లార్డ్స్ టెస్టు (India vs England) నుంచి తమ తప్పులను గ్రహించినట్లు తెలిపాడు ఇంగ్లాండ్ కెప్టెన్ జో రూట్ (Joe Root). బుధవారం నుంచి లీడ్స్ వేదికగా ప్రారంభమయ్యే మ్యాచ్లో తమ అత్యుత్తమ ఆటతీరును ప్రదర్శిస్తామని ఆశాభావం వ్యక్తం చేశాడు. మూడో టెస్టుకు ముందు నిర్వహించిన మీడియా సమావేశంలో ఈ విషయాలు వెల్లడించాడు.
"మేము నిజాయితీగా ఆడాలనుకుంటున్నాం. లార్డ్స్ టెస్టు నుంచి పలు పాఠాలు నేర్చుకున్నాం. ఎటువంటి వివాదాల జోలికి పోకుండా ఆటపైనే దృష్టి సారించాలనుకుంటున్నాం. కోహ్లీ సేన ఆడిన విధంగానే మేము మెరుగైన ప్రదర్శన చేయాలనుకుంటున్నాం" అని రూట్ పేర్కొన్నారు.
లార్డ్స్ వేదికగా జరిగిన రెండో టెస్టులో ఇరుజట్ల ఆటగాళ్ల మధ్య ఉద్రిక్త వాతావరణం నెలకొంది. బుమ్రా- అండర్సన్, కోహ్లీ- అండర్సన్, బుమ్రా- బట్లర్ మధ్య వాగ్వాదం జరిగింది. దీని ఫలితం మ్యాచ్పై కనిపించింది. ఈ మ్యాచ్లో టీమ్ఇండియా 151 పరుగుల తేడాతో విజయం సాధించింది.
ఈ సిరీస్లో ఇంకా మూడు టెస్టులు మిగిలి ఉన్నాయని రూట్ పేర్కొన్నాడు. వాటిల్లో గెలిచి సిరీస్ను కైవసం చేసుకోవాలని తహతహలాడుతున్నట్లు తెలిపాడు. సిరీస్ను గెలవడానికి తమకు అవకాశాలు మెండుగా ఉన్నాయని వెల్లడించాడు.
సిబ్లీ దూరం..
మూడో టెస్టుకు డామ్ సిబ్లీని పక్కన పెడుతున్నట్లు సారథి రూట్ తెలిపాడు. అతడి స్థానంలో డేవిడ్ మలన్ను తీసుకుంటున్నట్లు ప్రకటించాడు. మూడేళ్ల సుదీర్ఘ విరామం తర్వాత టెస్టుల్లోకి మలన్ను తీసుకుంది ఇంగ్లాండ్. 'మలన్ అనుభవం మాకు ఉపయోగపడనుంది. టాపార్డర్లో ఒత్తిడిని తట్టుకుని నిలబడగల సామర్థ్యం అతనికి ఉంది. అతడు ఇప్పటికే చాలా అంతర్జాతీయ మ్యాచ్లు ఆడాడు' అని రూట్ పేర్కొన్నాడు.
ఇదీ చదవండి: కోహ్లీ సన్నిహితుడే కాబోయే ప్రధాన కోచ్!
