ఫామ్లేమితో సతమతమవుతున్న టీమ్ఇండియా కెప్టెన్ విరాట్ కోహ్లీ(Virat Kohli)కి మద్దతుగా నిలిచాడు మాజీ వికెట్కీపర్ ఫరూక్ ఇంజనీర్. కోహ్లీపై భారీ అంచనాలు ఉంటున్నాయని.. బ్యాటింగ్కు దిగిన ప్రతిసారి అతడి నుంచి సెంచరీని ఆశించడం సబబుకాదని పేర్కొన్నాడు. విరాట్ కూడా అందరిలా మనిషేనని తెలిపాడు. టెస్టుల్లో అతడిప్పటికి 40, 50 పరుగులు సాధిస్తున్నాడని చెప్పాడు.
కోహ్లీ.. చివరిసారిగా 2019 నవంబర్లో బంగ్లాతో జరిగిన డై/నైట్ టెస్టులో శతకాన్ని అందుకున్నాడు. 2020 నుంచి అతనాడిన 10 టెస్టుల్లో 407 పరుగులు సాధించాడు. కోహ్లీ కెరీర్ సగటు 51.41 కాగా, 2020 నుంచి ఇప్పటివరకు 23.94 సగటుతో బ్యాటింగ్ చేశాడు. ఇటీవల ఇంగ్లాండ్తో జరిగిన తొలి టెస్టులో గోల్డెన్ డకౌట్గా వెనుదిరిగిన విరాట్.. లార్డ్స్ టెస్టులో రెండు ఇన్నింగ్స్ల్లో వరుసగా 42, 20 రన్స్ కొట్టాడు. దీంతో అతడి బ్యాటింగ్పై చర్చ నడుస్తోంది.
తాజాగా ఈ విషయమై ఓ స్పోర్ట్స్ ఛానల్తో మాట్లాడిన ఫరూక్.. ఇంగ్లాండ్ సారథి జో రూట్ నిలకడగా పరుగులు చేస్తున్న చోట విరాట్ విఫలమవుతున్నాడని పేర్కొన్నాడు. "అలా అని కోహ్లీని నిందించినట్లు కాదు. ఇప్పటికీ అతడు గొప్ప ఆటగాడు. ప్రపంచంలోని అత్యుత్తమ బ్యాట్స్మెన్లలో విరాట్ ఒకడు. అందరిలో కోహ్లీ ఒకడు. ఎందుకంటే అతడు పరుగులు సాధిస్తున్నాడు. రూట్ ఎక్కువ పరుగులు చేస్తున్నాడు. అతడు బ్యాటింగ్కు దిగిన ప్రతిసారి సెంచరీ ఆశించడం సరికాదు. ఆటకు తోడు అదృష్టం కూడా కలిసిరావాలి. అతడు కూడా మనిషే. మనిషి అనేవాడు తప్పులు చేయడం సహజం. విరాట్ కూడా అంతే. దురదృష్టవశాత్తూ ఔట్ అవుతున్నాడు" అని ఫరూక్ తెలిపాడు.
కోహ్లీ దూకుడు భారత క్రికెట్కు మంచే చేస్తుందని ఫరూక్ అభిప్రాయపడ్డాడు. తాను కూడా దూకుడుగా ఉండటాన్ని ఇష్టపడతానని తెలిపాడు. విరాట్ వంటి వాళ్లని చూసి గర్వించాలని పేర్కొన్నాడు. సొంత గడ్డపై ఇంగ్లాండ్ను ఓడించడం గొప్ప విషయమని స్పష్టం చేశాడు.
లార్డ్స్ వేదికగా జరిగిన రెండో టెస్టులో అనూహ్యంగా భారత్ విజయం సాధించింది. ఆఖరి రోజు చివరి రెండు సెషన్లలో ఇంగ్లిష్ జట్టును 120 పరుగులకే కుప్పకూల్చింది. దీంతో 151 పరుగుల తేడాతో విజయాన్ని అందుకున్న విరాట్ సేన.. ఐదు మ్యాచ్ల సిరీస్లో 1-0తో ముందంజ వేసింది. తదుపరి టెస్టు లీడ్స్ వేదికగా ఆగస్టు 25 నుంచి ప్రారంభం కానుంది.
ఇదీ చదవండి: క్రికెట్కు తాలిబన్ల మద్దతు.. టీ20 ప్రపంచకప్లో అఫ్గాన్!
