బాక్సింగ్ డే టెస్టులో భారత్ను ఆస్ట్రేలియా చిత్తుగా ఓడిస్తుందని అంటున్నాడు ఆసీస్ స్పిన్ దిగ్గజం షేన్ వార్న్. తొలి టెస్టు పరాభవం నుంచి టీమ్ఇండియా ఇంకా కోలుకోలేదని వ్యాఖ్యానించాడు. శనివారం జరగబోయే రెండో టెస్టుకు రక్షణ కవచం విరాట్ కోహ్లీ అందుబాటులో ఉండడు. పితృత్వ సెలవులపై అతడు స్వదేశానికి తిరిగి వచ్చాడు. ఈ నేపథ్యంలో వార్న్ ఈ వ్యాఖ్యలు చేశాడు.
"భారత్ను ఆస్ట్రేలియా చిత్తు చేస్తుంది. అయితే, టీమ్ఇండియాలోనూ కేఎల్ రాహుల్, గిల్, అజింక్యా రహానె లాంటి ఉత్తమమైన ఆటగాళ్లు ఉన్నారు. పుజారా ఎంత నైపుణ్యవంతుడో అందరికీ తెలుసు. మెల్బోర్న్ పిచ్లపై షమీ లాంటి ఆటగాడు విరుచుకుపడగలడు. అతను లేకపోవడం భారత్కు లోటు."
-షేన్ వార్న్, ఆస్ట్రేలియా మాజీ స్పిన్నర్
భారత ఆటగాళ్లను విమర్శించడం కన్నా ఆసీస్ బౌలర్లను ఎక్కువగా పొగడాలి అంటున్నాడు వార్న్. నలుగురు బౌలర్లు, ఆల్రౌండర్ గ్రీన్.. మంచి బౌలర్ల నుంచి గొప్ప బౌలర్ల స్థాయికి ఎదుగుతున్నారని చెప్పాడు.
"భారత ఆటగాళ్లను విమర్శించవచ్చు. అయితే అద్భుత ప్రదర్శన చేసిన ఆస్ట్రేలియా బౌలర్లను మరింత ప్రశంసించాలి. కమిన్స్, హేజిల్వుడ్, మిచెల్ స్టార్క్, నాథన్ లియోన్లు ఆస్ట్రేలియా ఆల్ టైం గ్రేట్గా ఎదుగుతున్నారు."
-షేన్ వార్న్, ఆస్ట్రేలియా మాజీ స్పిన్నర్
తొలి టెస్టు రెండో ఇన్నింగ్స్లో 36పరుగులతో కెరీర్లోనే అత్యల్ప గణాంగాలు నమోదు చేసింది టీమ్ఇండియా. దీంతో ఘోర ఓటమిని మూటగట్టుకుంది.
ఇదీ చూడండి: 'పృథ్వీని మిడిలార్డర్లో ఆడించాలి'
