1999 ఫిబ్రవరి 7.. భారత దిగ్గజ స్పిన్నర్ అనిల్ కుంబ్లే కెరీర్లో మరిచిపోలేని రోజు.. ఎందుకంటారా? క్రికెట్ చరిత్రలో అత్యంత అరుదైన రికార్డును జంబూ ఆ రోజే సొంతం చేసుకున్నాడు. ఇంగ్లాండ్ బౌలర్ జిమ్ లేకర్ తర్వాత టెస్టు ఇన్నింగ్స్లో పది వికెట్లు తీసిన రెండో బౌలర్గా కుంబ్లే రికార్డు నెలకొల్పాడు. ఈ ఫీట్ సాధించి నేటికి 22 ఏళ్లు పూర్తయింది.
దిల్లీలోని అరుణ్ జైట్లీ క్రికెట్ స్టేడియం(ఫిరోజ్ షా కోట్ల మైదానం) వేదికగా.. పాకిస్థాన్తో జరిగిన టెస్టు మ్యాచ్లో కుంబ్లే ఈ ఫీట్ సాధించాడు. మొదట బ్యాటింగ్ చేసిన భారత్ 420 పరుగులు చేసింది. అనంతరం బ్యాటింగ్కు దిగిన పాక్ ఓపెనర్లు.. తొలి వికెట్కు 101 పరుగుల భాగస్వామ్యాన్ని జోడించారు. తర్వాత కుంబ్లే ధాటికి దాయాది బ్యాట్స్మెన్ కుప్పకూలారు. ఈ మ్యాచ్లో ఇండియా 212 పరుగుల తేడాతో గెలుపొందింది.
ఇన్నింగ్స్ మొత్తం 26.3 ఓవర్ల పాటు బౌలింగ్ చేసిన కుంబ్లే 74 పరుగులు ఇచ్చి పది వికెట్లు తీసుకున్నాడు. ఇందులో 9 మెయిడెన్ ఓవర్లూ ఉన్నాయి.
అంతర్జాతీయ క్రికెట్లో అత్యధిక వికెట్లు తీసిన బౌలర్లలో కుంబ్లే మూడో స్థానంలో ఉన్నాడు. శ్రీలంక స్పిన్ దిగ్గజం ముత్తయ్య మురళీధరన్(800), ఆస్ట్రేలియా బౌలింగ్ లెజెండ్ షేన్ వార్న్(708) తర్వాత కుంబ్లే(619) కొనసాగుతున్నాడు.
ఇదీ చదవండి: రేపటి నుంచే ఆస్ట్రేలియన్ ఓపెన్.. ఫేవరెట్ జకోవిచ్
