ఆ వివాదం తర్వాత మళ్లీ కామెంటరీ బాక్స్​లో సంజయ్!

ఆస్ట్రేలియా పర్యటన కోసం సంజయ్​ మంజ్రేకర్​ కామెంటేటర్​గా తిరిగి ఎంపికయ్యే అవకాశం ఉంది. ఏడాది ప్రారంభంలో అతడిని ప్యానెల్​ నుంచి బీసీసీఐ తప్పించింది. గతేడాది ప్రపంచకప్​లో జరిగిన వివాదమే ఇందుకు కారణంగా తెలుస్తోంది.

భారత మాజీ క్రికెటర్, ప్రముఖ కామెంటేటర్​ సంజయ్ మంజ్రేకర్​.. తిరిగి కామెంటరీ బాక్స్​లోకి అడుగుపెట్టనున్నాడు. భారత్-ఆసీస్ సిరీస్​తో ఇతడిని ఎంపిక చేసే అవకాశముంది. ఈ మేరకు ఆస్ట్రేలియా బోర్డు నిర్ణయం తీసుకోనుంది. ఇతడితో పాటే గ్లెన్ మెక్​గ్రాత్, నిక్ వైట్, హర్ష భోగ్లే, అజయ్ జడేజా, మురళీ కార్తిక్, అజిత్ అగర్కార్.. ఈ ప్యానెల్​లో ఉండనున్నారు.​

గతేడాది ప్రపంచకప్​లో రవీంద్ర జడేజాపై సంజయ్ చేసిన వ్యాఖ్యలు వివాదాస్పదం అయ్యాయి. ఆ తర్వాత అతడ్ని వ్యాఖ్యాతల ప్యానెల్​ నుంచి తప్పించినట్లు బీసీసీఐ ఈ ఏడాది ప్రారంభంలో ధ్రువీకరించింది. అయితే దానికి గల కారణాలను మాత్రం బోర్డు వెల్లడించలేదు. దీంతో మార్చి నుంచి కామెంటరీకి దూరంగా ఉన్నాడు సంజయ్.

అనంతరం ఐపీఎల్ 13వ సీజన్​ ప్రారంభానికి ముందు తనను తిరిగి ప్యానెల్​లో చోటు కల్పించాలని బీసీసీఐకి సంజయ్​ రెండుసార్లు లేఖ రాశాడు. అయినా అతడ్ని పరిగణలోకి తీసుకోలేదు బోర్డు.

హిందీ ప్యానెల్​లో సెహ్వాగ్​

మాజీ క్రికెటర్ వీరేంద్ర సెహ్వాగ్​.. భారత్-ఆస్ట్రేలియా సిరీస్​ కోసం హిందీ వ్యాఖ్యాతల ప్యానెల్​లో భాగం కానున్నాడు. జహీర్​ ఖాన్ కూడా ఇందులో ఉన్నాడు. వీరితో పాటు విజయ్​ దహియా, మహ్మద్​ కైఫ్​, వివేక్​ రజ్దాన్​, అర్జున్​ పండిట్​లు ఉన్నారు.

మూడు వన్డేల సిరీస్​తో ఆస్ట్రేలియాలో భారత్​ పర్యటన ప్రారంభం కానుంది. నవంబరు 27, 29, డిసెంబరు 2 తేదీల్లో ఈ మ్యాచ్​లు జరగనున్నాయి. ఆ తర్వాత డిసెంబరు 4, 6, 8 తేదీల్లో టీ20లు ఆడనున్నారు. డిసెంబరు 17 నుంచి టెస్టు సిరీస్ ప్రారంభం కానుంది.