ఇంగ్లాండ్తో జరుగుతున్న నాలుగో టెస్టు రెండో ఇన్నింగ్స్లో టీమ్ఇండియా ఓపెనర్లు ఆచితూచి బ్యాటింగ్ చేస్తున్నారు. ప్రత్యర్థికి భారీ లక్ష్యాన్ని నిర్దేశించాలనే లక్ష్యంతో బరిలో దిగిన భారత జట్టు.. రెండో రోజు ఆట ముగిసే సమయానికి వికెట్ నష్టపోకుండా 43 పరుగులు చేసింది. ప్రస్తుతం క్రీజులో కేఎల్ రాహుల్(22), రోహిత్ శర్మ(20) ఉన్నారు.
తొలి ఇన్నింగ్స్లో ఇంగ్లాండ్ 290 పరుగులకు ఆలౌటైంది. మిడిల్‌ ఆర్డర్‌ బ్యాట్స్‌మన్‌ ఓలీపోప్‌ (81), క్రిస్‌వోక్స్‌ (50) అర్ధ శతకాలతో మెరిశారు. జానీ బెయిర్‌స్టో (37), మొయిన్‌ అలీ (35) కూడా తమవంతు పరుగులు చేశారు. ఈ క్రమంలోనే ఇంగ్లాండ్.. భారత్‌పై 99 పరుగుల భారీ ఆధిక్యం సాధించింది. భారత బౌలర్లలో ఉమేశ్‌ మూడు.. బుమ్రా, జడేజా రెండు వికెట్లు తీయగా శార్దూల్‌, సిరాజ్‌ చెరో వికెట్ పడగొట్టారు.
అంతకుముందు 55/3 ఓవర్‌నైట్‌ స్కోర్‌తో రెండో రోజు ఆట ప్రారంభించిన ఇంగ్లాండ్ ఆదిలోనే క్రేగ్‌ ఓవర్టన్‌ (1), డేవిడ్‌ మలన్‌ (31) వికెట్లను కోల్పోయింది. ఉమేశ్‌ ఇద్దరు బ్యాట్స్మెన్ను పెవిలియన్‌ పంపి భారత శిబిరంలో ఆశలు రేపాడు. అయితే, తర్వాత క్రీజులోకి వచ్చిన పోప్‌ నిలకడగా ఆడి ఆ జట్టు మంచి స్కోర్‌ చేయడంలో కీలక పాత్ర పోషించాడు. తొలుత బెయిర్‌స్టోతో కలిసి ఆరో వికెట్‌కు 89 పరుగులు జోడించిన అతడు తర్వాత మొయిన్‌ అలీతో కలిసి ఏడో వికెట్‌కు 76 పరుగులు సాధించాడు. ఈ క్రమంలోనే ఇంగ్లాండ్‌ను ఆధిక్యంలోకి తీసుకెళ్లాడు. అయితే కీలక సమయాల్లో ఈ ముగ్గురూ ఔటైనా చివర్లో క్రిస్‌వోక్స్‌ ధాటిగా ఆడి ఇంగ్లాండ్‌ను మెరుగైన స్థితిలో నిలిపాడు.
ఇదీ చూడండి.. IND Vs ENG: వోక్స్ హాఫ్ సెంచరీ.. ఇంగ్లాండ్ ఆలౌట్
