ఆల్రౌండర్ హార్దిక్ పాండ్య ఆటతీరు చూసి చివరి టీ20 మ్యాచ్ కూడా గెలుస్తామని భావించానని భారత జట్టు సారథి విరాట్ కోహ్లీ అన్నాడు. సిరీస్ గెలుపుతో ఈ ఏడాదిని ముగించడం ఆనందంగా ఉందని తెలిపాడు. రానున్న టెస్టు సిరీస్పై కొన్ని కీలక వ్యాఖ్యలు చేశాడు. ప్రాక్టీస్ మ్యాచ్ ఆడేది లేనిది తర్వాత నిర్ణయం తీసుకుంటానని మ్యాచ్ అనంతరం వెల్లడించాడు.
"రానున్న మాచ్ల్లో ఆసీస్కు గట్టి పోటీ ఇచ్చేందుకు ప్రయత్నిస్తాం. ప్రస్తుత కొవిడ్ పరిస్థితుల్లో కూడా అభిమానులు మైదానాల్లోకి వచ్చి జట్టుకు రెట్టింపు ఉత్సాహాన్ని ఇచ్చారు. తర్వాత జరగనున్న టెస్టు సిరీస్ను ఛాలెంజింగ్గా తీసుకుంటాం. ప్రస్తుతం భారత జట్టు మునుపటికంటే దృఢంగా ఉంది."
-విరాట్ కోహ్లీ, భారత జట్టు కెప్టెన్.
మూడో టీ20 మ్యాచ్లో ఆస్ట్రేలియా 12 పరుగుల తేడాతో భారత్పై గెలిచింది. ఈ సందర్భంగా మాట్లాడిన ఆసీస్ జట్టు కెప్టెన్ ఆరోన్ ఫించ్.. ఈ సిరీస్ చాలా గొప్పగా అనిపించిందని అన్నాడు.
"మొదటి రెండు మ్యాచ్లు ఓడిపోవాల్సింది కాదు. ఈసారి మా జట్టులో ఇద్దరు లెగ్స్పిన్నర్లు ఉన్నారు. స్వెప్సన్ 7వ ఓవర్లో ధావన్, కోహ్లీలకు చక్కగా బౌలింగ్ చేశాడు. జంపా కూడా ప్రతిభ కనబరిచాడు. గత 18 నెలల నుంచి మేం పరిమిత ఓవర్ల మ్యాచ్ల్లో బాగా రాణిస్తున్నాం".
-ఆరోన్ ఫించ్, ఆస్ట్రేలియా కెప్టెన్.
ఇదీ చదవండి:ఆస్ట్రేలియాదే చివరి మ్యాచ్.. సిరీస్ మాత్రం భారత్దే
