టెస్టుల్లో '400'.. ఆ ముగ్గురికే సాధ్యం: లారా

టెస్టుల్లో తన పేరిట ఉన్న 400 పరుగుల రికార్డును బ్రేక్​ చేసే సత్తా ముగ్గురికే ఉందని అభిప్రాయపడ్డాడు వెస్టిండీస్​ దిగ్గజం​ బ్రియాన్​ లారా. ఇందులో ఇద్దరు భారత క్రికెటర్లుండటం విశేషం. అంతర్జాతీయ క్రికెట్​లోని సుదీర్ఘ ఫార్మాట్​లో లారా నెలకొల్పిన వ్యక్తిగత అత్యధిక పరుగుల రికార్డును ఇప్పటివరకూ ఎవరూ అందుకోలేకపోయారు.

టీమిండియా.. గతేడాది సుదీర్ఘ ఫార్మాట్​ రారాజుగా నిలిచింది. భారత క్రికెటర్లు అద్భుత ప్రదర్శనతో ఆకట్టుకున్నారు. టెస్టు ఛాంపియన్​షిప్​లోనూ అత్యధిక పాయింట్లతో అగ్రస్థానంలో నిలిచింది. అయితే టెస్టు మ్యాచ్​ల గురించి ప్రస్తావన వచ్చిన ప్రతిసారీ విండీస్​ దిగ్గజ క్రికెటర్​ బ్రియన్​ లారా నెలకొల్పిన 400 పరుగుల రికార్డే గుర్తుకువస్తుంది. అతడి ఘనతను ఎవరు బ్రేక్​ చేస్తారనేది చిక్కుప్రశ్నే. అయితే తాజాగా ఈ విషయంపై లారా సమాధానమిచ్చాడు.

" టెస్టుల్లో నేను నెలకొల్పిన 400 పరుగుల రికార్డును చెరిపేయగల సత్తా ప్రస్తుత క్రికెట్​లో ముగ్గురికే ఉంది. ఆస్ట్రేలియా ఓపెనర్​ డేవిడ్‌ వార్నర్‌, భారత క్రికెటర్లు విరాట్‌ కోహ్లీ, రోహిత్‌ శర్మ.. ఈ మైలురాయిని అధిగమించగలరు. ఆసీస్​ బ్యాట్స్​మన్​ స్టీవ్​ స్మిత్​ బాగా ఆడినా.. నాలుగో స్థానంలో మైదానంలోకి రావడం వల్ల అతడికి ఈ రికార్డు కాస్త కష్టమే"
-- బ్రియాన్​ లారా, వెస్టిండీస్​ క్రికెటర్​

టెస్టుల్లో ఇప్పటికీ 400 వ్యక్తిగత పరుగులు చేసిన రికార్డు లారా పేరిటే ఉంది. ఇంగ్లాండ్‌పై అతడు ఈ ఘనత సాధించాడు. దాదాపు 15 ఏళ్లయినా ఏ క్రికెటర్..​ ఈ మైలురాయిని అందుకోలేకపోయారు.

రోహిత్​, కోహ్లీ, వార్నర్​

కోహ్లీ వాహ్వా

టీమిండియాపై ప్రశంసల వర్షం కురిపించాడు లారా. ఐసీసీ నిర్వహించే అన్ని టోర్నీల్లో విరాట్‌ సారథ్యంలోని భారత్... విజేతగా నిలవగలదని కొనియాడాడు. కోహ్లీ నేతృత్వంలో టెస్టుల్లోనూ, వన్డేల్లోనూ అత్యున్నత స్థాయికి వెళ్తోందని అన్నాడు. ఈ ఏడాది టీ20 వరల్డ్​కప్​లో తలపడే అన్ని జట్లకు భారత్​ ఓ కీలక ప్రత్యర్థని చెప్పుకొచ్చాడు.

2007లో దక్షిణాఫ్రికా వేదికగా జరిగిన టీ20 ప్రపంచకప్​ టైటిల్​ను తొలిసారి గెలిచింది ధోనీ సారథ్యంలోని భారత్. ఆ తర్వాత ఈ టోర్నీలో ఒక్కసారైనా మెన్​ఇన్​బ్లూ గెలవలేకపోయింది. ప్రస్తుతం అద్భుత ఫామ్​లో ఉన్న కోహ్లీసేన... రానున్న టీ20 ప్రపంచకప్​పై ఆశలుకల్పిస్తోంది.