శ్రీలంకతో జరిగిన మూడో వన్డేలో టీమ్ఇండియా ఆల్‌రౌండ్‌ ప్రదర్శనతో అదరగొట్టి 317 పరుగుల తేడాతో ఘన విజయాన్ని సొంతం చేసుకుంది. ఈ క్రమంలోనే వన్డేల్లో అత్యధిక పరుగుల తేడాతో విజయం సాధించిన జట్టుగా భారత్ అవతరించింది. ఈ విజయంతో మూడు వన్డేల సిరీస్‌ను టీమ్ఇండియా 3-0 తేడాతో క్లీన్‌స్వీప్‌ చేసింది. తొలుత బ్యాటింగ్‌ చేసిన రోహిత్‌ సేన.. నిర్ణీత ఓవర్లలో 5 వికెట్ల నష్టానికి 390 పరుగుల భారీ స్కోరు చేయగా, శ్రీలంక 22 ఓవర్లలో 9 వికెట్లు కోల్పోయి 73 పరుగులు మాత్రమే చేసింది. అయితే ఈ మ్యాచ్లో పలు రికార్డులు నమోదయ్యాయి. అవేంటంటే..
- 21: ఈ మ్యాచ్లో విరాట్ కోహ్లీ (166; 110 బంతుల్లో) భారీ శతకం బాదాడు. ఈ క్రమంలో స్వదేశంలో అత్యధిక సెంచరీలు (21) బాదిన బ్యాటర్‌గా రికార్డు సృష్టించాడు. ఇన్నాళ్లూ ఈ రికార్డు సచిన్‌ (20) పేరిట ఉంది.
- 166: వన్డేల్లో కోహ్లీకిది రెండో అత్యధిక స్కోరు. 2012 ఆసియా కప్‌లో పాకిస్థాన్‌పై 183 పరుగులు అతడి అత్యధిక స్కోరు.
- 10: వన్డేల్లో శ్రీలంకపై కోహ్లీకిది 10వ సెంచరీ. ఈ శతకంతో వన్డేల్లో ఒక జట్టుపై అత్యధిక సెంచరీలు చేసిన ఆటగాడిగా అవతరించాడు. సచిన్‌ (వెస్టిండీస్‌పై 9) రెండో స్థానంలో ఉన్నాడు.
- 317: వన్డే క్రికెట్ చరిత్రలో పరుగుల పరంగా ఇదే (317) భారీ విజయం. (ఐర్లాండ్‌పై 290) న్యూజిలాండ్‌ పేరిట ఉన్న రికార్డును భారత్ అధిగమించింది.
- (4/32): ఈ మ్యాచ్లో టీమ్ఇండియా బౌలర్‌ సిరాజ్‌ (4/32) ఆకట్టుకున్నాడు. వన్డేల్లో అతడి అత్యుత్తమ బౌలింగ్ గణాంకాలు ఇవే.
- 5: ప్రస్తుతం వన్డేల్లో అత్యధిక పరుగులు చేసిన ఆటగాళ్ల జాబితాలో కోహ్లీ (12,574) ఐదో స్థానంలో ఉన్నాడు. ఈ మ్యాచ్లో మహేల జయవర్ధనే (12650)ను అధిగమించాడు.
- 73: వన్డేల్లో శ్రీలంకకు ఇది (73) నాలుగో అత్యల్ప స్కోరు.
- 2: ఈ ఫార్మాట్లో వేగవంతమైన (106 బంతుల్లో) 150 అందుకున్న రెండో భారత ఆటగాడిగా నిలిచాడు కోహ్లీ. ఇషాన్‌ కిషన్‌ (103 బంతుల్లో బంగ్లాదేశ్‌పై) తొలి స్థానంలో ఉన్నాడు.
- 8: ఈ మ్యాచ్లో కోహ్లీ 8 సిక్స్‌లు బాదాడు. వన్డేల్లో ఓ ఇన్నింగ్స్‌లో అతడి అత్యధిక సిక్స్‌లు ఇవే.
- 4: 50 ఓవర్ల ఫార్మాట్లో శ్రీలంకపై భారత్ నాలుగో (390/5) అత్యధిక స్కోరు ఇది.
- 3: శ్రీలంక ఆటగాడు అవిష్క ఫెర్నాండో ఈ సిరీస్‌లో మూడు సార్లు మహమ్మద్‌ సిరాజ్‌ బౌలింగ్‌లోనే ఔటయ్యాడు.
- 10: అత్యధికంగా ప్లేయర్‌ ఆఫ్‌ ది సిరీస్‌లు అందుకున్న ఆటగాళ్లలో కోహ్లీ(10) మూడో స్థానంలో ఉన్నాడు. మొదటి స్థానంలో సచిన్‌(15), రెండో స్థానంలో శ్రీలంక ఆటగాడు సనత్‌ జయసూర్య(11) కొనసాగుతున్నాడు. కోహ్లీ కేవలం 66 సిరీస్‌ల్లోనే ఈ ఘనత సాధించాడు.
- 5: వన్డేల్లో 150కి పైగా స్కోర్లు నమోదు చేసిన ఆటగాళ్లలో సచిన్‌, గేల్‌తో కలిసి కోహ్లీ(5) మూడోస్థానంలో నిలిచాడు. తొలి రెండు స్థానాల్లో రోహిత్‌(8), డేవిడ్‌ వార్నర్‌(6) స్థానాల్లో ఉన్నారు.
- 21: ఈ ఫార్మాట్లో శ్రీలంకపై అత్యధిక అర్ధసెంచరీలు చేసిన వ్యక్తుల్లో ధోనీతో కలిసి కోహ్లీ(21) రెండో స్థానంలో నిలిచాడు. తొలిస్థానంలో సచిన్‌(25) ఉన్నాడు.
ఇదీ చూడండి: Hockey World Cup 2023 : డ్రాగా ముగిసిన భారత్-ఇంగ్లాండ్ మ్యాచ్.. ఆ ఆశలపై ఎదురుదెబ్బ
