Hardik Pandya Vs South Africa : డిసెంబర్ 10 నుంచి దక్షిణాఫ్రితో ప్రారంభం కానున్న మూడు మ్యాచ్ల టీ20 సిరీస్కు టీమ్ఇండియా స్టార్ ఆల్రౌండర్ హార్దిక్ పాండ్య దూరం కానున్నట్లు తెలుస్తోంది. అతడి స్థానంలో రోహిత్ శర్మకు లేదా ప్రస్తుతం ఆసీస్తో జరుగుతున్న టీ20 సిరీస్కు సారథ్య బాధ్యతలు వహిస్తున్న సూర్యకుమార్ యాదవ్కు ఈ సిరీస్ సారథ్య బధ్యతలు అప్పగించే అవకాశం ఉన్నట్లు తెలుస్తోంది. ఈ మేరకు బీసీసీఐ ఇప్పటికే రోహిత్ను అభ్యర్థించినట్లు సమాచారం.
అయితే సఫారీలతో జరిగే వైట్ బాల్ టోర్నీకి హార్దిక్ దూరంగా ఉండటానికి ప్రధాన కారణం 2023 ప్రపంచ కప్లో ఎడమ చీలమండకు గాయం కావడమే. దీనిని నుంచి కోలుకోవడానికి అతడికి మరింత విశ్రాంతి అవసరమని వైద్యులు సూచించనట్లు తెలిసింది. కాగా, 2024, జనవరి 11 నుంచి జనవరి 17 వరకు అఫ్గానిస్థాన్తో జరిగే మూడు మ్యాచ్ల టీ20 సిరీస్లో మాత్రం హార్దిక్ పాండ్య తిరిగి ఆడే అవకాశాలు ఉన్నాయని సమాచారం.
రోహిత్ నో చెబితే..?
దక్షిణాఫ్రికాతో జరిగే మూడు మ్యాచ్ల టీ20 సిరీస్ను ఆడేందుకు బీసీసీఐ ఇప్పటికే రోహిత్ను సంప్రదించేందుకు యోచిస్తోంది. అయితే ఈ విషయంలో రోహిత్ సానుకూలంగా స్పందిస్తే గనుక చాలా గ్యాప్ తర్వాత టీ20 ఫార్మాట్కు సారథ్య బాధ్యతలు వహించనున్నాడు ఈ హిట్మ్యాన్. ఒకవేళ బీసీసీఐ అభ్యర్థనను రోహిత్ తిరస్కరిస్తే గనుక ప్రస్తుతం ఆసీస్తో జరుగుతున్న టీ20 సిరీస్కు సారథ్య బాధ్యతలు నిర్వర్తిస్తున్న సూర్యకుమార్ యాదవ్కు సఫారీలతో ఆడే జట్టులో కెప్టెన్గా అవకాశం లభించనుంది. మరోవైపు టీమ్ఇండియా స్టార్ బ్యాటర్ విరాట్ కోహ్లీ కూడా సౌతాఫ్రికా వైట్ బాల్ సిరీస్లకు దూరంగా ఉండే అవకాశాలు ఉన్నాయి. ఈ మేరకు ఇప్పటికే అతడు తన నిర్ణయాన్ని బీసీసీఐకి కూడా తెలియజేసినట్లు క్రికెట్ వర్గాల ద్వారా అందుతున్న సమాచారం. ఇక ఈ టూర్లో భాగంగా భారత్-దక్షిణాఫ్రికా మధ్య మూడు టీ20 మ్యాచ్లు, మూడు వన్డేలు, రెండు టెస్టు మ్యాచ్లు జరగనున్నాయి.
స్వదేశంలోనే ఆస్ట్రేలియాతో ఆడుతున్న ఐదు మ్యాచ్ల టీ20 సిరీస్లో ఇప్పటికే భారత్ రెండు మ్యాచ్లు గెలవగా ఆస్ట్రేలియా ఒకటి గెలిచింది. మరో రెండు మ్యాచ్లు ఆడాల్సి ఉంది.
