ఒకడు.
టోర్నీలో ఎప్పటికప్పుడు మారుతూ ఉండడం చాలా అవసరం. ఉత్తమ ప్రదర్శన కనబర్చడం మాకు అత్యవసరం. మరో దశకు చేరుకునేందుకు మాకు అవకాశం లేదు. కానీ, తర్వాతి సీజన్లో సత్తా చాటగల ఆటగాళ్లు మా జట్టులో ఉన్నారు."
-- మహేంద్ర సింగ్ ధోనీ, చెన్నై సూపర్ కింగ్స్ కెప్టెన్.
చిరునవ్వుతో..
మ్యాచ్ గెలవడం తనకు చాలా ఆనందంగా ఉందన్నాడు రుతురాజ్ గైక్వాడ్. కొవిడ్ నుంచి కోలుకున్న తర్వాత తాను ఆడటానికి పరిస్థితులు క్లిష్టంగానే ఉంటాయని భావించానన్నాడు. తమ సారథి ధోని సూచించినట్లు ప్రతి పరిస్థితిని చిరునవ్వుతో ఎదుర్కొంటున్నానని చెప్పుకొచ్చాడు. భవిష్యత్తు గురించి అనవసర ఆందోళన చెందనని చెప్పాడు.
బంతిని బాదడంపైనే..
చివరి ఓవర్లో చెన్నైకి 10 పరుగులు అవసరం. క్రీజులో ఉన్న జడేజా ఆఖరి రెండు బంతులకు భారీ సిక్సర్లు బాది.. జట్టును విజయతీరాలకు చేర్చాడు. 'చివరి 12 బంతులు మిగిలి ఉన్నప్పుడు నేను ఎక్కువ ఆలోచించలేదు. బంతిని బాదడంపైనే దృష్టిని కేంద్రీకరించాను' అని అన్నాడు జడేజా.
'తర్వాతి మ్యాచ్లో చూపిస్తాం'
అయితే.. తాము ఈ మ్యాచ్లో చక్కగానే ఆడామని అంటన్నాడు కోల్కతా కెప్టెన్ మోర్గాన్. ఈ ఓటమిని మర్చిపోయి.. రానున్న గేమ్లో రాణిస్తామని చెబుతున్నాడు.
"మేము చాలా బాగా ఆడామనే నేను అనుకుంటున్నాను. టాస్ ఓడిపోవడం మినహా మరేమీ లేదు. 8వ ఓవర్ నుంచి మాకు ఛాలెంజింగ్గా మారింది. గాలిలో తేమ శాతం పెరిగిపోయింది. మా బ్యాటింగ్ పద్ధతిలో మేము మెరుగయ్యాం. మా బౌలర్లు బాగా రాణించారు. ఈ ఓటమికి నేను ఎవరినీ తప్పు పట్టడం లేదు. దీని గురించి అతిగా ఆలోచించడం మానేసి, రానున్న గేమ్లో చక్కాగా ఆడుతాం."
--మోర్గాన్, కోల్కతా కోల్కతా నైట్ రైడర్స్ కెప్టెన్.
టాస్ ఓడి తొలుత బ్యాటింగ్లోకి దిగిన కోల్కతా.. నిర్ణీత ఓవర్లలో 172 పరుగులను చేసింది. కాగా.. చెన్నై ఐదో విజయాన్ని తమ ఖాతాలో వేసుకుంది.
